Read tshwa Luka 11 Bible Online

Luka 11 - tshwa bible

Luka 11

¹Ku te laha a nga kari a khongela wutshanwini go kari, loku a gumesile a munwe wa vapizani vakwe aku ngalo kakwe: Hosi, hi gonzise ku khongela, kota lezi Johani a nga gonzisa vapizani vakwe.

²Yena aku ngalo kabye: Laha mu khongelako wulani, muku: Dada, a vito ga wena a gi hlawuliwe; a wute mufumo wa wena.

³Hi nyike a masiku ni masiku a kuga ka hina ku eneleko.

⁴Hi tsetselele a zionho za hina; hakuva na hinawu ha tsetselela vontlhelele lava va aga ni milanzu ka hina. U nga hi yisi kuringweni.

⁵A engeta aku ka vona: Loku munwe wa nwina a hi ni xaka, aya ka gona xikari ka wusiku, a yaku ka gona: Nzi pembe zibaba zinharu;

⁶hakuva a xaka ga mina ga muenzi gi hambukele ka mina, a nzi na nchumu xa ku mu fihluta ha xona.

⁷Loyi a nga lomo ndlwini a hlamula, aku: U nga nzi karati; hakuva a livati li valilwe, ni vanana va mina va etlele masangweni na mina; a nzi zi koti ku vuka nzi ku nyika.

⁸Nziku ka nwina; Hambu a wa nga ta zi ranza ku vuka a mu nyika, hilezi a nga xaka gakwe, kanilezi hi kota yo kurumeta kakwe, i ta vuka a ta mu nyika zontlhe lezi a zi lavako. [236]

⁹Mina nziku ka nwina: Kombelani, mu ta nyikiwa; lavani, mu ta zi kuma; gongonzani, mu ta vululelwa. [237]

¹⁰Hakuva kani hi mani a kombelako, wa amukela; ni loyi a lavako, wa zi kuma; ni ka loyi a gongonzako, ku ta vululelwa ka yena.

¹¹Hi wihi raru xikari ka nwina, loku a nʼwana wakwe a mu kombela xibaba, a ta nga mu nyika ribye ke? Ni loku a kombela xidluwani, i ta mu nyika nyoka ke? [238]

¹²Kutani loku a kombela a tanza, i ta mu nyika a hume ke?

¹³Makunu loku nwina, na mu bihile, mu tiva a ku va nyika a zinyikiwo zo saseka a vanana va nwina, a Raru wa nwina wa le tilweni a nga ta hunzeleta, a ku nyika a Moya wa ku Basa ka lava va mu kombelako ke? Vahombe vaku Jasu a hlongola madimoni hi ntamu wa Belzebuba.

¹⁴Yena i wa hlongola a dimoni gi nga hi mbeveve. Ku te laha a dimoni gi nga wa humele, a mbeveve yi lo wulawula; a zidlemo zi lo hlamala. [239]

¹⁵A vanwani vaku ngalo: I hlongola madimoni hi Belzebuba, a hosi ya madimoni. [240]

¹⁶Ni vanwani va lo mu ringa, va kombela a xiwoniso xa le tilweni.

¹⁷Kanilezi yena na a tiva maalakanyo yabye, aku kabye: Ni wihi mufumo wu ti panzako ha woce wu ta hangalaka; ni yindlu yi ti panzako ha yoce yi tawa. [241]

¹⁸Loku Satani a hambene ha yece, a mufumo wakwe wu ta tiyisa kuyini ke? Hakuva mu ngalo nzi humesa madimoni hi Belzebuba.

¹⁹Loku mina nzi hlongola madimoni hi Belzebuba, va ma hlongolisa hi mani a vapizani va nwina ke? Hikwalaho va ta maha valamuli va nwina.

²⁰Kanilezi loku nzi hlongola madimoni hi litiho la Nungungulu, hakunene a mufumo wa Nungungulu wu tile ka nwina. [242]

²¹Loku a nhenha yi: hlomile yi lavelela a yindlu ya yona, a zilo zakwe zi tshameka khwatsi; [243]

²²kanilezi loku munwani loyi a nga ni ntamu ku yi hunza a yi hlomela, a yi hlula, wa yi wutlela matlhari lawa a nhenha yi nga wa ma tsumba, a avanyisa lezi a zi phangileko. [244]

²³Loyi a nga hiko na mina i hambene na mina; ni loyi a nga hlengeletiko na mina wa hangalasa. [245]

²⁴A moya wa kubiha na wu humele munhwini, wu tsemakanya a wutshanwini go kala mati, na wu lava a kuhumula. Kanilezi na wu nga ku kumi, wuku: Nzi ta tlhelela ndlwini ya mina, leyi nzi nga huma ka yona. [246]

²⁵Laha na wu wuyile, wu yi kuma na yi swiyelwe na yi longisilwe.

²⁶Zonake wu famba, wu ya lava a yinwani mimoya ya ntlhanu ni mimbiri yo biha ku hunza wona wutsumbu; yi enghena yi tshama kona; zonake a matshamela yo gumesa ya munhu loye rna biha ku hunza yo sangula. [247]

²⁷Ku te laha na a ha wulawula timhaka leti, a wasati wo kari wa le xidlenwini i lo tlakusa gezu gakwe, aku ngalo ka yena: Yi katekile a nyimba leyi yi nga ku beleka, ni mavele lawa u nga ma anʼwa.

