Read tshwa Luka 7 Bible Online

Luka 7 - tshwa bible

Luka 7

¹Laha na a mbhetile kuwulawula kakwe kontlhe ka vanhu, i loya Kapernaume. [148]

²A nduna ya yimpi yi wa hi ni nanza legi gi nga ranzeka ka yona, kanilezi gi wa babya, gi hi kusuhi ni kufa.

³Laha na yi zwile hi Jesu, yi lo rumela ka yena a masingalakati ya vaJuda, a ku ya mu kombela lezaku ngha a ta hanyisa a nanza ga yona.

⁴Laha na va chikele ka Jesu, va lo mu khongotela nguvu, vaku: Yena i fanele hi ku ngha u mu mahela lezo,

⁵hakuva wa ranza a tiko ga hina; hi yena a nga hi akela a sinagoga ga hina.

⁶Jesu i lo famba navo, kanilezi laha a nga wa hi kusuhani ni yindlu, a nduna yi lo rumela maxaka, ma yaku kakwe: Hosi, u nga ti karati; hakuva a nzi faneli lezaku u enghena ndlwini ya mina.

⁷Hilezo a nzi alakanyangi lezaku nzi fanele a kuta ka wena; kanilezi wula a gezu, ni nanza ga mina gi ta hanyiswa.

⁸Hakuva na mina nzi munhu a fumiwako hi vahombe, na nzi hi ni masochwa ma fumelwako hi mina. Nziku ka ginwe ga wona: Famba, gi famba; ni ka ginwani: Ngone, ata; ni ka xitiri xa mina: Maha lexi, xi xi maha.

⁹Laha Jesu na zi zwile lezi, i lo hlamala ha yena, a hunzuluka, aku ngalo ka xidlemo lexi xi nga mu lanzela: Mina nza wula ka nwina, A nzi kumangi a kukholwa ka hombe ko kota loku, ge hambu ni ka Israeli.

¹⁰Lava va nga rumilwe, na va tlhelile kaya, va lo ya kuma a nanza na gi hanyile.

¹¹Ku te lokuloku anzhako ka lezo, aya mutini wu tibyako Naine; a vapizani vakwe va lo famba naye, zinwe ni xidlemo xa hombe.

¹²Laha a nga kari a tshinela nyangweni ya muti, ku wa rwelwe a mufi, loyi a nga wa hi nisanyana munwe ka nyine wakwe, loyi a nga hi xifurukati; a vanhu vanyingi va muti va wa mu lanzela.

¹³Laha Hosi yi nga mu wona, yi lo mu zwela wusiwana, yiku ngalo ka yena: U nga rili!

¹⁴Jesu i lo tshinela, a khumba lihlaka, ni lava va nga mu rwala va lo yima. Aku ngalo: Jaha, nziku ka wena, Vuka! [149]

¹⁵Ni loyi a nga wa file i lo vuka, a sangula ku wulawula. Jesu i lo mu nyikela ka nyine wakwe.

¹⁶Vanhu vontlhe va lo chava, va dumisa Nungungulu, vaku: Ku humele muprofeti wa hombe xikari ka hina; niku: Nungungulu i enzele a vanhu vakwe. [150]

¹⁷Ni mhaka leyi yi lo zwakala le Judia gontlhe ni matikweni wontihe ya leyo. Johani Mubapatizi a ruma vapizani ka Jesu.

¹⁸A vapizani va Johani va lo mu byela tontlhe leti timhaka. [151]

¹⁹Zonake Johani i lo vitana vambiri va vapizani vakwe, a va ruma ka Hosi, aku: Hi wena loyi a tako ke, kutani ha ha langutela munwani?

²⁰Laha a vavanuna va nga tile kakwe, va te ngalo: Johani Mubapatizi i hi rumile ka wena, aku; Hi wena loyi a tako ke, kutani ha ha langutela munwani?

²¹Hi lexo xikhati Jesu i wa hanyisa vanyingi a tinghumbeni tabye, ni mitungu, ni ku hlongola mimoya ya kubiha, a tlhelisela kuwona ka vanyingi va nga hi zikhumu.

²²I lo hlamula, aku ngalo kabye: Fambani, mu ya byela Johani lezi mu zi wonileko ni lezi mu zi zwileko: a zikhumu zi tlheliselwa kuwona, a zilema za famba, a vahlokonho va hlaziwa, ni ziwiri zazwa, a vafileko va vuxiwa, ni zisiwana zi kanelelwa a mahungu yo saseka. [152]

²³I katekile loyi a nga khunguvanyekiko hi kota ya mina.

²⁴Laha a mitsumi ya Johani yi nga wa sukile, Jesu i lo sangula ku wulawula ha yena ka zidlemo, aku: Mu lo huma muya xiwuleni a ku ya wona yini? A lihlanga li tsekatsekiswako hi moya ke?

²⁵Kutani mu waya a ku ya wona yini? A munhu a nga ambele a tinguwo to saseka ke? Langutani, lava va ambeleko a tinguwo ta makanye-kanye, ni ku hanya hi ku mbyambyela, va lomu ziluvelweni za tihosi.

