Read tshwa Luka 1 Bible Online

Luka 1 - tshwa bible

Luka 1

¹Kota lezi a vanyingi va ringileko a ku hlawutela hi ku longoloxa a mahungu laya ma humeleleko xikari ka hina,

²khwatsi hilezi ma nyikilweko ka hina hi lava va nga zi wona hi mahlo, na va hi malanza ya mhaka hi kusanguleni, [1]

³na minawu na nzi hlolisisile a timhaka tontlhe hi le kusanguleni ka tona, nzi xuvile a ku ku tsalela tona hi ku longoloxa, wena Teofilu a dumileko nguvu; [2]

⁴kasi wa fela ku tiva a kutiya ka timhaka leti u gonzisilweko tona.

⁵A masikwini ya Herodi, a hosi ya le Judia, ku wa hi kona a mupristi wo kari, a vitwako Zakaria, wa ntlawa wa Abija; a sati wakwe i wa hi wa vana va ka Aroni, a vito gakwe i wa hi Elizabeti. [3]

⁶Hi wumbiri gabye va wa lulamile mahlweni ka Nungungulu, va gonga yontlhe milayo ni zileletelo za Hosi, va nga hi na nanzu. [4]

⁷Va wa nga hi na nʼwana, hakuva Elizabeti i wa hi ngonwa, hi wumbiri gabye va wa khosahele.

⁸Ku te laha Zakaria na tira a ntiro wa wupristi mahlweni ka Nungungulu hi xikhati xa ntlawa wakwe, [5]

⁹kota a mukhuwo wa wupristi, i lo khonʼwa hi hlolo ku enghena tempeleni ya Hosi a hisa libani. [6]

¹⁰A xidlemo xontlhe xa vanhu xi wa yimile lahandle xi khongela hi xikhati xa ku hiswa libani. [7]

¹¹Zonake a ngelosi ya Hosi yi lo woneka ka Zakaria, na yi yimile hi tlhelo ga xinene ga alati ga ku hisela a libani; [8]

¹²laha a nga yi wona i lo dzuka a chava.

¹³Kanilezi a ngelosi yi te ngalo kakwe: U nga chavi, Zakaria; hakuva a xikombelo xa wena xi zwilwe; a sati wa wena Elizabeti i ta ku pswalela a nisanyana, u ta mu chula vito gakwe ku hi Johani.

¹⁴U tava ni kutsaka ni kunengela ha yena, ni vanyingi va ta tsakela a kubelekwa kakwe; [9]

¹⁵hakuva i tava wa hombe mahlweni ka Hosi. A nga tanwa a vinya ni byala, kanilezi i ta tala hi Moya wa ku Basa kusukela na hi lomo rumbyini ga nyine wakwe. [10]

¹⁶I ta wuyiseta a vana vanyingi va ka Israeli ka Hosi Nungungulu wabye. [11]

¹⁷Yena i ta ranga mahlweni kakwe hi moya ni ntamu wa Elija, a kuva a hunzulusa a timbilu ta vararu ka vana vabye, lava va hluwukileko a va tlhelisa wutlharini ga valulamileko; ni ku yi longisela Hosi a vanhu va longiselweko yona. [12]

¹⁸Zakaria aku ngalo ka ngelosi: Nzi ta zi tiva hi yini ke? Hakuva nzi munhu wa kale ni sati wa mina i khosahele. [13]

¹⁹A ngelosi yi mu hlamula, yiku kakwe: Nzi mina Gabrieli, loyi a yimako mahlweni ka Nungungulu; nzi lo runwa a ku ta wulawula na wena, ni ku ku byela a mahungu laya yo saseka. [14]

²⁰Languta, u tava mbeveve u nga zi koti ku wulawula, ku kala ku chikela a siku lego lezi zi ta nga maheka ha gona, hakuva a ku kholwangi hi timhaka ta mina, leti ti ta nga tatiseka xikhatini xa tona.

²¹Ni vanhu va lo lavelela Zakaria, va hlamala hilezi a nga hlwela lomo tempeleni;

²²laha a nga huma i wa nga zi koti ku wulawula na vona; zonake va wa zi tiva lezaku i wonile xiwoniso lomo tempeleni; yena i lo fananisela ka vona, a tshama na hi mbeveve.

²³Laha a masiku ya kutira kakwe na ma mbhelile, i loya kaya kakwe.

