Read tshwa Luka 22 Bible Online

Luka 22 - tshwa bible

Luka 22

¹Ku wa tshinele a mubuzo wa zibaba zi nga hiko na comelo, lowu va nge i Pasika. [446]

²A vapristi va hombe ni vatsali va lo lava lezaku va nga mu dayisa kuyini Jesu, hakuva va wa chava vanhu. [447]

³Kanilezi Satani i lo enghena ka Judasi, loyi a tibyako Iskarioti, loyi a nga hlayiwa ni vakhume ni vambiri, [448]

⁴I lo famba a ya wulawula ni vapristi va hombe ni tinduna ta yimpi, lezaku i ta mu nyikelisa kuyini kabye.

⁵Vona va lo tsaka, va vumelana naye ku mu nyika mali. [449]

⁶Loku a vumele i wa lava xikhati xo mu nyikela ha xona kabye, na xi nga hi kona xidlemo.

⁷Laha ku nga chikele a siku ga zibaba zi nga hiko na comelo, legi ku yimelweko a ku tlhabyiwa ha gona a pasika; [450]

⁸Jesu i lo ruma Pedro na Johani, aku: Fambani mu ya hi longisela a pasika, kasi hi fela kuga.

⁹Vaku ngalo kakwe: U ranza a kuva hi ya yi longisela kwihi ke?

¹⁰Yena aku ngalo kabye: Loku mu enghenile mutini, mu ta tlhangana ni wanuna a rweleko a fuko ya mati; mu lanzeni ka yindlu leyi a enghenako ka yona;

¹¹muku ka nwinyi wa yindlu: A Mugonzisi i ngalo ka wena, Yi kwihi a yindlu, laha nzi ta nga gela kona a pasika zinwe ni vapizani va mina ke?

¹²Yena i ta mu kangeta a yindlu ya hombe le xitezi yi sasisilweko, mu ta hi longisela kona.

¹³A vapizani va lo famba, va ya kuma kota lezi a nga va byelile; va longisa pasika.

¹⁴Laha na xi chikele a xikhati, i lo tshama kugeni zinwe ni vapostoli. [451]

¹⁵I te ngalo kabye: Nzi xuvile nguvu a kuga na nwina a pasika legi, na nzi nga se ku xaniseka;

¹⁶hakuva nziku ka nwina: Nzi nga ta ha giga kambe, gi kala gi tatiseka mufunweni wa Nungungulu. [452]

¹⁷Loku a tekile gombe, i lo bonga, zonake aku kabye: Gi tekeni, mu siyelisana ha gona;

¹⁸hakuva nziku ka nwina: Nzi nga ha tanwa a mihanzu ya vina, wu kala wuta a mufumo wa Nungungulu. [453]

¹⁹Yena i lo teka xibaba, laha na a bongile, i lo xi khema, a va nyika, aku: Lexi hi miri wa mina, lowu wu nyikelwako nwina; mahani lezo, mu nzi alakanya ha zona. [454]

²⁰Zinghaho ni gombe anzhako ka xilalelo, aku: Legi gombe hi xivumelwano xiswa nkhateni wa mina, lowu wu halatelwako nwina. [455]

²¹Kanilezi langutani, a canja ga loyi a nzi nyikelako gi laha mezeni zinwe na mina. [456]

²²Hakuva a Nʼwana wa munhu wa ti fambela, kota lezi ku yimisilweko; kanilezi i khombo ka munhu loyi a mu tokometako! [457]

²³Vona va lo sangula ku wutisana, lezaku himani wa vona a ta nga maha lezo. [458]

²⁴Zonake ku lo huma a kukanetisana xikari kabye, lezaku himani a alakanyelako a kuva wa hombe. [459]

²⁵Jesu aku ngalo kabye: A tihosi ta vamatiko ta va fumela, ni lava va nga ni ntamu hehla kabye va vitiwa Zisasi. [460]