²⁶Kanilezi mu lo huma a ku ya wona yini ke? A muprofeti ke? Ina, nziku ka nwina, ni ku hunza nguvu a muprofeti.

²⁷Hi yena loyi ku tsalilweko ha yena ku ngalo: Languta, nza ruma a ntsumi wa mina mahlweni ka wena, Wu ta longisela a ndlela ya wena mahlweni ka wena. [153]

²⁸Mina nziku ka nwina: Xikari ka vona lava va belekilweko hi vavasati a nga kona wa hombe a ku hunza Johani; kanilezi loyi a nga tsongwanyani mufunweni wa Nungungulu ngwa hombe ku hunza yena.

²⁹A vanhu vontlhe ni vahlengisi na va zi zwile, va lo vumela lezaku Nungungulu i longamile, hakuva va wa bapatizilwe hi kubapatiza ka Johani. [154]

³⁰Kanilezi a vaFarisi ni vagonzisi va nayo na va nga bapatizwangi hi yena, va lo nyenya a kungo ga Nungungulu. [155]

³¹Jesu i lo engeta aku: Xana nzi ta va fananisa ni yini a vanhu va lexi xizukulwana, va fanana ni yini ke? [156]

³²Va fanana ni vanana va tshamileko wutshanwini go xavisa, va vitananako, vaku: Hi mu bele tinanga, kanilezi a mu kinangi; Hi hlalukile, kanilezi a mu rilangi.

³³Hakuva Johani Mubapatizi i tile na a ngagi zibaba, a nganwi vinya; nwina muku: I na ni dimoni. [157]

³⁴A Nʼwana wa munhu i tile, na aga, anwa; nwina muku: Langutani a munhu wa kulonzola, xidakwa, munghana wa vahlengisi ni vaonhi! [158]

³⁵A zinene za wutlhari zi kombisilweko hi vanana vontlhe va gona.

³⁶A munwe wa vaFarisi i lo mu ramba lezaku a yaga naye; Jesu i lo enghena ndlwini ya muFarisi, a tshama kugeni. [159]

³⁷Laha mutini ku wa hi kona a wasati loyi a nga hi muonhi; loku a zi tivile lezaku Jesu i tshamile kugeni lomu ndlwini ya muFarisi, i lo neha a xikhudzana xa alabasteri xi nga hi ni mafura yo nuhela,

³⁸a yima hi lenzhako mikonzweni yakwe, na a rila; i lo sangula ku tsakamisa a mikonzo ya Jesu hi mihloti yakwe, a yi hlanguta hi misisi ya hloko yakwe; i lo pswopswa mikonzo yakwe, a yi tota hi mafura.

³⁹Laha a nga zi wonile a muFarisi loyi a mu rambileko, i lo wulawula mbilwini yakwe, aku: Loku munhu loyi a wa hi muprofeti, ngha a mu tivile loyi wasati a mu khumbako lezaku hi mani, niku, ngwasati wa ku yini, lezaku muonhi. [160]

⁴⁰Jesu i lo mu hlamula, aku: Simoni, Nzi na ni mhaka a ku wula ka wena. Yena aku: Wula Mugonzisi.

⁴¹Jesu aku: Ku wa hi kona a vanhu vambiri va nga hi ni nanzu ka mupembisi wo kari. Munwe i wa hi ni nanzu wa 500 wa macheleni, ni munwani wa 50.

⁴²Laha va nga vumala a za ku riha ha zona, yena i lo va tsetselela hi wumbiri gabye. Makunu hi wihi wa vona a ta nga mu ranza nguvu.

⁴³Simoni i lo hlamula, aku ngalo: Nza alakanya nziku hi loyi a nga tsetselelwa nguvu. Jesu aku kakwe: U wula zona.

⁴⁴Na a hunzulukela ka wasati, i te ngalo ka Simoni: Wa mu wona loyi wasati ke? Nzi enghenile ndlwini ya wena, a ku nzi nyikangi a mati nzi hlamba mikonzo; kanilezi yena i tsakamisile mikonzo ya mina hi mihloti, a yi kulula hi misisi yakwe.

⁴⁵Wena a ku nzi pswopswangi, kanilezi yena, cima nzi enghena a nga tsikangi ku pswopswa mikonzo ya mina.

⁴⁶Wena a ku totangi a hloko ya mina hi mafura; kanilezi yena i totile mikonzo ya mina hi mafura yo nuhela. [161]

⁴⁷Hikwalaho nziku ka wena: A zionho zakwe leʼzinyingi, zi tsetselelwe, hakuva i ranzile nguvu; kanilezi loyi a tsetselelako a zitsongwani, i ranza kutsongwani. [162]

⁴⁸Aku ngalo ka wasati: A zionho za wena zi tsetselelwe. [163]

⁴⁹Lava va nga wa tshamile kugeni zinwe naye, va lo sangula ku wulawula timbilwini tabye, vaku: Himani loyi a tsetselelako ni zionho ke?

⁵⁰Yena aku ka wasati: A kukholwa ka wena ku ku hanyisile; famba hi kurula. [164]