²⁴Anzhako ka masiku laya, a sati wakwe Elizabeti i lo xura nyimba, a ti fihla ntlhanu wa tihweti, aku:

²⁵Hi lezi Hosi yi nga nzi mahela zona a masikwini laya yi nzi cuwukileko, kasi ku susa a tingana ta mina xikari ka vanhu. [15]

²⁶Hi hweti ya wuntlhanu ni yinwe a ngelosi Gabrieli yi lo runwa hi Nungungulu a kuya mutini wa le Galilea, wu vitwako Nazareta,

²⁷ka nhwana a wutilweko hi wanuna loyi a vito gakwe a nga Josefa, wa yindlu ya Davida; a vito ga nhwana i wahi Maria. [16]

²⁸A ngelosi yi lo ta enghena, yiku kakwe; Xewe, wena loyi u kumileko thomo, a Hosi yi na wena. [17]

²⁹Kanilezi i lo dzukiswa nguvu hi kuwula ka yona, na a alakanyela lezaku kuloswa loku ku wula yini.

³⁰A ngelosi yiku ngalo kakwe: U nga chavi. Maria; hakuva u kumile thomo ka Nungungulu.

³¹U ta xura nyimba, u beleka a nisanyana, u mu chula vito gakwe aku hi Jesu. [18]

³²I tava wa hombe, i ta vitanwa aku Nʼwana wa loyi a nga Hehla-Hehla; Hosi Nungungulu i ta mu nyika a xitshamu xa wuhosi xa Davida raru wakwe. [19]

³³I ta fumela yindlu ya Jakobe kala kupinzuka; a mufumo wakwe cima wu nga ta gumelwa. [20]

³⁴Maria aku ngalo ka ngelosi: Zi ta mahisa kuyini lezo, lezi nzi nga tiviko wanuna?

³⁵A ngelosi yi lo hlamula yiku ka yena: A Moya wa ku Basa wu tata hehla ka wena, ni ntamu wa loyi a nga Hehla-Hehla wu ta ku fenengeta; hikwalaho a nʼwana wo basa loyi a ta nga belekiwa i ta vitanwa a Nʼwana wa Nungungulu. [21]

³⁶Languta, a xaka ga wena Elizabeti, yenawu i xure nyimba ya nisanyana wukhosaneni gakwe; leyi hi hweti ya wuntlhanu ni yinwe ka yena loyi va ngaku i ngonwa.

³⁷Hakuva a ku na xilo xi nga mu tsanzako Nungungulu. [22]

³⁸Maria aku ngalo: Hizona, nzi nanza ga Hosi; a zi maheke ka mina kota lezi u wulileko. Ni ngelosi yi lo suka ka yena,

³⁹Hi walawo masiku Maria i lo suka a famba hi kuhatlisa mutini wa ka Juda, lomu tikweni ga zitsunga;

⁴⁰a ya enghena ndlwini ya Zakaria, a losa Elizabeti.

⁴¹Laha Elizabeti a ngazwa kulosa ka Maria, a xinwanana xi lo tshukuma rumbyini gakwe; zonake Elizabeti i lo tala hi Moya wa ku Basa,

⁴²a tlakusa gezu, aku: U katekile wena xikari ka vavasati, yi katekile ni mbeleko ya nyimba ya wena. [23]

⁴³Zi maheka hikuyini lezi ka mina, lezaku a nyine wa Hosi ya mina ata ka mina ke?

⁴⁴Hakuva laha a gezu ga kulosa ka wena na gi zwele tindleveni ta mina, a xinwanana xi lo tshukuma hi kutsaka rumbyini ga mina.

⁴⁵U katekile wena loyi u nga kholwa, lezaku zi ta tatiseka lezi zi wulawulileko ka wena hi Hosi.

⁴⁶Zonake Maria i te ngalo: A muhefemulo wa mina wa dumisa Hosi,

⁴⁷Ni moya wa mina wa tsaka ha Nungungulu a Muhanyisi wa mina;

⁴⁸Hakuva i cuwukile a wulahasi ga nanza gakwe. Kusukela lezi a zizukulwana zontlhe zi taku ngalo nzi katekile. [24]

⁴⁹Hakuva Loyi a nga ni ntamu i nzi mahele zilo za hombe; Gi basile a vito gakwe. [25]

⁵⁰A zizukulwaneni zontlhe a wuxinji gakwe gi ka lava va mu chavako.

⁵¹I tirile hi ntamu hi woko gakwe; I hangalasile lava va ti kukumukisako kualakanyeni ka timbilu tabye. [26]

⁵²I wisile tihosi zitshanwini za tona za wuhosi, A tlakusa lava va tsongwani.