²⁶Kanilezi nwina mu nga tava nghaho; kanilezi loyi wa hombe xikari ka nwina, a mahe kota loye tsongwani; ni loyi wa kuranga, a mahe kota loyi a nga xitiri. [461]

²⁷Hakuva himani wahombe? Hi loyi a tshamako kugeni, kutani hi loyi a khozelako ke? A hi yena loyi a tshamako kugeni ke? Kasi mina nzi kona xikari ka nwina kota loyi a khozelako. [462]

²⁸Kanilezi hi nwina lava mu simamisileko na mina kuringweni ka mina. [463]

²⁹Mina nza mu nyika kufuma, kota lezi Dadani a nzi nyikileko kona; [464]

³⁰kasi ma fela kuga ni kunwa mezeni ya mina le mufunweni wa mina; mu ta tshama zitshanwini za wuhosi, mu lamula khume ga tixaka ni timbiri ta Israeli. [465]

³¹Simoni, Simoni, languta, Satani i mu kombele, a kuva a mu kuhlunga nwentlhe kota mavele; [466]

³²kanilezi mina nzi ku kombelele, lezaku a kukholwa ka wena ku nga hluleki. Wena loku u hunzulukile, tiyisa a vanakuloni. [467]

³³Pedro aku ngalo: Hosi, nzi longile a kuya paxweni ni le kufeni zinwe na wena.

³⁴Yena aku ngalo: Nza ku byela, Pedro, a nkuku wu nga taba nyamutlha, ku kala u kaneta kunharu lezaku a ku nzi tivi. [468]

³⁵A engeta aku kabye: Laha nzi nga wa mu rumile na mu hi hava xikhwama xa mali, ni nkwama, ni zilato, mu lo vumala nchumu ke? Vaku ngalo: A hi vumalangi nchumu. [469]

³⁶Aku ngalo kabye: Kanilezi makunu, loyi a nga ni xikhwama xa mali, a xi teke, zinghaho ni nkwama; ni loyi a nga hava supado, a xavise a nguwo yakwe, a ya yi xava.

³⁷Hakuva nziku ka nwina: Ku fela ku tatiseka ka mina lezi zi tsalilweko ku ngalo: I hlayelwe zinwe ni vaonhi; hakuva lezi zi kanelweko ha mina za tatiseka makunu. [470]

³⁸Vaku: Hosi, a tisupado timbiri hi leti. Aku ka vona: Ku enele.

³⁹Yena i lo huma, aya xitsungeni xa maoliva kota kutolovela kakwe; ni vapizani vakwe va lo mu lanzela. [471]

⁴⁰Laha a nga wa chikele kona, aku ngalo kabye: Khongelani kasi mu nga engheni kuringweni.

⁴¹I lo tsawuka ka vona a pfhukana wa ku hoxa ribye; i lo khizama, a khongela, [472]

⁴²aku: Dada, loku u zi ranza, susa a gombe legi ka mina; ahemba-lokoke, na ku nga hi kuranza ka mina, kanilezi ka wena a ku maheke.

⁴³Zonake ku lo woneka ka yena a ngelosi na yita hi le tilweni, yi ta mu tiyisa. [473]

⁴⁴Na hi kubayisekeni ka hombe, i lo kombela hi kutikisa; ni nyuko wakwe wu lo maha kota madona ya hombe ya nkhata wu donela misaveni. [474]

⁴⁵Laha a nga wa sukile kukhongeleni kakwe, ata ka vapizani, i lo ta va kuma na va etlele hi kuxaniseka,

⁴⁶aku ngalo kabye: Hiyini mu etlelako ke? Vukani mu khongela, kasi mu nga engheni kuringweni.

⁴⁷Na a ha wulawula, ku lo chikela a xidlemo, zinwe ni loyi a vitwako Judasi, a nga hi munwe wa vakhume ni vambiri; yena i lo tshinela ka Jesu kasi ku mu pswopswa. [475]

⁴⁸Kanilezi Jesu aku ngalo kakwe: Judasi, u nyikela Nʼwana wa munhu hi kupswopswa ke?

