Read tshwa Deuteronome 11 Bible Online

Deuteronome 11 - tshwa bible

Deuteronome 11

¹U ta ranza Jehova Nungungulu wa wena, u hlayisa lezi a zi wulileko ka wena, u hlayisa xontlhe xikhati a ziyimiso zakwe, ni zileletelo zakwe, ni milayo yakwe.

²Tivani inyamutlha (hakuva a nzi wulawuli ni vanana va nwina lava va nga tiviko ni lava va nga wonangiko kutsayisa ka Jehova Nungungulu wa nwina), pimani khwatsi wukulu gakwe, ni canja gakwe ga ntamu, ni woko gakwe gi nawulutilweko,

³ni zihlamaliso zakwe, ni mitiro yakwe lezi a zi mahileko xikari ka vaGipite, ni ka Faro a hosi ya le Gipite, ni ka tiko gakwe gontlhe;

⁴ni lezi a zi mahileko ka yimpi ya vaGipite, ni mahaxi yabye, ni tikareta tabye, lezi a nga kukumukisa mati ya Bimbi go Pswhuka hehla kabye, laha va nga wa mu hlongolisa, zonake Jehova a va lovisa kala inyamutlha;

⁵ni lezi a mu maheleko xiwuleni mu kala mu chikela ka legi wutshamu;

⁶ni lezi a zi mahileko ka Datani na Abiramu, a vana va Eliabe, a nʼwana Rubeni, laha misava yi nga ahlama a nomu wa yona yi va mita ni mingango yabye, ni matenda yabye, ni zontlhe lezi zi va lanzeleko xikari ka vaIsraeli vontlhe. [44]

⁷Hilezo a mahlo ya nwina ma wonile mitiro yontlhe ya hombe leyi Jehova a yi tirileko.

⁸Hikwalaho mu ta hlayisa milayo yontlhe leyi nzi mu leletelako inyamutlha, kasi ma fela kuva ni ntamu, mu ta zi kota ku enghena mu teka a tiko legi mu tlhatukako ku ya gi fumela,

⁹kasi ma fela ku anziselwa masiku ya nwina lomu ka misava leyi Jehova a hlambanyileko ka vararu va nwina a ku va nyika vona ni vazukulu vabye, a misava leyi yi khulungako a masi ni wulombe.

¹⁰Hakuva a tiko legi u yako ka gona ku ya gi fumela, a gi fanani ni tiko ga le Gipite le mu humako ha kona, laha u nga wa byala a mbewu ya wena, u cheletela mati hi nkonzo wa wena, khwatsi hi xizunze.

¹¹Kanilezi a tiko legi mu ta nga tlhatuka muya ka gona, i tiko ga zitsunga ni minzhelelo, legi gi nwako a mati ya vula ya le tilweni.

¹²I tiko legi gi hlayiswako hi Jehova Nungungulu wa wena; ni mahlo ya Jehova Nungungulu wa nwina ma tshama ma gi cuwukela kusukela kusanguleni ka lembe kala magumeso ka lembe.

¹³Loku nwina mu ingisa khwatsi a milayo ya mina leyi nzi mu leletelako inyamutlha, mu ranza Jehova Nungungulu wa nwina, mu mu khozela hi timbilu tontlhe ta nwina, ni mihefemulo yontlhe ya nwina,

¹⁴nzi ta nyika a vula ka tiko ga nwina hi tinguva ta kona, a vula ya tsangela nguva, ni vula yo gumesa; u ta hula a mbewu ya wena, ni vinya ga wena, ni mafura ya wena. [45]

¹⁵Nzi ta milisa a byanyi ga zifuyo za wena lomu makhwatini ya wena, na wena u taga u xura.

¹⁶Ti woneleni lomu timbilwini ta nwina, mu nga dzuka mu ringiwa, zonake mu hambuka, mu ya tirela vanwani vanungungulu, mu khizama mahlweni ka vona.

¹⁷Ni zanga ya Jehova yi ta vura hehla ka nwina, a vala tilo kasi a vula yi ngani, zonake a misava ya nwina yi nga ha pswali nchumu, na nwina mu ta hatlisa kufa lomu ka misava leyi yo saseka leyi Jehova a mu nyikileko.

¹⁸Hikwalaho enghenisani timhaka leti nzi mu byelako tona lomu timbilwini ta nwina ni lomu mihefemulweni ya nwina; mu ti boha lomu mawokweni ya nwina ti maha xialakanyiso xa nwina, ni xikombiso xikari ka zimombo za nwina;

¹⁹mu ta ti gonzisa ka vanana va nwina, mu wulawula ha tona lomu tindlwini ta nwina, ni lomu kufambeni ka nwina, ni lomu kuetleleni ka nwina, ni lomu kuvukeni ka nwina;

²⁰u ta ti tsala lomu tinyangweni ta wena, ni lomu timhanzeni ta yindlu ya wena,

²¹kasi a masiku ya nwina ni masiku ya vanana va nwina ma anza lomu tikweni legi Jehova a hlambanyileko ka vararu va nwina ku mu nyika gona ma ku khwatsi hi masiku ya tilo hehla ka misava.

²²Hakuva loku mu hlayisa khwatsi yontlhe milayo leyi nzi mu leletelako yona mu famba ha yona; mu ranza Jehova Nungungulu wa nwina, mu famba hi tontlhe tindlela takwe, na mu namerele ka yena,

²³zonake Jehova i ta hlongola matiko lawo wontihe mahlweni ka nwina, na nwina mu ta hlula matiko lawo ma mu hunzako hi wukulu ni ntamu.

²⁴A wutshamu gontlhe legi a mikonzo ya nwina yi ta nga kanzihela, gi tava ga nwina; a mbhingano wa nwina wu ta sukela le xiwuleni kala le Lebanoni, ni ku sukela Congweni, wona congo wa Eufrate, kala le Bimbini ga Mupela-gambo. [46]

²⁵Cima ku nga tava kona munhu a ta nga tiya mahlweni ka nwina; na Jehova Nungungulu wa nwina i ta chela kuchava ni kururumela kontlhe lomu mu ta nga famba ha kona, khwatsi hi lezi a mu byelileko.

²⁶Languta, nza veka inyamutlha a xikatekiso ni nzhukano mahlweni ka nwina.

²⁷A xikatekiso loku nwina mu ingisa a milayo ya Jehova Nungungulu wa nwina leyi nzi mu leletelako inyamutlha.

²⁸Ni nzhukano loku mu nga ingisi a milayo ya Jehova Nungungulu wa nwina, ni loku mu hambuka ka ndlela leyi nzi mu leletelako inyamutlha, mu lanzela vanwani vanungungulu lava mu nga va tiviko.

²⁹Ni laha Jehova Nungungulu wa wena a ta nga ku chiketa ka tiko legi u yako ku ya gi fumela, u ta ya wula zikatekiso hehla ka xitsunga xa Gerezima, ni nzhukano hehla ka xitsunga xa Ebale.

³⁰A zitsunga lezo zi le tlhatukweni wa Jordani, hi le nzhako ka ndlela ya Mupela-gambo, le tikweni ga vaKanani lava va akileko le minzhelelweni ku cuwukeneko ni Gilgale, kusuhani ni mikuhlu ya le More.

³¹Hakuva mu ta tlhatuka Jordani mu ya teka a tiko legi Jehova Nungungulu wa nwina a mu nyikileko ku gi fumela, ni ku aka ka gona.

³²Mu ta chivirika ku hlayisa milayo yontlhe ni zontlhe zileletelo lezi nzi vekileko mahlweni ka nwina inyamutlha.