⁵³Lava va nga ni ndlala i va xurisile hi lezi zo nanziha; A tlhelisa lava va fumileko na Va nga hi na nchumu.

⁵⁴I vunile Israeli a nanza gakwe, Na a alakanya a wuxinji gakwe

⁵⁵Ka Abrahama ni pswalo wakwe kala kupinzuka, Kota lezi a nga tsumbisa a vararu yahina. [27]

⁵⁶Maria i lo tshama na Elizabeti a tihweti tinharu, zonake i lo tlhelela kaya.

⁵⁷A xikhati xa Elizabeti xi wa chikele xa kuva a hefemula; i lo beleka a nisanyana.

⁵⁸Laha a vaakelane vakwe ni maxaka yakwe va ngazwa lezaku a Hosi yi mu mahele a wuxinji ga hombe, va lo tsaka zinwe naye.

⁵⁹Hi siku ga wuntlhanu ni manharu, laha va ngata ku mu maha a nkwera a nwanana, a va lava ku mu chula a vito ga Zakaria, a raru wakwe. [28]

⁶⁰Kanilezi a nyine wakwe i lo hlamula, aku: Kokwihi; i ta vitanwa aku hi Johani. [29]

⁶¹Vaku kakwe: A nga kona wa xaka ga nwina a vitanwako hi vito legi.

⁶²Va lo wutisa raru wakwe hi ku fananisela, lezaku i ranza a ku ngha a vitanwa aku hi yena mani.

⁶³Yena i lo kombela a pedra go tsalela kona, a tsala, aku: A vito gakwe hi Johani. Vontlhe va lo hlamala.

⁶⁴Zalezo wu lo vululeka a nomu wakwe, ni lirimi lakwe li tlhatlheka; i lo wulawula a bonga Nungungulu. [30]

⁶⁵A vaakelane vabye vontlhe va wa chava, ni timhaka tontlhe leti ti wa lo ga fenemete tikweni gontlhe ga zitsunga ga le Judia.

⁶⁶Vontlhe lava va nga tizwa va lo ti hlayisa timbilwini tabye, vaku: Xana a nwanana loyi i ta maha wa kuyini ke? Hakuva a canja ga Hosi gi wa hi zinwe naye. [31]

⁶⁷Na Zakaria a raru wakwe i lo tatiswa hi Moya wa ku Basa, a profeta, aku: [32]

⁶⁸A yi khesiwe Hosi, a Nungungulu wa Israeli, Hakuva i enzele a vanhu vakwe ni ku va tirula. [33]

⁶⁹I hi vuxela a limhonzo la kuhanyisa A ndlwini ka Davida a nanza gakwe, [34]

⁷⁰Kota lezi a nga tsumbisa kaleloko hi milomu ya vaprofeti vakwe vo basa,

⁷¹A ku hi hanyisa valaleni va hina, ni mandleni ya vontlhe lava va hi vengako;

⁷²Kasi ku va mahela wuxinji a vararu va hina, Ni ku alakanya a xivumelwano xakwe xo basa, [35]

⁷³Lexi a nga funga hi ku hlambanya ka Abrahama a raru wa hina, [36]

⁷⁴A ku hi nyika lezaku laha na hi tlhatlhekile mandleni ya valala va hina Hi ta mu tirela na hi nga chavi nchumu, [37]

⁷⁵Hi kubasa ni kululama mahlweni ka yena masikwini wontihe ya hina.

⁷⁶Na wena nwanana, u ta vitanwa aku muprofeti wa loyi a nga Hehla-Hehla, Hakuva u ta famba mahlweni ka Hosi a ku longisa a tindlela ta yona, [38]

⁷⁷A kuva u tivisa vanhu va yona hi kuhanyiswa Kutsetselelweni ka zionho zabye,

⁷⁸Hi kota ya wuxinji ga hombe ga Nungungulu wa hina, Lego a kuca ka le hehla ku ta nga hi enzela ha gona,

⁷⁹A ku va woninga lava va tshamileko munyameni ni le nzhutini wa kufa, Ni ku rangela a mikonzo ya hina ndleleni ya kurula. [39]

⁸⁰A nwanana i lo kula, a ngangamukelana hi ntamu moyeni; zonake i wa hi le xiwuleni ku kala siku lego a nga huma ha gona xikari ka vaIsraeli. [40]