Read tshwa Luka 4 Bible Online

Luka 4 - tshwa bible

Luka 4

¹Jesu na a tele hi Moya wa ku Basa, i lo suka Jordani, a yiswa hi Moya le xiwuleni [81]

²na a ringwa hi Satani a 40 wa masiku. I wa nga gangi nchumu ka lawo masiku, kanilezi laha ma nga mbhelile i lozwa ndlala. [82]

³Satani i te ngalo kakwe: Loku u hi Nhwana wa Nungungulu, laya lezaku a ribye legi gi maha xibaba.

⁴Jesu i lo mu hlamula, aku: Ku tsalilwe ku ngalo: A munhu a nga ta hanya hi xibaba xoce. [83]

⁵Zonake Satani i lo mu yisa xitsungeni xo leha, a mu kombisa mifumo yontlhe ya misava hi xikhatanyana,

⁶aku ngalo kakwe: Nzi ta ku nyika wontihe lowu ntamu, ni kungangamela ka matiko lawa; hakuva zi nyikilwe ka mina; nzi zi nyika ka loyi nzi ranzako ku mu nyika zona.

⁷Hikwalaho, loku u nzi khizamela, zontlhe lezi zi tava za wena.

⁸Jesu i lo mu hlamula, aku: Ku tsalilwe ku ngalo: U ta khozela Hosi Nungungulu wa wena, hi yena yece u to mu tirela. [84]

⁹Zonake Satani i lo mu yisa Jerusalema, a mu yimisa xixungweni xa tempeli, aku: Loku u hi Nʼwana wa Nungungulu, ti tsikelete lahasi; [85]

¹⁰Hakuva ku tsalilwe ku ngalo: I ta ruma tingelosi takwe, ti ku hlayisa; [86]

¹¹Ni kambe: Ti ta ku angarela mawokweni ya tona, Kasi u nga gumuli a nkonzo wa wena laha ribyeni.

¹²Jesu i lo mu hlamula, aku: Ku wulilwe ku ngalo, U nga ringi Hosi Nungungulu wa wena. [87]

¹³Laha Satani na a mbhetile minzhingo yontlhe, i lo suka ka yena xikhatanyana, [88]

¹⁴Jesu i lo tlhelela Galilea hi ntamu wa Moya; ni wudumo ga yena gi la su ga fenemete tikweni gontlhe ga leyo. [89]

¹⁵I lo gonzisa masinagogeni yabye, na a dumiswa hi vontlhe.

¹⁶Zonake i lo chikela Nazareta, laha a nga kulela kona, a enghena sinagogeni hi siku ga sabado khwatsi hi mukhuwo wakwe, a yima kasi ku gonza. [90]

¹⁷I lo nyikiwa a bhuku ga muprofeti Isaya; loku a vulule bhuku i lo kuma a wutshamu laha ku nga wa tsalilwe ku ngalo:

¹⁸A Moya wa Hosi wu le hehla ka mina, Hakuva yi nzi totile a kuva nzi kanela a mahungu yo saseka ka lava va vumalako; Yi nzi rumile a kuba hungu hi kutlhatlhiswa ka laʼva bohilweko, Ni kutlheliselwa kuwona ka zikhumu, Ku tlhatlhisa lava va giswako mbhukutsa, [91]

¹⁹Ni ku tlhatlhambutela hi lembe ga tipswalo ta Hosi.

²⁰Zonake i lo vala bhuku, a gi tlhelisela ka nanza, a tshama. Vontlhe lava va nga wa hi sinagogeni va lo mu cuwukisisa.

²¹Yena i lo sangula ko kanela kabye, aku: Inyamutlha lowu mutsalo wu tatisekile tindleveni ta nwina.

²²Vontlhe va lo mu yimela, Va hlamaliswa hi timhaka ta tipswalo ti nga huma nonwini wakwe; vaku ngalo: Loyi a hi yena nʼwana Josefa ke? [92]

²³Aku ngalo kabye: Hakunene mu ta wula ka mina a vingu legi gi nge ngalo: Nʼanga, ti hanyise ha wece; zontlhe lezi hi zi zwileko zi tiriwa le Kapernaume, zi mahe ni laha tikweni ga nwina.

