Read tshwa Luka 3 Bible Online

Luka 3 - tshwa bible

Luka 3

¹Hi lembe ga khume ni ntlhanu ga kufuma ka Tiberiusi Kesari, Pontiu Pilatu na hi mwamangulu le Judia, na Herodi a hi hosi le Galilea, na Filipu nakulobye a hi hosi le tikweni ga Iturea ni le Trakoniti, na Lisania a hi hosi le Abileni,

²laha Anasi na Kayafasi va nga hi vapristi va hombe, a mhaka ya Nungungulu yi lota ka Johani nʼwana Zakaria, le xiwuleni. [65]

³I loya tikweni gontlhe gi renzelekeleko Jordani, na a kanela a kubapatizwa ka kuhunzuluka, kasi vanhu va tsetselelwa zionho; [66]

⁴Kota lezi ku tsalilweko bhukwini ga timhaka ta muprofeti Isaya, aku ngalo: A gezu ga loye a bako hungu xiwuleni, giku: Longiseleni a ndlela ya Hosi, Mahani magonzo ya yona ma lulama. [67]

⁵A minzhelelo yontlhe yi ta seletelwa, Zontlhe zitsunga ni zitsungana zi ta khungumulwa; Laha ku nga ni magombogombo ku tava ndlela yo lulama, Ni tindlela ta magomagoma ti ta ecetelwa;

⁶Zonake a nyama yontlhe yi ta wona a kuhanyisa ka Nungungulu. [68]

⁷Hikwalaho Johani i te ngalo ka zidlemo lezi zi nga huma a ku ya bapatizwa hi yena: Pswalo wa tinyoka, mu lulekilwe hi mani a ku chava a khulo gi tako ke? [69]

⁸Humesani mihanzu yi faneleko kuhunzuluka, mu nga dzuki mu wula timbilwini ta nwina: Hi na Abrahama, a nga dadani wa hina; hakuva nza mu byela, lezaku Nungungulu i na ni ntamu ku vuxela Abrahama a vanana hi maribye laya.

⁹Hambu ni lezi a xihloka xi vekilwe mitswini ya tisinya; a tisinya tontlhe leti ti nga pswaliko mihanzu yi nene ti ta tsemiwa, ti hoxiwa nzilweni. [70]

¹⁰Zonake a vanhu va lo mu wutisa, vaku: Loku zi hi tano, hi yimelwe hi ku maha yini ke? [71]

¹¹I lo hlamula aku ngalo kabye: Loyi a nga ni mabhaji mambiri ngha aha loyi a vumalako, ni loyi a nga ni zakuga, a mahewo Zalezo. [72]

¹²Ku lota ni vahlengisi ku ta bapatizwa, va taku ngalo kakwe: Mugonzisi, hi yimelwe hi ku maha yini?

¹³Aku ka vona: Mu nga hlengisi nchumu hi ku hunza lezi mu layilweko zona.

¹⁴A masochwa kambe ma lo mu wutisa, maku: Na hina, hi yimelwe hi ku maha yini ke? Aku ngalo kabye: Mu nga wutleli munhu nchumu, hambu ni ku kecara munhu hava; eneliswani hi hakhelo ya nwina. [73]

¹⁵Kota lezi a vanhu va nga kari va langutela, va fembela timbilwini tabye ha Johani, lezaku kutani hi yena Kristu;

¹⁶Johani i lo hlamula, aku ngalo ka vona vontlhe: Mina nzi mu bapatiza hi mati; kanilezi wa hata loyi a nga ni ntamu ku nzi hunza, loyi a tingoti ta zilato zakwe nzi nga faneliko ku ti tlhatlha; i ta mu bapatiza hi Moya wa ku Basa ni nzilo. [74]

¹⁷A lihlelo lakwe li lomu canjeni gakwe, kasi ku swiyelisisa a nzhimbo wakwe, ni ku hlengeletela a mavele magombeni yakwe; kanilezi a mungu i ta wu hisa hi nzilo wu nga timekiko. [75]

¹⁸Lezo i lo va khongotela hi timhaka tinwani to tala, na a kanela Ivangeli kabye.

¹⁹Kanilezi hosi Herodi na a kawukilwe hi Johani hi kota ya Herodia, a sati wa nakulobye, ni kota ya kubiha kontlhe loku a ku mahileko, [76]

²⁰i lo engeta ka zontlhe lezo hi ku mu valela Johani paxweni.

²¹Laha vanhu vontlhe va nga bapatizilwe, Jesu kambe i lo bapatizwa. Na a kari a kombela, a tilo gi lo vululeka, [77]

²²ni Moya wa ku Basa wu lo relela hehla kakwe hi dzumba ga tuva, ni gezu gi lo huma hi le tilweni, giku: Wena u Nʼwana wa mina a ranzekako, nzi xalele ha wena.

²³Jesu i wa hi ni 30 wa malembe laha a nga sangula ku gonzisa, na va alakanya lezaku i nʼwana wa Josefa, wa Heli,

²⁴wa Matati, wa Levi, wa Melki, wa Janai, wa Josefa,

²⁵wa Matatiasi, wa Amoni, wa Nahume, wa Esli, wa Nagai,

²⁶wa Maati, wa Matatiasi, wa Semei, wa Joseke, wa Joda,

²⁷wa Joanani, wa Resa, wa Zerubabeli, wa Xealtieli, wa Neri,

²⁸wa Melki, wa Adi, wa Kosamu, wa Elmadamu, wa Eri,

²⁹wa Jesu, wa Eliezeri, wa Jorimu, wa Matate, wa Levi,

³⁰wa Simeoni, wa Judasi, wa Josefa, wa Jonamu, wa Eliakimu,

³¹wa Melea, wa Mena, wa Matata, wa Natani, wa Davida,

³²wa Jese, wa Obedi, wa Boazi, Wa Salmoni, wa Naxoni,

³³wa Aminadaba, wa Admina, wa Ami, wa Hezroni, wa Perezi, Wa Juda,

³⁴wa Jakobe, wa Isaka, wa Abrahama, wa Tera, wa Nahore, [78]

³⁵wa Seruge, wo Rewu, wa Pelegi; wa Eberi, wa Xela,

³⁶wa Kainani, wa Arfaxade, wa Xemu, wa Noa, wa Lameke, [79]

³⁷wa Metusela, wa Enoke, wa Jerede, wa Mahalaleli, wa Kainani,

³⁸wa Enosi, wa Sete, wa Adamu, wa Nungungulu. [80]