Read tshwa Marku 8 Bible Online

Marku 8 - tshwa bible

Marku 8

¹Hi ka lawo masiku laha ku nga hi kona kambe a xidlemo xa hombe, na xi nga hi na nchumu xa kuga, Jesu i lo vitana vapizani vakwe, aku ka vona: [117]

²Nza xi zwela wusiwana a xidlemo, hakuva hi masiku manharu makunu na va tshamile na mina, na va nga hi na zakuga.

³Loku nzi va tlhelisa makaya kabye na va hi ni ndlala, va nga sika ndleleni; hakuva vanwani va vona vata hi le kule.

⁴A vapizani vakwe va lo mu hlamula, vaku: Hi nga va kumela kwihi a zibaba laha xiwuleni za ku va xurisa lava vanhu ke?

⁵I lo va wutisa aku: Zibaba zingani mu nga nazo ke? Vona va te ngalo: I ntlhanu ni zimbiri. [118]

⁶I lo laya xidlemo ku tshama hasi; zonake i lo teka a ntlhanu wa zibaba ni zimbiri, a khesa, a zi khema, a nyika ka vapizani vakwe, kasi ku avela ka vanhu; va lo zi veka mahlweni ka xidlemo.

⁷Va wa hi ni zidluwani zi tsongwani; na a zi katekisile, i lo laya a kuva na zona zi avelwa kabye. [119]

⁸Vona va loga va xura, zonake ku lo rolelwa a matlhatlha ma seleko, ku tala ntlhanu wa zirunzu ni zimbiri.

⁹Lava va ngaga va wa hi Xipimo xa 4,000 wa vanhu. Yena i lo va fambisa.

¹⁰Zonake i lo enghena ngalaveni ni vapizani vakwe, va loya tlhelweni ga Dalmanuta. [120]

¹¹Ku lota a vaFarisi, va ta sangula ku kanetisana naye, na va kombela a xiwoniso xa le tilweni, na va mu ringa. [121]

¹²Yena i lo keta moyeni wakwe, aku ngalo: Xana lexi xizukulwana xi lava xiwoniso hikuyini ke? Hizinene nziku ka nwina: Lexi xizukulwana xi nga ta nyikiwa xiwoniso.

¹³I lo va siya, a enghena kambe ngalaveni, aya tlhatuko.

¹⁴Kanilezi a vapizani va wa rivele ku teka zibaba; lomo ngalaveni va wa hi ni xibaba xinwe ntsena. [122]

¹⁵I lo va laya, aku: Tlharihani, mu ti wonela a comelo ga vaFarisi ni comelo ga ka Herodi.

¹⁶Va lo wulawulisana xikari kabye, vaku: A hi na zibaba.

¹⁷Jesu na a zi tiva aku kabye: Hi yini mu wulawulisanako hilezi mu nga hiko na zibaba ke? A mu se ku tiva, hambu ni ku pima ke? A timbilu ta nwina ta ha nonohisile lezi ke? [123]

¹⁸Lezi mu nga ni mahlo, a mu woni ke? Ni tindleve mu nato, a mu zi koti kuzwa? A mu alakanyi nchumu ke?

¹⁹Laha nzi nga khemelela a ntlhanu wa zibaba xikari ka 5,000 wa vanhu, zirunzu zingani mu nga tata hi matlhatlha ke? Vaku kakwe: I khume ni zimbiri. [124]

²⁰Ni laha nzi nga khemelela a ntlhanu ni zimbiri xikari ka 4,000 wa vanhu, zirunzu zingani mu nga tata hi matlhatlha ke? Vaku kakwe: I ntlhanu ni zimbiri. [125]

²¹Yena aku ngalo kabye: A mu se nga pima ke? [126]

²²Zonake va lo chikela le Betsaida. Ku lo nehiwa ka yena a xikhumu, va mu khongotela lezaku a xi khumba.

²³Yena i lo khoma a xikhumu hi canja, a xi humesa mutini; laha na a phelele a mahlo ya xona, i lo tlhateka mandla yakwe hehla ka xona, a xi wutisa, aku: Wa wona nchumu ke? [127]

²⁴Xi lo cuwuka hehla, xiku: Nzi wona vanhu, nzo va wona kota tisinya ti fambako.

²⁵I lo engeta a tlhateka mandla mahlweni ya xona; xi lo cuwuka, xi hanyiswa, xi wona zilo zontlhe khwatsi.

²⁶Jesu i lo xi rumela kaya ka xona, aku: U nga engheni laha mutini. [128]

²⁷Zonake Jesu i lo famba mitini ya le Kesaria Filipi, zinwe ni vapizani vakwe. Laha ndleleni i lo wutisa vapizani vakwe, aku: A vanhu ve hi mina mani ke? [129]

²⁸Va lo mu byela vaku: Johani Mubapatizi; ni vanwani vaku, Elija; kanilezi vanwani vaku, U munwe wa vaprofeti. [130]

²⁹I lo va wutisa, aku: Kanilezi nwina mu ngalo hi mina mani ke? Pedro i lo hlamula aku kakwe: Wena U Kristu. [131]

³⁰Yena i lo va laya lezaku va nga wuli lezo ha yena ka munhu ni munwe.

³¹Zonake i lo sangula ku va gonzisa lezaku a Nʼwana wa munhu i: yimelwe hi ku xaniseka nguvu, a aliwa hi masingalakati ni vapristi va hombe ni vatsali, a dawa, a tlhela a vuka hi siku ga wunharu. [132]

³²A mhaka leyi i lo yi wulawula yiku dlunya. Pedro i lo mu yisa tlhelweni, a sangula ku mu kawuka.

³³Kanilezi na hunzuluka, a wona vapizani vakwe, i lo kawuka Pedro, aku: Suka ka mina Satani, hakuva a ku alakanyi hi za Nungungulu, kanilezi hi za vanhu.

³⁴I lo vitana a xidlemo zinwe ni vapizani vakwe, aku ngalo kabye: Loku munhu a ranza ku nzi lanzela, a ti tsike, a rwala xihambano xakwe, a nzi lanzela. [133]

³⁵Hakuva loyi a ranzako ku hlayisa a kuhanya kakwe, i ta lahlekelwa ha kona; ni loyi a lahlekelwako hi kuhanya kakwe hi kota ya mina ni ya ivangeli, i ta ku lonzowota. [134]

³⁶Hakuva zi ta mu vuna yini munhu a ku bhinzula tiko gontlhe, loku a lahlekelwa hi muhefemulo wakwe ke?

³⁷Hakuva a munhu i ta humesa yini ku tekisa muhefemulo wakwe ke?

³⁸Hakuva loyi a nga ni tingana ha mina ni timhaka ta mina xizukulwaneni lexi xa wubhayi ni kuonha, a Nʼwana wa munhu kambe i tava ni tingana ha yena, laha a ta nga wuya hi kungangamela ka Raru wakwe, zinwe ni tingelosi to basa. [135]