Read tshwa Marku 6 Bible Online

Marku 6 - tshwa bible

Marku 6

¹Zonake i lo suka laho, aya tikweni ga le kabye, a vapizani vakwe va mu lanzela. [74]

²Hi siku ga sabado i lo gonzisa lomo sinagogeni; a vanyingi lava va nga muzwa va lo hlamala, vaku: Xana inaloyi i zi kumile kwihi lezi ke? Niku: Kutlhariha ka kuyini a nyikilweko kona, ni zirewukiso zi mahiwako hi mandla yakwe zita hi kwihi ke? [75]

³Loyi a hi yena muvatli, nʼwana Maria, ni nakulobye wa Jakobe, na Jose, na Juda, na Simoni ke? Ni vamakabye va xisati a va kona laha na hina ke? Va lo hlamuka ha yena. [76]

⁴Jesu i te ngalo kabye: A muprofeti a nga vumali kudzunziwa, a handle ka lomu tikweni gabye, ni xikari ka maxaka yakwe, hi le ndlwini yabye. [77]

⁵I wa nga zi koti ku maha xirewukiso laho, saseka ku tlhateka mandla yakwe ka vababyi va tsongwani, a va hanyisa.

⁶I lo hlamala hi kota ya kungakholwi kabye. Zonake i lo nzulanzula mitaneni na a gonzisa. [78]

⁷I lo vitana a vakhume ni vambiri, a sangula ku va ruma hi vambiri-vambiri, a va nyika ntamu wo humesa mimoya ya kubiha. [79]

⁸I lo va laya lezaku va nga teki nchumu lwenzweni labye, saseka nhonga ntsena; ge ni timbuva, hambu a xikhwama, hambu ni mali mabhandini yabye;

⁹va boha zilato, kanilezi va nga ambali mabhaji mambiri. [80]

¹⁰I te ngalo kabye: Kani hi kwihi laha mu enghenako lomu ndlwini, tshamani kona mu kala mu suka wutshanwini lego. [81]

¹¹Ni ka gihi wutshamu va ta nga kala va nga mu amukeli, va nga mu ingisi, laha mu sukako kona, phuhunhani a ntshuri wa mikonzo ya nwina, kasi kuva wukustumunyu ka vona. [82]

¹²Va lo andlamuka, va ya kanela lezaku ngha vanhu va hunzuluka.

¹³Va lo hlongola madimoni manyingi, ni ku va tota hi mafura lava va nga babya, va va hanyisa. [83]

¹⁴Hosi Herodi yi lozwa ha Jesu, hakuva a vito gakwe gi wa zwakala; aku ngalo: Johani Mubapatizi i vukile hi ka vafileko, hikwalaho leyi mintamu yi tira ka yena. [84]

¹⁵Kanilezi a vanwani vaku ngalo: Hi Elija. Vanwani vaku: Muprofeti, wo kota munwe wa vaprofeti. [85]

¹⁶Kanilezi laha Herodi na zi zwile, i te ngalo: Hi Johani, loyi nzi nga mu tsema hloko, i vukile hi ka vafileko. [86]

¹⁷Hakuva Herodi i wa rumele ku ya khoma Johani, a mu khotsela paxweni hi kota ya Herodia, a sati wa nakulobye Filipu; hakuva i wa mu tekile.

¹⁸Hakuva Johani i wa te ngalo ka Herodi: A zi faneli ka wena ku teka a sati wa nakuloni. [87]

¹⁹Herodia i lo mu pika, a lava ku mu daya, kanilezi i wa nga zi koti,

²⁰hakuva Herodi i lo chava Johani, hi ku mu tiva lezaku i munhu a lulamileko ni kubasa, i lo mu lonzowota; Laha a ngazwa a kuwulawula ka Johani, i lo kanganyiseka nguvu, hambu zi hi tano i lo muzwa hi kutsaka. [88]

²¹Laha xi nga chikele a xikhati xi nene, laha Herodi a nga mahela a manghanakana ni tinduna ta yimpi ni vahombe va le Galilea a mubuzo wa ku alakanya a siku ga kubelekiwa kakwe; [89]

²²a nhanyana wa Herodia i lo enghena a kina, a tsakisa Herodi ni lava va nga tshamile naye kugeni; ni hosi yi te ngalo ka nhanyana: Nzi kombele ni xihi u xi ranzako, nzi ta ku nyika xona.

²³A engeta a mu hlambanyela, aku: Nzi ta ku nyika ni xihi u xi kombelako, hambu ni khihlanya ga mufumo Wa mina. [90]

²⁴A nhanyana i lo huma a ya wutisa nyine wakwe, aku: Nzi ta kombela yini ke? Yena aku: A hloko ya Johani Mubapatizi.

²⁵Zonake i lo wuya le hosini hi kuhatlisa, a ta kombela aku: Nzi ranza lezaku u nzi nyika zalezi lomu ngelweni a hloko ya Johani Mubapatizi.

