Read tshwa Marku 9 Bible Online

Marku 9 - tshwa bible

Marku 9

¹I te ngalo kabye: Hizinene nziku ka nwina, vanwani va vona lava va yimileko laha va nga tazwa kufa, va kala va wona a mufumo wa Nungungulu na wuta hi ntamu. [136]

²Anzhako ka ntlhanu wa masiku ni ginwe, Jesu i lo teka Pedro, na Jakobe, na Johani, a va yisa xitsungeni xo leha na va hi voce. I lo hunzuka xiyimo mahlweni kabye; [137]

³a tinguwo takwe ti lo hunzuka ti hatima, ti basa ha hombe nguvu, hi lezaku a ku na muhlazi misaveni a zi kotako a ku ti basisa kota lezo. [138]

⁴Ku lo woneka kabye Elija na Mosi, na va kari va wulawula na Jesu.

⁵Pedro aku ngalo ka Jesu: Rabi, zi hi sasekele a kuva hi tshama laha; a hi akeni mixaxa minharu: munwe ngwa wena, ni munwe ngwa Mosi, ni munwe ngwa Elija;

⁶hakuva i wa nga zi tivi lezi a ta nga wulawula, hakuva va wa chava nguvu.

⁷Kwalaho ku lota a refu gi ta va khubhunyeta; ku huma gezu hi lomo refini, giku: Loyi hi Nʼwana wa mina a ranzekako, mu ingiseni.

⁸Hi xikhanzakanya xa zalezo va lo lunguza, a va ha wonangi munhu, saseka Jesu yece a nga hi navo.

⁹Laha va nga kari va relela hi le xitsungeni, i lo va laya lezaku va nga byeli munhu hi lezi va zi wonileko, a Nʼwana wa munhu na a nga se ku vuka hi ka vafileko. [139]

¹⁰Va lo khoma a gezu legi, na va wutisana lezaku zi wula yini a kuvuka hi ka vafileko.

¹¹Va lo mu wutisa, vaku: Hi yini a vatsali va nge ngalo, Elija i fanele ku ranga ata ke? [140]

¹²I lo hlamula, aku: Kunene, Elija i tata kuranga, a ta tlhelisela zilo zontlhe; kanilezi ku tsalilwe hikuyini hi Nʼwana wa munhu, lezaku i ta xaniseka nguvu, ni ku nyenyiwa ke? [141]

¹³Mina nzi ngalo Elija i tile; va mahile ka yena zontlhe lezi va zi ranzako, kota lezi ku tsalilweko ha yena. [142]

¹⁴Laha na va chikele ka vapizani, va lo wona a xidlemo xa hombe na xi va ranzele, ni vatsali va nga kari va kanetisana navo. [143]

¹⁵A xidlemo loku xi wona Jesu xi lo hlamala nguvu, xi mu tsutsumela a ku ya mu losa.

¹⁶I lo va wutisa aku: Mu kanetisana navo hi yini ke?

¹⁷A munwe wa xidlemo i lo hlamula, aku: Mugonzisi, nzi nehile ka wena a nʼwana wa mina, loyi a nga ni moya wa mbeveve;

¹⁸ni kwihi laha wu mu khomako, wo mu tlatlalata lahasi; a pupuma khuvi, a getsela meno, a woma. Nzi lo kombela vapizani va wena lezaku va wu humesa, a va zi kotangi.

¹⁹Jesu i lo hlamula, aku: Nwina xizukulwana xi nga kholwiko, ku ta kala rini nzi hi na nwina ke? nzi ta timisela ha nwina kala xikhati muni? Mu neheni ka mina.

²⁰Va lo mu neha ka Jesu, kanilezi laha moya wu nga mu wona wu lo mu cherukisa nguvu, awa lahasi, a puluwunza na pupuma khuvi. [144]

²¹Jesu i lo wutisa raru wakwe, aku: Xikhati muni na a mahisa lezi? Yena aku: Ku sukela wunwananeni gakwe.

²²Zikhati zinyingi wu mu hoxile nzilweni ni le matini, kasi ku mu lovisa. Loku wena u zi kota ku maha nchumu, hi mahele tipswalo, u hi vunetela.

²³Jesu aku ngalo kakwe: Loku nzi zi kota! Zontlhe za koteka ka loyi a kholwako. [145]

²⁴Zonake a raru wa nwanana i lo kanyuluka, aku: Nza kholwa; nzi ponise ka kungakholwi ka mina.

²⁵Laha Jesu a nga wona lezaku a xidlemo xi tsutsumela ka yena, i lo kawuka a moya wa kubiha, aku: Wena moya wa mbeveve ni wa xiwiri, mina nza ku laya, huma, u nga ha engheni ka yena!

