Read tshwa Luka 17 Bible Online

Luka 17 - tshwa bible

Luka 17

¹Jesu aku ka vapizani vakwe: A zi koteki lezaku a zikhunguvanyiso zi ngati; kanilezi khombo a give ka loye zi tako ha yena! [343]

²Zi ngava zi sasekile ka yena, lezaku a ribye ga xigayo gi khonekwa nhanwini yakwe, a rikhiswa bimbini, a ku hunza a kuva a khunguvanyekisa munwe wa lava va tsongwani.

³Ti tlhariheleni! Loku nakuloni a ku onhele, mu kawuke; loku a hunzuluka, mu tsetselele. [344]

⁴Loku a ku onhela a ntlhanu wa makhati ni mambiri hi siku, a wuya ka wena ka ntlhanu ni kambiri, a taku: Nza ti sola, u ta mu tsetselela.

⁵A vapostoli vaku ngalo ka Hosi: Engetela kukholwa ka hina.

⁶Hosi yi te ngalo: Loku mu wa hi ni kukholwa ku kotisa a mbewu ya xinapi, ngha muku ka sinya leyi ya nkuwu: Simuka, u ya byaliwa bimbini; yi wa ta mu ingisa. [345]

⁷Kanilezi hi wihi wa nwina, loyi a nga ni nanza gi rimako, kutani gi risako tiyivu, loyi a ta ngaku ka gona laha na gita hi le masinwini: Hatlisa, u ta tshama uga?

⁸Kutani a nga ta wula ka gona, aku: Nzi longisele zakuga, u ti boha bhandi, u nzi khozela, nzi kala nziga ni kunwa; anzhako wenawu u taga ni kunwa. [346]

⁹Xana i ta bonga a nanza hilezi gi nga maha lezi gi layilweko ke?

¹⁰Hizalezo na nwinawu, loku mu mahile zontlhe lezi mu layilweko zona, wulani muku: Hi malanza ma nga vuniko nchumu, hakuva hi mahile ntsena lezi hi yimelweko hi ku zi maha. [347]

¹¹Ku te laha a nga kari aya Jerusalema, i lo tsemakanya xikari ka Samaria ni Galilea. [348]

¹²Kota lezi a nga enghena mutini wo kari, i lo tlhangavetwa hi khume ga vavanuna va nga hi ni hlokonho. [349]

¹³Va lo yima kule, va tlakusa magezu yabye, vaku: Jesu, Hosi, hi mahele wuxinji!

¹⁴Laha a nga va wona, i te ngalo kabye: Fambani mu ya ti kombisa ka vapristi. Ku te laha va nga kari va famba, va su basiswa. [350]

¹⁵A munwe wa vona, laha a nga wona lezaku i hanyisilwe, i lo tlhela a wuya, na a dumisa Nungungulu hi gezu ga hombe.

¹⁶I lowa hi nghohe yakwe mikonzweni ya Jesu, a mu bonga; yena i wa hi muSamaria.

¹⁷Jesu i lo wutisa, aku: Xana a va basiswangi hi wukhume gabye ke? Lava va ntlhanu ni mune va kwihi ke?

¹⁸A ku na munwani a tlheleleko a ku ta dumisa Nungungulu, saseka loyi a nga wamatiko.

¹⁹Aku ngalo kakwe: Suka, u ti fambela; a kukholwa ka wena ku ku hanyisile. [351]

²⁰Na a wutisilwe hi vaFarisi lezaku, wu tata rini a mufumo wa Nungungulu, i lo va hlamula, aku: A mufumo wa Nungungulu a wu woneki a kufeni ka wona.

²¹Cima va nga ta wula, vaku: Makabye, hi lowu! kutani: Hi lowuya! hakuva a mufumo wa Nungungulu wu kona xikari ka nwina. [352]

²²Aku ka vapizani: Ma tata masiku laha mu ta nga xuva ku wona a ginwe ga masiku ya Nʼwana wa munhu, kanilezi mu nga ta gi wena.

²³Va taku ngalo ka nwina: Mangabye, hi gaya! Mangabye, hi loyi laha! Mu ngayi, hambu ni ku va lanzela. [353]

²⁴Hakuva kota lezi a kuhatima ku hatimako hi tlhelo ginwe ga tilo, ku woninga ni ka tlhelo ginwani; i tava nghaho Nʼwana wa munhu hi siku gakwe. [354]

²⁵Kanilezi a kusangula i yimelwe hi ku xaniseka nguvu, ni ku aliwa hi lexi xizukulwana. [355]

²⁶Kota lezi zi nga maheka masikwini ya Noa, zi tava nghaho a masikwini ya Nʼwana wa munhu. [356]

²⁷Va waga, vanwa, va teka, ni ku tekiwa, ku kala siku lego Noa a nga enghena ha gona lomo tarwini, ni ntalo wu lota, wu ta va lovisa vontlhe.

²⁸Khwatsi hilezi zi nga maheka masikwini ya Loti; va waga, vanwa, va xava, va xavisa, va rima, va aka; [357]

²⁹Kanilezi sikwini lego Loti a nga huma ha gona Sodoma, ku lona a nzilo ni solufa hi le tilweni, zi va lovisa vontlhe.

³⁰Zi tava nghaho sikwini lego a Nʼwana wa munhu a ta nga wonekeliswa ha gona. [358]

³¹Hi lego siku, loye a nga hehla ka yindlu, na zibya zakwe zi hi lomo ndlwini, ngha a nga chiki a ku ya zi teka; ni loye a nga le masinwini, ngha a nga tlheli a wuya. [359]

³²Alakanyani a sati wa Loti. [360]

³³Loyi a ta nga lava ku lonzowota kuhanya kakwe i ta lahlekelwa ha kona; ni loyi a lahlekelwako hi kuhanya kakwe i ta ku ponisa. [361]

³⁴Nziku ka nwina: Hi wusiku lego a vavanuna vambiri va ta etlela sangweni ginwe: a munwe i ta tekiwa, munwani a siyiwa. [362]

³⁵A vavasati vambiri va tava va gaya khatiginwe: a munwe i ta tekiwa, munwani a siyiwa.

³⁶Ni ka vavanuna vambiri va ta ngava le masinwini ku ta tekiwa munwe, ku siyiwa munwani.

³⁷Va lo mu wutisa, vaku: Hi kwihi Hosi ke? Yena aku ngalo kabye: Laha ku nga kona xirumbi, kwalaho ma ta tsombana kona a makoti. [363]