Read tshwa Luka 18 Bible Online

Luka 18 - tshwa bible

Luka 18

¹Yena i lo kanela kabye a mufananiso xungetano ni lezaku va fanele ku khongela a xikhati xontlhe, va nga [364]

²aku: A mutini wo kari ku wa hi kona a mulamuli, loye a nga kala a nga chavi Nungungulu, ni ku nga khatali hi munhu.

³A mutini walowo ku wa hi ni noni, leyi yi ngata kanyingi kakwe, yi taku: Nzi lulamisele a mhaka ka nala wa mina.

⁴Ku wa hi xikhati xo kari na a nga vumeli; kanilezi hi lenzhako i lo alakanya, aku: Hambu lezi nzi nga chaviko Nungungulu, ne ni ku khatala hi munhu;

⁵kanilezi kota lezi a noni leyi yi nzi karatako, nzi ta yi lulametela a mhaka, yi nga kala yi nzi rera loku yi simamisa yita.

⁶Hosi yi te ngalo: Zwanani lezi a wulako a mulamuli a nga lulamangiko!

⁷Xana Nungungulu a nga ta va photela a vahlawulilweko vakwe, lava va rilako ka yena a mumu ni wusiku ke, a nga ta timisela ha vona ke? [365]

⁸Nziku ka nwina: I ta va photela hi kuhatlisa. Ahemba-lokoke, laha Nʼwana wa munhu a ta nga wuya, i ta ta kuma kukholwa misaveni ke? [366]

⁹I lo engeta a kanela lowu mufananiso ka vokari lava va ti tsumbako vaku va lulamile, va kanyisa vanwani, aku: [367]

¹⁰A vavanuna vambiri va loya tempeleni ku ya khongela; a munwe i wa hi muFarisi, munwani a hi muhlengisi.

¹¹A muFarisi i lo yima hi tlhelo a khongela, aku: Nungungulu, nza ku bonga hilezi nzi nga fananiko ni vanwani vanhu; va nga makhamba, ni vakanganyisi, ni zirembi, hambu ku khwatsi hi muhlengisi loyi. [368]

¹²Nzi yila kumbiri hi viki, nzi nyika za wukhume ka zontlhe lezi nzi zi kumako.

¹³Kanilezi a muhlengisi i lo yima kule, a nga tiyangi ni ku tlakusa a mahlo yakwe le tilweni, kanilezi a tiba xifuva, aku: Nungungulu, ngha u hi ni wuxinji ka mina nzi nga muonhi.

¹⁴Nziku ka nwina: Loyi munhu i lo tlhelela kaya na a hlayiwa loyi a lulamileko ku hunza loyi munwani; hakuva ni wihi a ti kulisako i ta koramiswa; kanilezi loyi a ti koramisako i ta kuliswa. [369]

¹⁵Vanhu va lo neha kakwe a tisana tabye, lezaku kasi a fela ku ti khumba; kanilezi laha a vapizani vakwe va nga zi wonile, va lo va kawuka. [370]

¹⁶Kanilezi Jesu i lo vitana vanana, aku: Vumelani a vanana vata ka mina, mu nga va beleteli; hakuva a mufumo wa Nungungulu ngwa va kunghahi. [371]

¹⁷Hizinene nziku ka nwina: Kani hi wihi a nga amukeliko a mufumo wa Nungungulu kota a nwanana, cima a nga ta enghena ka wona. [372]

¹⁸A mufumeli wo kari i lo mu wutisa, aku: Mugonzisi nene, nzi ta maha yini kasi nzaga a tshomba ya wutomi ga pinzukelwa ke? [373]

¹⁹Jesu aku kakwe: Hi yini u nzi vitanako uku nzi nene ke? A ku na loyi nene, saseka munwe, yena Nungungulu.

²⁰Wa yi tiva milayo leyi yi nge ngalo: U nga bhayi, U nga dayi, U nga yivi, U nga mahi wukustumunyu ga mawunwa, Chava raru wa wena ni nyine wa wena. [374]

²¹Yena aku ngalo: Zontlhe lezi nzi zi hlayisile kusukela wusweni ga mina.

²²Laha Jesu na zi zwile, i te ngalo kakwe: Wa ha vumala xilo xinwe; xavisa zontlhe lezi u nga nazo, u avela zisiwana, wena u tava ni tshomba le tilweni; zonake ngona u nzi lanzela. [375]

²³Kanilezi laha na a zi zwile, i lo xaniseka nguvu; hakuva i wa hi ni kufuma ka hombe.

²⁴Jesu na a mu wona aku ngalo: Zi tsanzisa kuyini ka lava va fumileko a ku enghena mufunweni wa Nungungulu! [376]

²⁵Za hehuka ka kameli ku enghena nonwini wa chingani, ku hunza munhu a fumileko ku enghena mufunweni wa Nungungulu.

²⁶Lava va nga zizwa vaku ngalo: Kasi himani a nga hanyiswako ke?

²⁷Kanilezi yena aku ngalo: A zilo lezi zi nga kotekiko ka vanhu, za koteka ka Nungungulu. [377]

²⁸Pedro aku ngalo: Wangabye, hina hi siyile a za hina, hi ku lanzela.

²⁹Aku ngalo kabye: Hizinene nziku ka nwina: A ku na munhu loyi a siyileko yindlu, kutani sati, kutani vanakulobye, kutani vapswali, kutani vana, hi kota ya mufumo wa Nungungulu, [378]

³⁰loyi a ta nga kala ku amukela hi kuengetilweko kunyingi a ka lexi xikhati, ni ka tiko gi tako a wutomi ga pinzukelwa. [379]

³¹Yena i lo tsawuka ni vakhume ni vambiri, aku ngalo babye; Langutani, hi kanziha hiya Jerusalema; zonake ku ta tatiseka zontlhe lezi zi tsalilweko hi vaprofeti hi Nʼwana wa munhu. [380]

³²Hakuva i ta nyikelwa ka vamatiko, va ta mu tseketsela, a khomiwa hi tingana, ni ku phelelwa; [381]

³³va ta mu xupula ni ku mu daya; hi siku ga manharu i ta tlhela a vuka.

³⁴A va pimangi nchumu timhakeni leti; a gezu legi gi wa fihlilwe ka vona, va kohlwa hi lezi a zi wulako. [382]

³⁵Kota lezi a nga kari a tshinela Jeriko, a xikhumu xi wa tshamile reveni ga ndlela, xi kombela. [383]

³⁶Laha na xizwa a xidlemo xi kari xi hunza, xi lo wutisa lezaku xini.

³⁷Va lo mu byela vaku: Hi Jesu wa le Nazareta a hunzako.

³⁸Yena i lo vitana, aku: Jesu, nʼwana Davida, nzi mahele wuxinji.

³⁹Lava va nga rangile mahlweni va lo mu kawuka, lezaku ngha a miyela; kanilezi yena i lo engeta a vitana nguvu, aku: Wena nʼwana Davida, nzi mahele wuxinji.

⁴⁰Jesu i lo yima, a laya a kuva a nehiwa kakwe; laha a nga tshinele, i lo mu wutisa, aku:

⁴¹U ranza a ku ngha nzi ku mahela yini ke? Aku ngalo: Hosi, ngha nzi tlhela nzi wona.

⁴²Jesu aku ngalo ka yena: Tlhela u wona; a kukholwa ka wena ku ku hanyisile. [384]

⁴³Khalekhale i lo tlhela a wona; a mu lanza, a dumisa Nungungulu. A vanhu vontlhe loku va zi wonile, va lo dumisa Nungungulu. [385]