Read tshwa Luka 24 Bible Online

Luka 24 - tshwa bible

Luka 24

¹Hi siku go ranga ga viki, va lota xilahleni ni mpunzu, na va neha a makha laya va nga wa ma longisele. [515]

²Va lo ta kuma a ribye na gi wumbulutilwe gi suswa nkeleni.

³Loku va enghenile a va kumangi a xirumbi xa Hosi Jesu. [516]

⁴Ku te laha va nga wa ha kanganyiseka hi lexi, languta, a vavanuna vambiri va lo yima kusuhani navo, na va ambele a tinguwo ti hatimako. [517]

⁵Kota lezi va nga dzuka, va koramisa tinghohe tabye misaveni, a vavanuna vaku ngalo kabye: Hi yini mu lavako loyi a hanyako xikari ka vafileko ke?

⁶A nga kona laha, kanilezi i vukile. Alakanyani lezi a nga mu byela laha a nga wa ha hi le Galilea, [518]

⁷aku: Nʼwana wa munhu i yimelwe hi ku nyikelwa mandleni ya vaonhi, a belelwa, hi siku ga manharu i ta tlhela a vuka.

⁸Zonake va lo alakanya a timhaka takwe,

⁹va suka xilahleni, va lo ya hlawutela zontlhe lezi ka vakhume ni munwe, ni ka vontlhe vanwani. [519]

¹⁰A vavasati lava va nga bikela a vapostoli lezi zilo hi Maria wa le Magdala, na Johana, na Maria a nyine wa Jakobe ni vanwani. [520]

¹¹Kanilezi a timhaka leti ti wa hi ku khwatsi mafenya ka vona; a va ti kholwangi. [521]

¹²Kanilezi Pedro i lo suka, a tsutsuma aya xilahleni; na a yimile a hlomela lomu nzeni, i lo wona a tinguwo ntsena; zonake a tlhelela kaya na a kari a hlamala hi lezi zi mahekileko. [522]

¹³Hi gwalego siku a vambiri va vona va waya le mutini wu vitwako Emausi, ku nga hi pfhuka wa khume ga tikilometro ku suka Jerusalema; [523]

¹⁴Va wa kari va wulawula hi zontlhe lezi zi mahekileko.

¹⁵Ku te laha va nga wulawula va wutisana, Jesu wutsumbu gakwe i lo tshinela, a famba navo; [524]

¹⁶kanilezi a mahlo yabye ma wa lutsumile va nga mu tivi. [525]

¹⁷Yena aku ngalo kabye: Kaxana, mahungu muni laya mu wulawulako ha wona lezi mu fambako ke? Vona va lo yima na va tsuvile.

¹⁸A munwani a vitwako Kleopasi, i lo hlamula aku ngalo kakwe: Wena wova mupfhumba wo tshama wece lomu Jerusalema, u kohlwako hi lezi zi humeleleko hi laya masiku ke? [526]

¹⁹Yena aku ngalo kabye: Zilo za kuyini ke? Vaku kakwe: Lezi za Jesu wa le Nazareta, loyi a nga wa hi muprofeti wa ntamu, hi mitiro ni kuwulawula mahlweni ka Nungungulu ni ka vanhu vontlhe; [527]

²⁰ni lezi a vapristi va hombe ni vafumeli va hina va nga mu nyikela, lezaku a konelwa ku dawa, va mu belela. [528]

²¹Kanilezi hina hi wa tsumbile lezaku hi yena a nga wa ta tirula Israeli; inyamutlha hi siku ga manharu na zi mahekile lezi zilo. [529]

²²Tlhatakumbiri, a vavasati vanwani va ka hina va hi hlamalisile; hakuva na va yile xilahleni ni mixo,

²³a va kumangi a xirumbi xakwe; va lo wuya va taku va wonile a muwoniso wa tingelosi, leti ti ngaku ngalo wa hanya.

²⁴Ni vanwani va nga hi na hina va loya xilahleni, va ya kuma kota lezi va nga wulile a vavasati; kanilezi yena a va mu wonangi.

²⁵Yena aku ngalo kabye: Maphuphulu nzi nwina ya vanhu va mbilu yi nonokako ku kholwa zontlhe lezi zi kanelweko hi vaprofeti!

