Read tshwa Deuteronome 13 Bible Online

Deuteronome 13 - tshwa bible

Deuteronome 13

¹Loku ku vumbuluka muprofeti kutani mulori ka nwina, a vumba ni ku kombisa zihlamaliso ni zirewukiso,

²ni loku ku humelela a xikombiso ni xihlamaliso lexi a xi wulileko, aku ngalo: A hi lanzeleni vanwani vanungungulu lava u nga va tiviko, hi va khozela:

³u nga ingisi timhaka ta muprofeti loye ni mulori loye, hakuva Jehova Nungungulu wa nwina hi yena a mu ringako, kasi ku tiva lezaku xana ma ranza Jehova Nungungulu wa nwina hi timbilu tontlhe ta nwina ni mihefemulo yontlhe ya nwina.

⁴Nwina mu ta lanzela Jehova Nungungulu wa nwina; mu nyika xichawo ka yena mu hlayisa milayo yakwe, mu ingisa a gezu gakwe; mu mu khozela, ni ku namarela ka yena.

⁵A muprofeti loye, kutani mulori loye, i ta dawa; hakuva i kucetele vanhu ku hluwuka ka Jehova Nungungulu wa nwina, loyi a mu humesileko tikweni ga le Gipite, a mu tlhatlhisa ndlwini ya wukhumbi; a lava ku mu hambukisa ndleleni ya Jehova Nungungulu wa nwina, leyi a mu leleteleko ku famba ha yona. Hikwalaho mu ta susa lezi zo biha xikari ka nwina.

⁶Loku makabye wa wena, loyi a nga nʼwana wa mamani wa wena, kutani i nʼwana wa wena wa mufana, kutani i nhanyana wa wena, kutani i sati wa mbilu ya wena, kutani i nakuloni loyi u mu ranzako hi mbilu yontlhe ya wena, a ku kucetela hi le xihundleni, aku: A hi fambe hi ya khozela vanwani vanungungulu lava wena ni vararu va wena mu nga va tivangiko,

⁷a vanungungulu va vanhu lava va mu ranzeleko, lava va nga kusuhani na nwina hambu lava va nga kule na nwina, kusukela magemetamusi ya misava kala manwani magemetamusi,

⁸u nga vumeli, hambu ni ku mu ingisa, ni kambe u nga mu tsetsi hambu ni ku mu zwela wusiwana, hambu ni ku mu fihla.

⁹Kanilezi u ta mu daya futsi; ni canja ga wena gi ta sangula ku mu gandla, zonake mawoko ya vontlhe vanhu va ta lanzela.

¹⁰U ta mu gandla hi maribye kala afa; hakuva yena i wa lava ku ku kokela kule na Jehova Nungungulu wa wena, loyi a ku humesileko tikweni ga le Gipite, ni le ndlwini ya wukhumbi.

¹¹Vontlhe va ka Israeli va ta zizwa, va chava, kasi va nga ha engeti kambe va maha zo biha zo kota lezo xikari ka nwina.

¹²Loku uzwa timhaka ta wunwe wa miti leyi Jehova Nungungulu wa wena a ku nyikileko ku aka ka yona, taku ngalo:

¹³A tlawa wo kari wa vanhu va hava wu humile lomu xikari ka nwina, va hambukisile a vanhu va muti wabye, vaku: A hi fambeni hi ya khozela vanwani vanungungulu lava mu nga va tiviko;

¹⁴u ta hlolisisa mhaka leyo, u wutisisa khwatsi. Ni loku zi hi zinene, na zi tiyile lezaku a kubiha loko ku mahilwe xikari ka wena;

¹⁵zonake u ta daya vontlhe vanhu va muti lowo, u wu hahlula ni zontlhe lezi zi nga ka wona, u daya ni zifuyo zabye hi tlhari.

¹⁶U ta tsombanyisa yontlhe a tshomba ya muti lowo laha phangweni ga muti, zonake u hisa zontlhe hi kota ya Jehova Nungungulu wa wena, a muti ni yontlhe a tshomba ya wona, ku tava rumbi laho; ku nga ha akiwi kambe.

¹⁷Ku nga namarelani xilo xinwe xa lezo zo yila mandleni ya wena; kasi Jehova a fela ku bohla zangeni yakwe, a ku zwela wusiwana, a ku mahela wuxinji, zonake a ku enzelekisa khwatsi hi lezi a hlambanyileko ka vararu va wena,

¹⁸laha u ta nga ingisa a gezu ga Jehova Nungungulu wa wena, u hlayisa yontlhe milayo yakwe leyi nzi ku leletelako inyamutlha, u maha kululama mahlweni ka Jehova Nungungulu wa wena.