²⁶Na wu bile huwa, ni ku mu cherukisa nguvu, wu lo huma; ni mufana i lo maha kota a fileko, kala a linyingi la vona vaku ngalo: I file.

²⁷Kanilezi Jesu i lo mu khoma hi canja, a mu vuxa; yena a yima.

²⁸Laha Jesu a nga wa enghenile ndlwini, a vapizani vakwe va lo mu wutisa na va hi voce, vaku: Hina hi tsanzekile hi yini ku wu humesa ke? [146]

²⁹Aku ngalo kabye: A lixaka lolu a li humeswi hi xinwani xilo, ahandle ka kukhongela.

³⁰Na va sukile hi laho, va loya tsemakanya Galilea; i wa nga zi ranzi lezaku zi tibyiwa hi vanhu,

³¹hakuva i wa gonzisa vapizani vakwe, aku kabye: A Nʼwana wa munhu i ta nyikelwa mandleni ya vanhu, va ta mu daya; laha na a delwe i ta tlhela a vuka anzhako ka masiku manharu. [147]

³²Kanilezi a va pimangi mhaka leyi, va wa chavani ku mu wutisa.

³³Zonake va loya Kapernaume; laha va nga hi lomo ndlwini i lo va wutisa, aku: Mu wa kanetisana hi yini laha ndleleni ke? [148]

³⁴Kanilezi vona va su tiwitiwi bhi; hakuva va wa kari va kanetisana laha ndleleni, lezaku hi mani wahombe xikari kabye.

³⁵I lo tshama lahasi, a vitana a vakhume ni vambiri, aku ka vona: Loku a munhu a ranza ku maha wa kuranga, a mahe wa lenzhako ka vontlhe, ni nanza ga vontlhe. [149]

³⁶Zonake i lo teka a nwanana tsongwani, a mu yimisa xikari kabye; na mu teka mawokweni yakwe, aku ka vona: [150]

³⁷Kani hi wihi a ta nga amukela munwe wa vanana va kunghahi hi vito ga mina, i amukela mina; ni wihi loyi a nzi amukelako, a nga amukeli mina, kanilezi i amukela loyi a nzi rumileko. [151]

³⁸Johani aku ngalo ka yena: Mugonzisi, hi lo wona munhu na humesa madimoni hi vito ga wena; hi lo mu tsimbeta, hakuva a nga hi lanzeli. [152]

³⁹Jesu i te ngalo: Mu nga mu tsimbeteli, hakuva a ku na munhu a mahako zirewukiso vitweni ga mina, a zi kotako ku hatlisa a wulawula kubiha ha mina. [153]

⁴⁰Hakuva loyi a nga hi vukeliko i yima na hina.

⁴¹Hakuva kani hi wihi a ta nga mu nyika khokho ga mati a kunwa, hilezi mu nga va ka Kristu, hizinene nziku ka nwina, a nga ta lahlekelwa hi nchachazelo wakwe. [154]

⁴²Kani hi wihi a khunguvanyisako munwe wa lava va tsongwani va kholwako ka mina, zi ngava chukwana ka yena lezaku a ribye ga xigayo gi khonekwa nhanwini yakwe, a rikhiswa bimbini. [155]

⁴³Loku a canja ga wena gi ku maha u khubeka, gi tseme; hakuva zi ku sasekele a kuva u enghena wutomini na u hi xilema, ku hunza a kuva U hi ni mandla ya wena mambiri u hoxwa Gehena, nzilweni wu nga timekiko, [156]

⁴⁴laha a xiwungwani xabye xi nga fiko, ni nzilo wu nga timekiko kona.

⁴⁵Loku konzo wa wena wu ku khunguvanyisa, wu tseme; zi ku sasekele a kuva u enghena wutomini na u khwita, ku hunza a kuva u hi ni mikonzo mimbiri, u hoxwa Gehena,

⁴⁶laha a xiwungwani xabye xi nga fiko, ni nzilo wu nga timekiko kona.

⁴⁷Loku a tihlo ga wena gi ku khunguvanyisa, gi xokole; zi ku sasekele a kuva u enghena mufunweni wa Nungungulu na u hi ni tihlo ginwe, ku hunza a kuva u hi ni mahlo mambiri, u hoxwa Gehena,

⁴⁸laha a xiwungwani xabye xi nga fiko, ni nzilo wu nga timekiko kona.

⁴⁹Hakuva munhu munwe ni munwani i ta chuchelwa hi nzilo, ni muphahlelo munwe ni munwani wu ta lungiwa hi munyu.

⁵⁰A munyu wu sasekile, kanilezi loku munyu wu pswhama, mu ta wu lunga hi yini ke? Tshamani ni munyu nzeni ka nwina, mu hi ni kurula munwe ni munwani. [157]