⁴⁹Lava va nga hi naye, laha na va wonile lezi zi to maheka, vaku: Hosi, hi hebheka hi supado ke?

⁵⁰A munwe wa vona i loba nanza ga mupristi wa hombe, a mu tsema a ndleve ya xinene. [476]

⁵¹Jesu aku ngalo: Tsikani, basi! I lo khumba a ndleve ya gona, a gi hanyisa.

⁵²Jesu i te ngalo ka vapristi va hombe, ni tinduna ta tempeli, ni masingalakati, lava va nga mu tela: Nwina mu humele na mu hlomile a tisupado ni zigomba, kukotisa loku nzi hi muphangi ke?

⁵³Laha nzi nga wa hi na nwina masiku wontihe lomu tempeleni, a mu ringangi ku nzi khoma; kanilezi lexi hi xikhati xa nwina ni ntamu wa munyama. [477]

⁵⁴Ku te loku va mu khomile Jesu, va famba naye, va mu yisa ndlwini ya mupristi wa hombe. Kanilezi Pedro i lo lanzela hi le kule. [478]

⁵⁵Ni laha va nga dzivele a nzilo xikari ka hubye, na va tshamile wutshamu ginwe, Pedro i lo tshama xikari kabye. [479]

⁵⁶A nanza ga xisati gi lo mu wona na a tshamile a wora nzilo, gi mu cuwukisisa, giku ngalo: Na yena loyi i wa hi zinwe naye.

⁵⁷Kanilezi Pedro i lo kaneta, aku: Wasati, a nzi mu tivi.

⁵⁸Anzhako ka xikhatanyana a munhu munwani i lo mu wona, aku: Wenawu u munwe wa vona. Kanilezi Pedro aku ngalo: Isawe, a hi mina.

⁵⁹Anzhako ka xikhati xo khwatsi i hora yinwe, a munwani i lo tiyisa, aku: Hakunene loyi munhu kambe i wa hi naye; hakuva ngwa le Galilea. [480]

⁶⁰Kanilezi Pedro aku ngalo: Isaweno, a nzi zi tivi lezi u zi wulako! Zalezo na a ha wulawula a nkuku wu loba.

⁶¹Ni Hosi yi lo hunzuluka, yi cuwuka Pedro; zonake Pedro i lo alakanya a mhaka ya Hosi, leyi yi ngaku ngalo kakwe: Hi mahlweni na nkuku wu nga se kuba nyamutlha, u ta nzi kaneta kunharu. [481]

⁶²Yena i lo huma, a rila hi xiviti.

⁶³A vanalava va nga khomile Jesu va lo mu tseketsela, va muba. [482]

⁶⁴Va lo mu boha mahlo, va mu wutisa, vaku: Vumba, himani a ku bileko ke?

⁶⁵Zonake va lo mu rukatela hi timhaka tinwani to tala.

⁶⁶Loku gi cile, a hlengeletano ya masingalakati ya vanhu yi lo tlhangana zinwe ni vapristi va hombe ni vatsali; va mu yisa hubyeni yabye, vaku: [483]

⁶⁷Loku wena u hi Kristu, hi byele. Kanilezi yena aku ngalo kabye: Hambu loku nzi mu byela, mu nga ta kholwa; [484]

⁶⁸ni loku nzi mu wutisa, mu nga ta hlamula.

⁶⁹Kanilezi kusukela lezi a Nʼwana wa munhu i ta tshama hi ka ga xinene ga ntamu wa Nungungulu. [485]

⁷⁰Vona vontlhe vaku ngalo: Kasi hi wena Nʼwana wa Nungungulu ke? Aku ngalo kabye: Nwina ma wula muku, hi mina yena.

⁷¹Zonake vaku: Ga ha laveka hikuyini a wukustumunyu ke? Hina hi zi zwile hi le nonwini wakwe.