²⁸Kanilezi Jesu aku ngalo: Ina, ku katekile nguvunguvu lava va zwako a mhaka ya Nungungulu, va yi hlayisa. [248]

²⁹Laha a zidlemo zi nga tsombana kakwe, i lo sangula ku wulawula, aku: A xizukulwana lexi xi bihile, xi lava xiwoniso; kanilezi xi nga ta nyikiwa xiwoniso, ntsena a xiwoniso xa Jona. [249]

³⁰Hakuva kota lezi Jona a nga wa hi xiwoniso ka va le Niniva, i tava nghaho Nʼwana wa munhu ka lexi xizukulwana. [250]

³¹A muzinza wa le Dzongeni i ta suka a yima kulamuleni zinwe ni vavanuna va lexi xizukulwana, i ta va kona; hakuva i tile hi le magemetamusi a ku tazwa a wutlhari ga Solomoni; kasi a wahombe ku hunza Solomoni i kona laha, [251]

³²A vavanuna va le Niniva va ta yima kulamuleni zinwe ni lexi xizukulwana, va ta xi kona; hakuva va lo hunzuluka laha Jona a nga kanela kabye; kasi a wahombe ku hunza Jona i kona laha, [252]

³³A ku na munhu a lumekako kandiya, a yi veka wutshanwini ga xihundla, hambu lahasi ka xirunzu, kanilezi yi hayekwa le hehla, kasi lava va enghenako va fela ku wona a kuwonekela. [253]

³⁴A kandiya ya miri hi tihlo ga wena. Loku a tihlo ga wena gi hi ginene, a miri wa wena wontihe wu ta tala hi kuwonekela; kanilezi loku gi babya, a miri wa wena kambe wu tele hi munyama. [254]

³⁵Hikwalaho ti wonele lezaku a kuwonekela loku ku nga ka wena ku nga ngha ku hi munyama.

³⁶Hikwalaho loku a miri wontihe wa wena wu tele hi kuwonekela na wu nga hi na tlhelo ga munyama, wona wontihe wu ta woningelwa, kota lezi a kandiya yi ku woningelako hi kuwonekela ka yona.

³⁷Na a ha wulawula, a muFarisi i lo mu ramba ku yaga zinwe naye; yena i lo enghena a tshama kugeni.

³⁸Laha a muFarisi a nga wa zi wonile, i lo hlamala lezi Jesu a nga kala ku ranga hi ku hlamba na a nga se kuga. [255]

³⁹A Hosi yi te ngalo kakwe: Kunene nwina vaFarisi mu hlaza lahandle ka gombe ni ngelo; kanilezi lomo nzeni mu tele hi kuyiva ni kubiha. [256]

⁴⁰Zipumbu nzi nwina, loyi a nga maha za lahandle, a nga mahangi za lomo nzeni ke?

⁴¹Kanilezi nyikani zinyikiwo ka zisiwana hi lezi zi nga za lomo nzeni; zonake zontlhe zi tava zi hlazekile ka nwina. [257]

⁴²Kanilezi khombo a give ka nwina vaFarisi; hakuva mu nyikela a za wukhume ka minte ni rue ni khubyanyi wontihe, kasi mu tsika nongameto ni kuranza ka Nungungulu; kanilezi mu wa fanele ku maha lezi, na mu nga tsikangi ku humesa leʼzo ranga. [258]

⁴³Khombo a give ka nwina vaFarisi; hakuva mu ranza a zitshamu za le mahlweni masinagogeni, ni kuloswa wutshanwini go hlengeletana. [259]

⁴⁴Khombo a give ka nwina; hakuva mu fanana ni zilahla zi nga wonekiko; lezi vanhu va zi kanzihelako va nga zi tivi. [260]

⁴⁵Munwe wa vagonzisi va nayo i lo hlamula aku ngalo kakwe: Mugonzisi, hi ku wula lezo wa hi rukatela na hinawu kambe,

⁴⁶Yena i te ngalo: Khombo a give ni ka nwina vagonzisi va nayo; hakuva mu rwexa vanhu a minzhwalo yo binza; kasi nwina wutsumbu a mu vumeli ku henya minzhwalo leyo hi litiho linwe la nwina. [261]

⁴⁷Khombo a give ka nwina; hakuva ma aka a zilahla za vaprofeti lava va nga dawa hi vararu va nwina. [262]

⁴⁸Lezo mu maha wukustumunyu hi mitiro ya vararu va nwina ni ku yi vumela; hakuva vona va lo daya vaprofeti, na nwina mu aka zilahla zabye.

⁴⁹Hikwalaho a wutlhari ga Nungungulu gi wulile lezaku: Nzi ta va rumela a vaprofeti ni vapostoli, vanwani va vona va ta va daya, va xanisa vanwani; [263]

⁵⁰kasi a nkhata wa vaprofeti vontlhe, lowu wu halatilweko kusukela kuvangiweni ka misava, wu fela ku labyiwa ka lexi xizukulwana.

⁵¹Ku sangula hi nkhata wa Abeli ku kala nkhateni wa Zakaria, loyi a nga dawa xikari ka alati ni tempeli; ina, nziku ka nwina, wu ta labyiwa ka lexi xizukulwana. [264]

⁵²Khombo a give ka nwina, vagonzisi va nayo; hakuva mu susile a pfhungulo ya wutivi; nwina wutsumbu a mu enghenangi, ni lava va nga kari va enghena mu va tsimbetelo. [265]

⁵³Laha na a humile ndlwini leyo, a vatsali ni vaFarisi va lo sangula ku mu vukela hi ku mu tlokolotela, ni ku mu kucetela ku wulawula hi timhaka to tala;

⁵⁴na va mu wonga kasi ku mu hika kuwulawuleni kakwe. [266]