Read tshwa Deuteronome 10 Bible Online

Deuteronome 10 - tshwa bible

Deuteronome 10

¹A ka xikhati lexo Jehova i te ngalo ka mina: Vatla timbila timbiri ta maribye, to kota leʼto ranga, u kanziha uta ka mina le xitsungeni; u vatla ni nghaxa ya sinya.

²Nzi ta tsala lomo ka timbila leti a timhaka leti ti nga wa hi lomu ka leti to ranga leti u ti layileko, kasi u fela ku ti veka lomu ka nghaxa. [40]

³Zinghaho nzi lo maha a nghaxa hi sinya ya munga, nzi lo vatla timbila timbiri ta maribye to fanana ni leti to sangula, zonake nzi lo kanziha xitsungeni na nzi hi ni timbila timbiri mandleni ya mina.

⁴Na Jehova i lo tsala lomo ka timbila lezi a nga wa tsalile ka leti to sangula, khume ga milayo leyi a nga wa yi wulawulile le xitsungeni, na a hi lomu nzilweni hi siku ga tlhangano; zonake Jehova i lo nzi nyika tona.

⁵Nzi lo tlhela nzi relela hi le xitsungeni, nzi ya veka a timbila lomu ka nghaxa leyi nzi nga wa yi mahile, ta ha tshamile kona khwatsi hi lezi Jehova a nzi leleteleko.

⁶Zonake a vanana va ka Israeli va lo suka le hlobyeni ya vanana va ka Jakani vaya le Mosera. Na Aroni i lofa laho a kelelwa laho; zonake Eliazare a nʼwana wakwe i lo tira wupristi wutshanwini ga raru wakwe.

⁷Va lo suka laho vaya Gudgoda, zonake va lo suka Gudgoda vaya le Jotbatha, a tiko ga micongo.

⁸Ka lexo xikhati Jehova i lo hlawula a nyangwa ya vaLevi kasi va fela ku rwala a nghaxa ya xivumelwano xa Jehova, ni ku yima mahlweni ka Jehova, ni ku mu khozela, ni ku katekisa vanhu hi vito gakwe, kala ka siku ga nyamutlha.

⁹Hikwalaho a vaLevi a va na ku avelwa tshomba zinwe ni vamakabye vabye. Tshomba yabye hi Jehova, khwatsi hi lezi Jehova Nungungulu wa wena a mu byelileko. [41]

¹⁰Mina nzi lo tshama xitsungeni 40 wa masiku ni 40 wa wusiku, khwatsi hi kusanguleni. Na Jehova i lo nzi ingisa kambe ka lexo xikhati; Jehova a nga mu lovisangi.

¹¹Na Jehova i te ngalo ka mina: Suka u famba, u ya rangela a vanhu, va ya enghena va teka a tiko legi nzi nga hlambanya ka vararu vabye ku va nyika.

¹²Makunu-ke Israeli, Jehova Nungungulu wa wena i lava yini ka wena ke? A hi lezaku u mu chava Jehova Nungungulu wa wena, u famba hi tontlhe tindlela takwe, u mu ranza, u tirela Jehova Nungungulu wa wena hi mbilu yontlhe ya wena, ni muhefemulo wontihe wa wena;

¹³na u kari u hlayisa milayo ya Jehova ni zileletelo zakwe, lezi nzi ku leletelako zona nyamutlha, kasi u fela ku tshameka ke?

¹⁴Wa wona! a matilo, ni matilo ya matilo, nja Jehova Nungungulu wa nwina, zinwe ni misava ni zontlhe zi nga ka yona.

¹⁵Kanilezi Jehova i wa tangaliswa hi vararu va nwina, a va ranza; a kala a hlawula a vana vabye anzhako ka vona, a mu hlawula nwina xikari ka matiko wontihe, khwatsi hi lezi mu zi wonako inyamutlha.

¹⁶Enghenisani wukwera a timbilu ta nwina, mu nga nonohisi tinhamu ta nwina;

¹⁷hakuva Jehova Nungungulu wa nwina i Nungungulu wa vanungungulu, ni Hosi ya tihosi, i Nungungulu wa hombe, wa mintamu, ni loyi a chavekako, loyi a nga hlawuliko a nghohe ya munhu, loyi a nga amukeliko ku rengelelwa; [42]

¹⁸loyi a yimelako zisiwana ni tinoni kulamuleni; loyi a ranzako valuveli, a va nyika kuga ni kuambala.

¹⁹Hikwalaho ranzani valuveli, hakuva nwinawu mu wa hi valuveli le tikweni ga Gipite.

²⁰Chava Jehova Nungungulu wa wena, u mu khozela, u namarela kakwe, u hlambanya hi vito gakwe.

²¹Hi yena a wudzunzo ga wena, hi yena Nungungulu wa wena, loye a ku maheleko a zilo za hombe lezi zi chavisekako, lezi u zi wonileko hi mahlo ya wena.

²²Vararu va wena va relele vaya Gipite na va hi 70, makunu lezi Jehova Nungungulu wa wena i ku anzisile khwatsi hi tinyeleti ta tilo. [43]