Read tshwa Marku 5 Bible Online

Marku 5 - tshwa bible

Marku 5

¹Zonake va lo chikela tlhatukweni wa bimbi, le tikweni ga maGerasa. [63]

²Laha Jesu na ha huma ngalaveni, i lo tlhangavetwa hi munhu a humako zilahleni, loyi a nga hi ni moya wa kubiha.

³I wa tshama zilahleni; va wa nga zi koti ku mu boha, ge, hambu hi mangenje;

⁴hakuva i wa bohilwe kanyingi hi makhotso ni mangenje, kanilezi i lo bhewula a mangenje a tshova makhotso; ku wa nga hi kona munhu a nga zi kota ku mu rivata.

⁵Xontlhe xikhati, a mumu ni wusiku, i wa kanyuluka zilahleni ni le zitsungeni, na a ti cekelela hi maribye.

⁶Laha a nga wona Jesu hi le kule, i lo tsutsuma a ya mu khizamela,

⁷na aba huwa hi gezu ga hombe, aku: Xana i mhaka muni u nga nayo na mina, wena Jesu, Nʼwana wa Nungungulu loyi a nga Hehla-hehla? Nza ku hlambanyisa hi Nungungulu, u nga nzi xanisi.

⁸Hakuva Jesu i wa te ngalo ka yena: Wena moya wa kubiha, huma ka munhu loyi!

⁹I lo wu wutisa aku: Hi wena mani a vito ga wena ke? Wuku ngalo kakwe: A vito ga mina nzi Legioni, hakuva hi vanyingi.

¹⁰Wu lo mu khongotela nguvu lezaku a nga yi panzanyi ka tiko lego.

¹¹Laha xitsungeni ku wa hi kona a ntlhambi wa hombe wa makhumba ma nga kari maga,

¹²a mimoya ya kubiha yi lo mu khongotela, yiku: Hi rumele makhumbeni, hi enghena ka wona.

¹³Yena i lo yi vumela. A mimoya ya kubiha yi lo huma, yi ya enghena makhumbeni; zonake a ntlhambi wu lo tsutsumela nzhelelweni wuya bimbini, wu ya mhemba lomo. A tsengo wa wona wu wa hi 2,000.

¹⁴A varisi va wona va lo tsutsuma, va ya bika mutini ni lomu handle; a vanhu va lota va ta wona lexi xi mahekileko.

¹⁵Va lota ka Jesu, va wona loyi a nga hi ni madimoni, na a tshamile na a ambele, a hi ni kupima kakwe, yaloye a nga hi ni legioni; va lo chava.

¹⁶Lava va nga zi wona va lo va hlawutela, lezaku zi mahisile kuyini ka yena loyi a nga wa hi ni madimoni, ni ka makhumba.

¹⁷A vanhu va lo mu khongotela a kuva a suka tikweni gabye. [64]

¹⁸Laha Jesu na ha enghena ngalaveni, loyi a nga wa hi ni madimoni i lo mu khongotela a ku ngha a tshama naye. [65]

¹⁹Kanilezi a nga mu vumelangi, i te kakwe: Famba kaya ka nwina, u ya byela a maxaka ya wena a zilo za hombe lezi a Hosi yi ku maheleko zona, niku yi mahisile kuyini a wuxinji ka wena.

²⁰Yena i lo ti fambela, a sangula ku hlawutela le Dekapoli, lezaku i mahisile kuyini a zilo za hombe Jesu ka yena; a vanhu vontlhe va lo hlamala.

²¹Laha Jesu na a wuyile tlhatuko hi ngalava, a xidlemo xa hombe xi lo tsombana ka yena na hi le fungwini wa bimbi.

²²Ku lota munwe wa varangeli va sinagoga, a vito gakwe hi Jairo; na a mu wona Jesu i lo ti wisa mikonzweni yakwe, [66]

²³a mu khongotela nguvu, aku: A nhanyana wa mina i lava kufa; tana u ta mu tlhateka mandla, kasi a fela ku tlhela a hanya.

²⁴Yena i lo famba zinwe naye, ni xidlemo xa hombe xi lo mu lanzela, na xi mu tsimbeketa.

²⁵A wasati loyi a nga wa hi ni kuphophoma ka nkhata a khume ga malembe ni mambiri, [67]

²⁶loyi a nga xanisekile nguvu hi tinʼanga tinyingi, a xakela zontlhe lezi a nga wa hi nazo, na a nga kumi kuvuneka, kanilezi ku su nonoha ku enzeleka;

²⁷na a zwile ha Jesu, i lota xidlenwini hi lenzhako, a ta khumba nguwo yakwe;

²⁸hakuva i wa te ngalo: Loku nza nga khumba tinguwo takwe ntsena, nzi ta hanyiswa.

²⁹Zalezo a kuphophoma ka nkhata wakwe ku lo gumesa; azwa mirini wakwe lezaku i hanyisilwe nghumbeni yakwe.

³⁰Kanilezi Jesu na a zi tivile lezaku a ntamu wu humele ka yena, i lo hunzuluka xidlenwini, aku ngalo: Himani a khumbileko a tinguwo ta mina? [68]

³¹A vapizani vakwe Vaku ka yena: Wa zi Wona lezaku a xidlemo xa ku tsimbeketa, na uku: Himani a nzi khumbileko ke?

³²Yena i lo lunguza a ku wona loyi a zi mahileko.

³³Kanilezi a wasati i wa chava a rurumela, na tiva lezi zi mahekileko kakwe, i lota a tawa mahlweni ka yena, a mu byela zinene zontlhe.

³⁴Jesu i te ngalo kakwe: Nwananga, a kukholwa ka wena ku ku hanyisile; famba hi kurula, u hanyiswa nghumbeni ya wena. [69]

³⁵Laha na a ha wulawula, va lota hi le ndlwini ya murangeli wa sinagoga, va taku: A nhanyana wa wena i file, hi yini u nonohisako u karata Mugonzisi ke? [70]

³⁶Kanilezi Jesu na a nga khataleli a mhaka yi wulilweko, aku ngalo ka murangeli wa sinagoga: U nga chavi, kholwa ntsena.

³⁷A nga vumelangi munwani munhu ku mu heleketa, sine Pedro, na Jakobe ni nakulobye Johani.

³⁸Laha va nga chikela ndlwini ya murangeli wa sinagoga, i lo wona a woyonga, ni lava va rilako, va hlaluka nguvu.

³⁹I lo enghena, aku ka vona: Hi yini mu mahako woyonga, na mu rila ke? A nhanyana a nga fangi, kanilezi i etlele. [71]

⁴⁰Va lo mu hleka; kanilezi laha na a va humesile vontlhe,: i lo teka a raru wa nwanana ni nyine wa kona, zinwe ni lava a nga hi navo, a enghena laha a nga etlele nwanana. [72]

⁴¹Zonake i lo khoma a canja ga nwanana, aku kakwe: Talita Kumi; zi tlhamuseleko ku ngalo, Nhanyana, nziku ka wena, Vuka!

⁴²Ni nhanyana i lo vuka zalezo, a fambafamba; hakuva i wa hi ni 12 wa malembe a ntanga yakwe. Va lo hlamaliswa ha hombe nguvu.

⁴³Kanilezi Jesu i lo va laya lezaku va nga zwatisi mhaka leyi; zonake aku: Mu nyikeni zakuga. [73]