Read tshwa Deuteronome 18 Bible Online

Deuteronome 18 - tshwa bible

Deuteronome 18

¹Vapristi ni vaLevi ni vontlhe va nyangwa ya ka Levi, va nga ta kuva na tshomba zinwe ni va ka Israeli; vona va ta kuma kuga kabye lomu ka miphahlo leyi yi hiselwako Jehova ni lezi zi nga tshomba yakwe. [63]

²Cima va nga ta kuva na tshomba xikari ka vamakabye vabye; a tshomba yabye hi Jehova, kota lezi a wulileko ka vona.

³Lezi zi fanelako vapristi, hi lezi zi humako ka vanhu lava va nyikelako miphahlo, hambu loku yi hi homu, kutani i yivu; a mupristi va ta mu nyika a woko ni tihlaya, ni khwiri.

⁴Ni kambe u ta mu nyika a mihanzu yo ranga ya mavele ya wena, ni ya vinya ga wena, ni ya mafura ya wena, ni woya go ranga ga tiyivu ta wena;

⁵hakuva Jehova Nungungulu wa wena i mu hlawulile xikari ka tinyangwa tontlhe ta wena a ku yima mahlweni kakwe ni ku tira a ntiro wa ku khozela hi vito ga Jehova, yena zinwe ni vana vakwe kala kupinzuka.

⁶Loku a muLevi a suka ka muti wo kari lomu a tshamako ka wona lomu ka Israeli, loku a zi ranza i ta vumelwa a kuya wutshanwini lego Jehova a ta nga gi hlawula.

⁷Yena i ta tira a ntiro wa ku khozela vitweni ga Jehova Nungungulu wa wena, khwatsi hi vamakabye vakwe vontlhe va vaLevi, lava va yimako mahlweni ka Jehova.

⁸I taga lezi zi ringanako vona, ahandle ka lezi zi tako hi le ka tshomba ya raru wakwe.

⁹Laha u ta nga chikela ka tiko lego Jehova Nungungulu wa wena a ku nyikileko gona, u nga gonzi mikhuwo yo biha ya matiko lawo. [64]

¹⁰Ngha ku nga kumiwi ni munhu munwe ka wena loyi a nyikelako nʼwana wakwe kutani nhanyana wakwe laha nzilweni, ni loyi a tirako wutumbe, kutani mungoma, ni mulori,

¹¹ni noyi, ni loyi a fembako, ni loyi a vumbako, ni loyi a wutisako tinguluve.

¹²Hakuva kani hi wihi a mahako lezi zilo, xinyenyeko ka. Jehova, hakuva Jehova Nungungulu wa wena i hlongole matiko lawo hi kota ya kona kubiha loku.

¹³Wena u ta mbhelela mahlweni ka Jehova Nungungulu wa wena.

¹⁴Hi lezi a matiko lawo u ta nga ma hlongola, ma ingisa vangoma ni zitumbe, kanilezi Jehova Nungungulu wa wena a nga vumeli wena a ku maha lezo.

¹⁵Jehova Nungungulu wa wena i ta ku vuxela muprofeti wo kota mina xikari ka vamakabye va wena, loyi mu ta mu ingisa. [65]

¹⁶Ku ta maheka khwatsi hi lezi u kombeleko ka Jehova Nungungulu wa wena le Horebe, a siku lego ga mutlhangano, u ngaku ngalo: Ngha mina nzi nga hazwi kambe a gezu ga Jehova Nungungulu wa mina, ni lezaku nzi nga ha woni kambe a nzilo wa hombe, nzi ngafa.

¹⁷Jehova i te ngalo ka mina: Va wula zona.

¹⁸Nzi ta va vuxela muprofeti wo kota wena xikari ka vamakabye vabye, nzi ta enghenisa timhaka ta mina nonwini wakwe, zonake yena i ta va byela zontlhe lezi nzi ta nga mu leletela zona.

¹⁹Loku munhu a nga ingisi timhaka ta mina leti muprofeti a ta nga wula vitweni ga mina, mina nzi ta mu maha a ti hlamulela.

²⁰Kanilezi a muprofeti loye a ta nga ti kukumukisa hi ku wulawula hi vito ga mina, a timhaka leti nzi nga mu leletelangiko ku ti wulawula, ni loku a wulawula hi mavito ya vanwani vanungungulu, a muprofeti loye i tafa.

²¹Kambe loku u wula mbilwini ya wena ku ngalo: Hi ta yi tivisa kuyini a mhaka leyi yi nga wulwangiko hi Jehova ke?

²²Tiva lezaku loku muprofeti a wulawula hi vito ga Jehova, zonake a mhaka leyi yi nga humeleli, leyi hi yona a mhaka yi nga wulwangiko hi Jehova; a muprofeti i wulawulile hi matshanza yakwe; u nga mu chavi. [66]