Read tshwa Marku 4 Bible Online

Marku 4 - tshwa bible

Marku 4

¹Jesu i lo engeta a gonzisa fungwini wa bimbi. Ku lo tsombana kakwe a xidlemo xa hombe nguvu, a kala a enghena ngalaveni, a tshama ka yona laha bimbini; ni xidlemo xontlhe xi wa hi fungwini wa bimbi. [49]

²I lo va gonzisa timhaka tinyingi hi mifananiso; a kugonziseni kakwe aku kabye:

³Ma nga zwani: A muxwanyi i lo huma a ku ya xwanyela.

⁴Laha a nga kari a xwanya, a tinwani timbewu ti lo wela ndleleni, ni tinyanyani ti lota ti ta ti jowotela.

⁵A tinwani ti lo wela misaveni ya maribye, laha ku nga hava a misava yo tala; ti lo mila hi kuhatlisa, hilezi ku wa nga hi na misava yi etileko.

⁶Laha na gi tsuwukile gambo, ti lo tlahuka, ti wuna hakuva ti wa nga hi na mitsu.

⁷A tinwani ti lo wela xikari ka mizwa; ni mizwa yi lo kula, yi ti tlimba, ti nga pswali mihanzu.

⁸Tinwani ti lo wela misaveni yo saseka, ti kula ti enzeleka ti pswala mihanzu; ti lo pswala hi 30, na hi 60, ni 100. [50]

⁹A engeta aku: Loyi a nga hi tindleve ta kuzwa, ngha a ingisa.

¹⁰Laha na a tsawukene ni vanhu, lava a nga hi navo zinwe ni vakhume ni vambiri va lo mu wutisa hi mifananiso leyo. [51]

¹¹I te ngalo kabye: A ka nwina ku nyikilwe ku tiva a mifihlakalo ya mufumo wa Nungungulu; kanilezi lava va nga lehandle va tivisiwa timhaka tontlhe hi mifananiso;

¹²kasi hi ku wona, va ta wona, kanilezi va nga wonisisi; hi kuzwa va tazwa, kanilezi va nga zi pimi; ku nga taku va hunzuluka va tsetselelwa kuonha kabye [52]

¹³I te ngalo kabye: A mu wu tivi mufananiso lowu ke? Mu ta yi tivisa kuyini a mifananiso yontlhe ke?

¹⁴A muxwanyi i xwanyela a mhaka. [53]

¹⁵Lava va nga le ndleleni laha a mhaka yi xwanyiwako kona, hi lava va zwileko mhaka, kanilezi Satani ata, a ta susa a mhaka yi xwanyilweko lomo timbilwini tabye.

¹⁶Zinghaho ni lava va xwanyilweko wutshanwini ga maribye, hi lava va nge loku va zwile mhaka, va yi amukela hi xihatla ni kutsaka;

¹⁷kanilezi vona wutsumbu na va nga hi na mitsu, va tiyiseta xikhatanyana ntsena; zonake loku va humelwa hi zikarato kutani zixaniso hi kota ya mhaka, zalezo va su khunguvanyeka.

¹⁸Lava va xwanyilweko xikari ka mizwa, hi vona lava va zwileko a mhaka,

¹⁹kanilezi a kukaratekela a za tiko, ni kukhohlisa ka kufuma, ni ku navela zilo zinwani ku enghena kabye ku tlimba mhaka, yi nga ha pswali mihanzu. [54]

²⁰Kanilezi lava va xwanyilweko misaveni yo saseka, hi lava va zwako a mhaka, va yi amukela, va pswala mihanzu hi ka 30, hi 60, na hi 100.

²¹Yena i te ngalo kabye: Xana a kandiya yi nehwa kasi ku vekwa lahasi ka xirunzu, kutani lahasi ka wuriri ke; a yi tlhatekwi le mezeni ke? [55]

²²Hakuva a ku na xilo xi fihlilweko xi to kala xi nga wonekeliswi; a xi kona xi tumbetilweko xi to kala xi ngati kubaseni. [56]

²³Loku munhu a hi ni tindleve ta kuzwa, ngha a ingisa.

²⁴I te ngalo kabye: Tlharihani hi lezi mu zi zwako: Hi mpimo lowu mu pimako ha wona mu ta pimelwawu ha wona ni ku hunza. [57]

²⁵Hakuva loyi a nga nazo, i ta nyikiwa zinwani; ni ka loyi a nga hiko nazo ku ta tekiwa ka yena hambu lezi a nga nazo. [58]

²⁶Yena i te ngalo: A mufumo wa Nungungulu wu kota munhu loyi a byalako mbewu misaveni; Mat. 13:24

²⁷a etlela a vuka, wusiku ni hlikanhi a mbewu yi mila yi kula, na a nga zi tivi lezaku zi mahisa kuyini.

²⁸A misava yi pswala mihanzu ha yoce: a kuranga hi khava, zonake a mponwani, zonake mavele ma tiyeleko mponwanini.

²⁹Kanilezi laha mavele na ma buvile, hi kona a tshovelako, hakuva a kuhula ku chikele. [59]

³⁰Yena i te ngalo: Hi ta wu fananisa ni yini a mufumo wa Nungungulu ke? Kutani hi wihi a mufananiso hi ta nga wu pimanyisa ha wona ke? [60]

³¹Wu fanana ni mbewu ya xinapi, leyi loku yi byaliwa misaveni, yi nga yona yi tsongwani nguvu ku hunza tontlhe timbewu ta misava,

³²kanilezi loku yi byalilwe, yi kula, yi maha ya hombe ku hunza gontlhe a khubyanyi, yi phaka maravi ya hombe; kala a tinyanyani ta tilo ti ta zumba nzhutini wa yona.

³³Hi mifananiso yo tala ya kunghahi i lo kanela a mhaka ka vona, kota lezi va nga zi kota ku yizwa. [61]

³⁴Ahandle ka mufananiso a nga kanetangi nchumu ka vanhu; kanilezi na Va hi voce i lo tlhamusela timhaka tontlhe ka vapizani vakwe.

³⁵Hi gwalego siku, laha na gi hlwile, aku kabye: A hi yeni tlhatuko. [62]

³⁶Na va tlhelisile xidlemo va lo famba zinwe naye lomu ka ngalava leyi a nga hi ka yona; ti wa hi kona tinwani tingalava ti nga mu pangalata.

³⁷Zonake ku lo vuka a bhubhutsa ga hombe ga mheho, ni mabyandlati ma lo gobhozela ngalaveni, kala yi sangula ku tala.

³⁸Jesu i wa hi le xisalwini xa ngalava na etlele wurongo laha ka zikhigelo. Va lo mu vuxa, vaku kakwe: Mugonzisi, a ku khatali lezi hina hi lovako ke?

³⁹I lo vuka, a kawuka a mheho, aku ka bimbi: Miyela, uku hwi! Ni mheho yi lo gawuka, kuva ni malenga ya hombe.

⁴⁰Aku ngalo kabye: Hi yini mu chavako ke? A mu se kuva nako kukholwa ke?

⁴¹Vona va lo rewuka nguvu, vaku ngalo ka munwe ni munwani: Kasi himani loyi, waku hambu mheho ni bimbi zi mu ingisa ke?