Read tshwa Deuteronome 22 Bible Online

Deuteronome 22 - tshwa bible

Deuteronome 22

¹Loku u wona a homu ya nakuloni kutani i yivu yakwe na yi lahlekile, u nga yi tsiki; kanilezi yi helekete ka nakuloni. [75]

²Loku a nakuloni a nga akangi kusuhani na wena, na u nga mu tivi, u ta hlayisa xifuyo laha mutini wa wena; xi ta tshama ka wena kala a famba a xi lava, hi kona u ta nga ta mu nyika xifuyo xakwe.

³U ta maha zalezo hi mbongola yakwe, ni nguwo yakwe, ni zinwani zilo lezi makabye wa wena a zi lahlileko, loku u zi kuma u nga zi tsiki.

⁴Loku u wona a mbongola ya makabye wa wena, kutani i homu yakwe na yi wile laha ndleleni u nga yi tsiki; mu vune ku yi vuxa. [76]

⁵A wasati ngha a nga ambali a nguwo ya wanuna, ni wanuna ngha a nga ambali a nguwo ya wasati; hakuva loyi a mahako lezo xinyenyeko ka Jehova Nungungulu wa wena.

⁶Loku u wona xisaka xa xinyanyani laha ndleleni na xi hi le hehla ka sinya, kutani xi hi lahasi, na xi hi ni mavinyani, kutani i manza, na nyine wa kona na fukamela mavinyani, kutani manza, u nga teki mavinyani ni nyine wa kona;

⁷kanilezi u ta tsika a nyine wa kona a ti purumela u teka mavinyani ya kona, kasi ku fela ku maha khwatsi ka wena, ni lezaku kasi masiku ya wena ma fela ku anza.

⁸Loku u aka yindlu ya yiswa u ta yi bhiyela langwa la kona, kasi u nga ti vekeli a nkhata lomu ndlwini ya wena, loku afa munhu hi kuwa lahasi.

⁹U nga byali tixaka timbiri ta timbewu lomu xivineni xa wena, u nga dzuka u tekelwa a timbewu ta kona zinwe ni mihanzu ya xivina. [77]

¹⁰U nga rimi hi homu yi bohelweko ni mbongola.

¹¹U nga ambali a tinguwo ti lukilweko hi woya ga tiyivu zinwe ni wukene.

¹²Wena u ta rungela machakafula ka mune wa tichoka ta nguwo leyi u fenengeleko. [78]

¹³Loku munhu a teka sati, a tshinela ka yena, zonake a sangula ku mu venga,

¹⁴a wulawula ha yena timhaka ta tingana, a mu lumbeta hi leʼzo biha, aku: Loyi wasati nzi mu tekile, na nzi tshinele ka yena, a nzi mu kumangi na hi mubulwa!

¹⁵Zonake a raru wa loye wasati ni nyine wa kona, va ta teka xiwoniso xa wubulwa gakwe, va xi yisa ka masingalakati ya muti laha hubyeni.

¹⁶Ni raru wa nhwana loye i taku ngalo ka masingalakati: Loyi munhu nzi mu nyikile nʼwana wa mina a kuva sati wakwe, kanilezi a nga mu lavi.

¹⁷Makunu i wulawula ha yena a timhaka ta tingana, aku: A nzi kumangi a nʼwana wa wena na hi mubulwa. Kanilezi a xiwoniso xa wubulwa ga nʼwana wa mina hi lexi. Na vona va ta andlala a nguwo mahlweni ka masingalakati ya muti.

¹⁸Ni masingalakati ya lowo muti va ta teka loye munhu va mu tsayisa.

¹⁹Makunu lezi a lumbetileko a nhwana wa muIsraeli hi zilo zo biha, va ta mu rihisa a 100 wa maxekeli ya siliva, va nyika a raru wa nhwana loye, na yena i ta kuva sati wakwe wontihe masiku ya kuhanya kakwe, cima a nga ha ta mu hlongola kambe.

²⁰Kanilezi loku a zilo lezo zi tiyile hakunene, na ku nga kumekangi a xikombiso xa wubulwa ka loye wasati,

²¹va ta mu humesa laha nyangweni ya yindlu ya raru wakwe, zonake a vanhu va muti wabye va ta mu gandla hi maribye, kala afa, hakuva i mahile a zilo zo nyenyeza nguvu ka Israeli hi ku bhaya lomu ndlwini ka raru wakwe. Hikwalaho u ta susa kubiha xikari ka nwina.

²²Loku wanuna a kumiwa na etlela ni wasati a tekilweko, hi wumbiri gabye va tafa, loye wa wanuna a etleleko ni wasati, na yena loye wasati. Zinghaho u ta susa kubiha lomu ka Israeli.

²³Loku a nhwana a wutilwe, zonake a tlhangana ni wanuna laho mutini a etlela naye,

²⁴mu ta va humesa hi wumbiri gabye lahandle ka muti lowo, mu va gandla hi maribye, vafa; a nhwana i tafa hakuva a nga bangi huwa laho mutini, ni wanuna i tafa hakuva i koramisile a sati wa wakelane wakwe. Hikwalaho u ta susa kubiha xikari ka wena.

²⁵Kanilezi loku wanuna a tlhangana ni nhwana loyi a wutilweko le masinwini a mu pfinya a etlela naye, loye wanuna a mu pfinyileko a etlela naye i tafa yece basi.

²⁶Kanilezi ka nhwana cima u nga ta maha nchumu, hakuva a nga na nanzu lowu a faneleko kufa; hakuva zi fanana ni loku munhu a vukela makabye wakwe hi wurena a mu daya; i mhaka yinwe.

²⁷Hakuva yena i mu kumile le khwatini; ni loye wa nhwana a wutilweko i bile huwa, kanilezi a ku tangi wo mu hlanguta.

²⁸Kasike loku munhu a tlhangana ni nhwana loyi a nga wutwangiko zonake a mu khoma a etlela naye, va woniwa;

²⁹a munhu loye a etleleko naye i ta nyikela ka raru wa nhwana 50 wa maxekeli ya siliva, zonake i ta maha sati wakwe hakuva yena i mu koramisile, cima a nga ha ta mu tsika kuhanyeni kakwe kontlhe.

³⁰A munhu a nga teki a sati wa raru wakwe, a tlhatlha a xiambalo xa raru wakwe.