²⁶A hosi yi lo xaniseka nguvu; kanilezi i wa nga lavi ku mu alela hi kota ya kuhlambanya kakwe, na hi kota ya lava va nga tshamile kugeni. [91]

²⁷Zalezo yi lo rumela ginwe ga masochwa yakwe, yi gi laya ku neha hloko ya Johani; gi lo famba gi ya mu tsema hloko lomo paxweni,

²⁸gi neha hloko yakwe hi ngelo, gi yi nyika ka nhanyana; a nhanyana a yi nyika nyine wakwe.

²⁹Laha vapizani va Johani na va zi zwile, va lo ta teka xirumbi xakwe, va ya xi lahla nkeleni.

³⁰A vapostoli va lo tsombana ka Jesu, va mu hlawutela zontlhe lezi va zi mahileko, ni zontlhe lezi va zi gonzisileko vanhu. [92]

³¹Yena aku kabye: Tanani, hiya xiwuleni, hi ya tshama hoce, kasi ma humula kutsongwani. Hakuva ku wa hi kona vanyingi va ngata ni ku famba, laha kaku vapizani va nga kumi ni xikhati xa kuga. [93]

³²Va lo famba hi ngalava wutshanwini ga xiwula va hi voce. [94]

³³Kanilezi vanhu va lo va wona ni ku famba, a vanyingi va lo va tiva, va tsutsumela kona hi muhanza hi le mitini yontlhe, va rangela Jesu ni vapizani.

³⁴Laha Jesu a nga huma ngalaveni i lo wona a xidlemo xa hombe, a va zwela wusiwana, hakuva va wa kota tiyivu ti nga hiko na murisi; i lo sangula ku va gonzisa timhaka to tala. [95]

³⁵Laha siku gi ngaya kupeleni, a vapizani va lo tshinela kakwe, vaku: A wutshamu xiwula, ni siku gi lava ku mbhela;

³⁶va tlhelise, kasi va fela ku famba masinwini ni zimitaneni zi hi ranzeleko, va ya ti xavela zakuga.

³⁷Kanilezi i lo hlamula aku ngalo kabye: Va heni nwina zakuga. Vaku ngalo kakwe: Hi famba hi ya xava a zibaba za 200 wa macheleni, hi va nyika vaga ke? [96]

³⁸Aku kabye: Mu na ni zibaba zingani? Fambani mu ya wona. Loku va zi tivile, vaku: I ntlhanu, ni zidluwani zimbiri. [97]

³⁹Yena i lo va laya lezaku a va tshame vontlhe hi mitlawa ka byanyi go nyuka.

⁴⁰Va lo tshama lahasi hi mitlawa ya 100 ni ya 50.

⁴¹Jesu i lo teka a ntlhanu wa zibaba ni zidluwani zimbiri, a cuwuka tilweni, a zi katekisa ni ku khema zibaba; zonake i lo nyika ka vapizani ku zi avela ka vanhu, ni zidluwani zimbiri i lo zi avanyisa xikari ka vona vontlhe. [98]

⁴²Vontlhe va loga, va xura.

⁴³Ku lo rolelwa matlhatlha, ku tala 12 wa zirunzu zinwe ni ya zidluwani.

⁴⁴Lava va ngaga va wa hi 5,000 wa vavanuna.

⁴⁵Zonake Jesu i lo hatla a kurumeta a vapizani vakwe ku khilela ngalaveni, a kuva va ranga vaya tlhatuko wa le Betsaida, yena a sala kala a tlhelisa xidlemo. [99]

⁴⁶Anzhako na onekene naxo i loya xitsungeni ku ya khongela.

⁴⁷Laha na gi hlwile, a ngalava yi wa hi xikari ka bimbi, yena na sele ha yece muhanzeni. [100]

⁴⁸I lo va wona ha va karateka hi ku bonza makasiya, hakuva a mheho yi wa hambene navo; hi xirinzo xa wumune xa wusiku i lota kabye na famba hehla ka bimbi; na a ngha a ku khwatsi ku va hunza.

⁴⁹Kanilezi laha va nga mu wona na a famba hehla ka bimbi, va lo alakanya vaku xigono, vaba huwa;

⁵⁰hakuva vontlhe va lo mu wona, va rurumela. Kanilezi i lo wulawula navo, aku kabye: Tiyani hlana, hi mina; mu nga chavi.

⁵¹I lo enghena ka vona ngalaveni, ni mheho yi lo gawuka; vona va wa la su nchu hi kuhlamala,

⁵²hakuva a va pimangi hi lezi zi nga maheka hi zibaba, hakuva a timbilu tabye ti wa nonohile. [101]

⁵³Laha na va tlhatukile, va lo chikela tikweni ga Genesareta, va rikha fungwini. [102]

⁵⁴Na va humile ngalaveni a vanhu va lo mu tiva,

⁵⁵va tsutsumela tikweni gontlhe ga leyo, va sangula ku rwala hi masango yabye lava va nga babya, va va yisa laho va ngazwa lezaku i kona.

⁵⁶Ni kontlhe a nga enghena kona, zimitaneni kutani mitini, ni le masinwini, va lo veka a vababyi laha maphangweni, va mu khongotela lezaku va fela ku khumba machakafula ya nguwo yakwe; ni vontlhe lava va nga mu khumba va lo hanyiswa. [103]