²⁴A engeta aku: Hizinene nziku ka nwina, A ku na muprofeti a amukeliwako tikweni ga le kabye.

²⁵Mina nziku ka nwina: Ku wa hi kona tinoni to tala ka Israeli masikwini ya Elija, laha tilo gi nga wa valilwe a malembe manharu ni ntlhanu wa tihweti hi yinwe, kuva ni ndlala ya hombe tikweni gontlhe; [93]

²⁶kanilezi Elija a nga rumiwangi ni ka munwe wa vona, saseka ka wasati wa noni le Sarepita, le tikweni ga Sidoni.

²⁷Ku wa hi kona vanyingi va hlokonho ka Israeli xikhatini xa muprofeti Elixa: kanilezi ku wa nga basiswangi hambu munwe wa vona, sine Namana wa le Siria. [94]

²⁸Na va zi zwile lezi, vontlhe lava va nga hi lomu sinagogeni va lo tatiswa hi zanga,

²⁹va suka, va mu hlongolela lahandle ka muti, va mu yisa gwitsini ga xitsunga lexi wu akilweko kona a muti wabye, kasi va fela ku mu susumetela lahasi.

³⁰Kanilezi yena i lo tsemakanya xikari kabye, a ti fambela. [95]

³¹I lo relela aya Kapernaume, a muti wa le Galilea, a ya gonzisa vanhu hi siku ga sabado. [96]

³²Va lo hlamala hi kugonzisa kakwe, hakuva a timhaka takwe ti wa hi ni ntamu.

³³Lomo sinagogeni ku wa hi kona a munhu, loyi a nga hi ni moya wa dimoni go biha; yena i lo kanyuluka hi gezu ga hombe, aku: [97]

³⁴Hiye! I mhaka muni hi nga nayo na wena, wena Jesu wa le Nazareta ke? U tele ku ta hi lovisa ke? Nza ku tiva lezaku hi wena mani, u Loyi wa ku Basa wa Nungungulu. [98]

³⁵Jesu i lo mu kawuka, aku: Miyela, u huma ka yena! Laha dimoni na gi mu wisile lahasi xikari kabye, gi lo huma ka yena, na gi nga mu mahangi nchumu.

³⁶Vontlhe va lo rewuka, va wulawula xikari kabye, vaku: I mhaka muni leyi ke? Hakuva hi xikosikosi ni ntamu wa taya a mimoya ya kubiha, yi huma.

³⁷A wudumo gakwe gi lo zwakala wutshanwini gontlhe ga lego tiko. A kuhanyiswa ka mukokati wa Simoni.

³⁸Zonake i lo huma sinagogeni, a ya enghena ndlwini ya Simoni; kanilezi a mukokati wa Simoni i wa babya hi feveri yo biha; ya lo mu khongotela ku mu vuna. [99]

³⁹Jesu i lo korama hehla kakwe; a kawuka feveri; yi lo mu tsika, a suka zalezo, a va tirela.

⁴⁰Loku gi pelile, vontlhe lava va nga babya hi tinghumbe ti tsalangeneko ya lo nehiwa kakwe; yena i lo tlhateka mandla ka munwe ni munwani wa vona, a va hanyisa. [100]

⁴¹Ni madimoni ma lo huma ka vanyingi, na ma kanyuluka, maku: Wena u Nʼwana wa Nungungulu. Kanilezi i lo ma kawuka, a nga ma vumeli ku wulawula, hakuva ma wa zi tiva lezaku hi Kristu. [101]

⁴²Laha gi nga wa cile, i lo huma aya wutshanwini ga xiwula; kanilezi a zidlemo zi lo mu lava, zita ka yena, zi ta mu hungala lezaku kasi a nga suki ka vona.

⁴³Kanilezi yena aku ngalo kabye: Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.

⁴⁴Zonake i lo ya kanela a masinagogeni ya le Galilea.