²⁶Xana zi wa nga faneli lezaku Kristu a xaniseka kota lezi, a enghena kungangameleni kakwe ke? [530]

²⁷Zonake i lo sangula hi ka Mosi, ni vaprofeti vontlhe, a va tlhamusela hi ka mitsalo yontlhe a timhaka leti ti kuengetilweko yena. [531]

²⁸Vona va lo tshinela mutini lowu va ngaya ka wona; kanilezi Jesu i lo maha ku khwatsi hi loku a lava ku hunza.

²⁹Va lo mu khongotela, vaku: Xwana na hina, hakuva gi hlwile, a wusiku gi tshinele. Yena i lo enghena a ku ya tshama navo. [532]

³⁰Ku te laha a nga wa tshamile navo kugeni, i lo teka xibaba, a xi katekisa, a xi khema, a nyika kabye. [533]

³¹Ni mahlo yabye ma lo ambuluka, va mu tiva; kanilezi yena i lo nyamalala mahlweni kabye.

³²Zonake va lo byelana vaku: Kasi a timbilu ta hina ti wa nga vuri nzeni ka hina, laha a nga kanela ka hina ndleleni, a hi vululela mitsalo ke?

³³Va lo suka zalezo, va tlhelela Jerusalema, va ta kuma a vakhume ni munwe na va tsombene zinwe ni vapizani vanwani, lava va ngaku:

³⁴Kunene a Hosi yi vukile, yi wonekile ka Simoni. [534]

³⁵Na vona va lo hlawutela lezi zi nga humelela ndleleni, ni lezaku va mu tivisile kuyini laha a nga khema xibaba.

³⁶Kota lezi va nga ha wulawula lezo, Jesu wutsumbu i lo yima xikari kabye, aku ngalo ka vona: A kurula a kuve ka nwina. [535]

³⁷Kanilezi va lo dzuka va chava, na va alakanya lezaku xiruti va xi wonako. [536]

³⁸Yena aku ngalo kabye: Hi yini mu nga ni hlenekera ke, ni kukanakana ku vuka hikuyini timbilwini ta nwina ke?

³⁹Wonani a mandla ya mina, ni mikonzo ya mina, lezaku hi mina wutsumbu; nzi tseveteleni, mu wona; hakuva a xiruti a xi na nyama ni marambu, kota lezi mu wonako nzi hi nazo. [537]

⁴⁰Laha a nga wa wulile lezo, i lo va kombeta a mandla yakwe ni mikonzo yakwe.

⁴¹Kota lezi va nga ha kanakana hi kota ya kutsaka ni kuhlamala, i te ngalo kabye: Mu na ni zakuga laha ke? [538]

⁴²Va lo mu nyika a xipanze xa xidluwani xo katingwa.

⁴³Yena i lo xi teka, aga mahlweni ka vona. [539]

⁴⁴Aku ngalo kabye: Hi tona timhaka leti nzi nga ti kanela ka nwina, laha nzi nga wa ha hi na nwina, nziku: Timhaka tontlhe leti ti tsalilweko ha mina nayweni wa Mosi, ni ka vaprofeti, ni lomu ka Tisimu, ti fanele ku tatiseka. [540]

⁴⁵Zonake i lo vulula a kupima kabye, lezaku kasi va fela ku pima mitsalo; [541]

⁴⁶aku ngalo kabye: Ku tsalilwe lezaku Kristu i ta xaniseka, a tlhela a vuka hi ka vafileko hi siku ga manharu; [542]

⁴⁷ni lezaku a kuhunzuluka ni kutsetselelwa ka zionho ku ta kanetwa vitweni gakwe xikari ka matiko wontihe, ku sangula hi le Jerusalema. [543]

⁴⁸Nwina mu vakustumunyu va timhaka leti. [544]

⁴⁹Langutani, nzi ta mu rumela lexi Dadani a xi tsumbisileko; kanilezi tshamani laha mutini, mu kala mu ambexwa hi ntamu wa le hehla. [545]

⁵⁰Zonake i lo va yisa lahandle ka muti, va kala va chikela laha ku cuwukeneko ni Betania; yena i lo tlakusa mandla yakwe, a va katekisa. [546]

⁵¹Ku te na a ha va katekisa, a su hambana navo, a tlakuselwa le tilweni. [547]

⁵²Vona va lo mu khizamela, va tlhelela Jerusalema na va hi ni kutsaka ka hombe. [548]

⁵³Zonake va suya simamisa tempeleni, na va dumisa Nungungulu. [549]