Read tshwa Deuteronome 15 Bible Online

Deuteronome 15 - tshwa bible

Deuteronome 15

¹A lembe ga wuntlhanu ni mambiri gi tava lembe go tlhatlheka. [52]

²A tirela ga lembe go tlhatlheka hi legi: Vontlhe lava va pembisileko ka vamakabye vabye, va ta va tlhatlhisa ka milanzu leyo. Cima va nga ta va lonza kambe, hakuva kutlhatlhisa ku bikilwe hi vito ga Jehova; hikwalaho u nga ha mu lonzi kambe muakelane wa wena ni makabye wa wena.

³Wa zi kota ku lonza wamatiko, kanilezi lezi zi pembilweko hi makabye wa wena u ta zi tlhatlhisa.

⁴Na zona ku nga ta kuva ni xisiwana ka va ka nwina, hakuva Jehova i ta ku katekisa hi zinene a tikweni legi Jehova Nungungulu wa wena a ku nyikileko ku ya gi fumela, ni kuva tshomba ya wena;

⁵loku wa nga ingisa a gezu ga Jehova Nungungulu wa wena, u chela kota hi ku maha yontlhe milayo leyi nzi ku leletelako yona inyamutlha.

⁶Jehova Nungungulu wa wena i ta ku katekisa kota lezi a ku tsumbisileko; wena u ta pemba mali ka matiko ya ku tala, kanilezi wena cima u nga ta pembiwa nchumu; wena u ta fumela matiko ya ku tala, kanilezi wona ma nga ta ku fumela.

⁷Loku ku ngha ku hi kona a munwe wa vamakabye va wena a vumalako ka wunwani muti wa wena ka tiko legi Jehova Nungungulu wa wena a ku nyikileko, u nga nonohisi a mbilu ya wena, hambu ni ku vala a canja ga wena ka makabye wa wena a vumalako,

⁸kanilezi u ta tshambuluta a canja ga wena, u mu cenekisa lezi zi mu ringanako ka zontlhe lezi a zi vumalako. [53]

⁹Ti wonele lezaku lomu mbilwini ya wena ku ngave na maalakanyo ya kubiha, u sangula ku ngalo: A lembe ga wu 7, a lembe ga kutlhatlhisa gi tshinele, zonake u sangula ku wona makabye wa wena hi tihlo ga kubiha, u nga ha mu nyiki nchumu; tivake lezaku yena wa rila ha wena ka Jehova, na wena u ta kuma nanzu.

¹⁰Mu nyike hi matsenya, ni loku u mu nyikile, a mbilu ya wena yi nga kanakani; hakuva hi kota ya lezo u mahileko, Jehova Nungungulu wa wena i ta ku katekisa ka yontlhe mitiro ya wena ni ka zontlhe lezi u zi mahako. [54]

¹¹Hakuva a xisiwana cima xi nga ta vumaleka lomu tikweni; hikwalaho nzi ku nyika lowu nayo inyamutlha, nziku: U ta vulula a canja ga wena lomu tikweni ka makabye wa wena wa xisiwana, ni muvumali loyi a nga lomu tikweni ga wena. [55]

¹²Loku makabye wa wena wa xinuna kutani wa xisati xikari ka vaHeberu a ti xavisile ka wena, yena i ta ku tirela ntlhanu wa malembe ni ginwe; zonake hi lembe ga wu 7 u ta mu tsika a huma lomu ndlwini ka wena, hakuva i tlhatlhekile.

¹³Ni loku a huma ka wena na u mu tlhatlhile, u nga mu fambisi kabye na a nga welelangi nchumu.

¹⁴U ta mu nyika xinwani xilo xa lomu ka zifuyo za wena lezi za zitsongwani ni za le ka nzhimbo wa wena wa kuhula, ni za le xigowolweni xa wena, u pambula ka lezi Jehova Nungungulu wa wena a ku katekisileko ha zona, u mu nyika.

¹⁵U ta alakanya lezaku na wenawu u wa hi khumbi le Gipite; ni lezaku Jehova Nungungulu wa wena i ku tlhatlhisile; hi kota ya lezo nza ku nyika lowu nayo inyamutlha.

¹⁶Ni loku a nanza ga wena gi ku ngalo ka wena: Mina nzi nga ta huma laha ka wena, hi kota ya kuva a ku ranzako wena ni ngango wa wena, hilezi i tshamekile khwatsi laho ka wena,

¹⁷zonake u ta teka litlhawo u bhoxa a ndleve yakwe laha nyangweni; zonake i ta kuva nanza ga wena kala kupinzuka; u ta maha zalezo kambe ka nanza ga wena ga xisati.

¹⁸Ngha xi nga mahi a xilo xo binza ka wena hi ku mu tsika a huma ka wena na a tlhatlhekile, hakuva i ku tirele ntlhanu wa malembe ni ginwe, i ku bhinzulela hi zitiri zimbiri; na Jehova Nungungulu wa wena i ta ku katekisa ka zontlhe lezi u ta nga zi maha.

¹⁹Wontihe matewula ya xinuna ya zifuyo lezi za hombe ni lezi za zitsongwani, u ta ma basisela Jehova Nungungulu wa wena. U nga dzuki u tirisa matewula ya zifuyo za wena lezi za hombe hambu ni ku kaya matewula ya zifuyo za wena lezi za zitsongwani. [56]

²⁰Wena u ta yaga wona zinwe ni ngango wa wena lembe ni lembe mahlweni ka Jehova Nungungulu wa wena ka wutshamu lego Jehova a ta nga gi hlawula.

²¹Ni loku a xifuyo xi lamele, kutani na xi khwita, kutani na xi file mahlo, kutani na xi ni wulema ginwani ga hombe, u nga xi nyikeli ka Jehova Nungungulu wa wena laha maganzelweni. [57]

²²A zo maha lezo u taga laha ngangweni wa wena; loyi a nga hlazekangiko ni loyi a hlazekileko va taga vontlhe khwatsi hi loku na vaga a mhuti ni hlangu.

²³Ntsena lezaku u ngagi a nkhata wa zona; u ta wu halata lahasi kota mati.