Read tshwa Marku 16 Bible Online

Marku 16 - tshwa bible

Marku 16

¹Laha a sabado gi nga hunzile, Maria wa le Magdala, na Maria a nyine wa Jakobe, na Salome, va lo xava mubandwa, kasi va fela ku ya mu tota. [278]

²Ni mixo nguvu a siku go ranga ga viki, va loya nkeleni laha gambo gi nga tsuwuka.

³Va waku xikari kabye: Himani a ta nga hi wumbulutela a ribye gi suka nyangweni ya nkele ke?

⁴Kanilezi laha va nga languta, va lo wona lezaku a ribye gi wumbulutilwe lenzhako; hakuva gi wa hi ga hombe nguvu.

⁵Na va enghena nkeleni, va lo wona a jaha gi nga tshamile hi le tlhelweni ga xinene, na gi ambele a nguwo yo basa; vona va lo dzuka. [279]

⁶Gona giku kabye: Mu nga dzuki! Mu lava Jesu wa le Nazareta, loyi a nga belelwe. I vukile, a nga kona laha. Langutani a wutshamu legi va nga mu vekile kona! [280]

⁷Fambani, mu ya byela vapizani vakwe na Pedro, muku: Wa mu rangela a kuya Galilea; mu ta mu wona kona, kota lezi a nga wula ka nwina. [281]

⁸Va lo huma hi le nkeleni va tsutsuma, hakuva ya wa rurumela ni ku hlamala; a va nga wulangi nchumu ka munhu, hakuva va wa chava.

⁹Laha na a vukile ni mpunzu hi siku go ranga ga viki, a ku ranga i lo woneka ka Maria wa le Magdala, loye a nga hlongole ka yena a ntlhanu wa madimoni ni mambiri. [282]

¹⁰Yena i lo famba a ya bikela lava va nga wa mu lanzela, hakuva ya wa hi hlomulweni na va rila,

¹¹Laha na va zi zwile lezaku wa hanya, niku i mu wonile, a va kholwangi. [283]

¹²Anzhako ka lezo i lo woneka hi xinwani xiyimo ka vambiri vabye, laha va nga kari va famba vaya handle ka muti.

¹³Vona va lo tlhela va ya byela a vanwani, kanilezi a va va kholwangi kambe.

¹⁴Zonake i lo woneka ka vakhume ni munwe na va tshamile kugeni; i lo va sola hi kungakholwi kabye ni kunonoha ka timbilu tabye, hakuva a va nga kholiswangi hi lavo va nga mu wonile laha na a vukile. [284]

¹⁵Aku ngalo kabye: Fambani misaveni yontlhe, mu ya kanela ivangeli ka vanhu vontlhe. [285]

¹⁶Loyi a kholwako a bapatizwa i ta hanyiswa; kanilezi loyi a nga kholwiko i ta lamuliwa. [286]

¹⁷A ziwoniso zi ta nga mahiwa hi lava va kholwako hi lezi: Hi vito ga mina va ta hlongola madimoni, va wulawula hi tirimi tiswa; [287]

¹⁸va ta khoma tinyoka; hambu loku vanwa a xilo xi dayako, xi nga ta va lamata; va ta tlhateka mandla ka vababyi, va hanya. [288]

¹⁹Laha Hosi Jesu na a wulawulile na vona, i lo tlakuselwa tilweni, aya tshama hi le reveni ga xinene ga Nungungulu. [289]

²⁰Kanilezi vona va lo famba, va ya kanela ivangeli wutshanwini gontlhe; a Hosi yi wa tira zinwe navo, yi tiyisa a mhaka hi ziwoniso lezi zi nga yi heleketa. Amen. [290]