Read tshwa Deuteronome 23 Bible Online

Deuteronome 23 - tshwa bible

Deuteronome 23

¹Loye a thenilweko, kutani hi ku fayiwa, hambu hi ku tsemiwa, a nga ta enghena mutlhanganweni wa Jehova.

²Loyi a belekilweko hi wubhayi a nga ta enghena mutlhanganweni wa Jehova; hambu ka khume ga zizukulwana, a nga kona wa xizukulwana xakwe a ta nga enghena mutlhanganweni wa Jehova.

³Va ka Amoni ni vaMoabi va nga ta enghena tlhanganweni wa Jehova; hambu ka xizukulwana xabye xa wukhume cima va nga ta enghena mutlhanganweni wa Jehova. [79]

⁴Hakuva a va mu khingangi nwina ni zibaba ni mati laha na muta hi le Gipite, ni kambe vona va rihele Balaami a nʼwana wa Beori, wa kuta hi le Petora, wa le Mesopotamia, kasi a fela ku ta mu phunga.

⁵Hambu lezo Jehova Nungungulu wa wena a nga vumelangi ku ingisa Balaami; hikwalaho Jehova Nungungulu wa wena i lo hunzulusa kuphunga ku maha xikatekiso, hakuva Jehova Nungungulu wa wena i wa ku ranza.

⁶U nga ti karati ku lava kurula zinwe navo, hambu ku tshameka zinwe navo ka wontihe masiku ya kuhanya ka wena kala kupinzuka.

⁷U nga dzuki u xanza vaEdomi hakuva mbamakabye va wena; u nga xanzi vaGipite, hakuva u wa luvele tikweni gabye. [80]

⁸A vanana vabye va xizukulwana xa wunharu va ta zi kota ku enghena tlhanganweni wa Jehova.

⁹Loku mu hloma yimpi, muya gova a kuva muiwa ni valala va nwina, u ta chela kota hi ku ti hlayisa ka lezi zi bihileko.

¹⁰Loku a hi kona xikari ka nwina a munhu loyi a nga hlazekangiko hi kota ya lezi zi humileko ka yena ni wusiku, yena i ta huma lahandle ka wugovelo; ngha yena a nga engheni lomu wugovelweni; [81]

¹¹kanilezi laha gambyeni yena i ta hlamba lomo matini, zonake loku gi pelile i ta tlhela a ya enghena wugovelweni.

¹²Ni kambe wena u tava ni wutshamu le handle ka wugovelo; laha mu ta nga humela kona.

¹³Na wena u tava ni mbhanya xikari ka matlhari ya wena kasi loku uya khwatini u ta ya kela ha wona u hambuka, anzhako ka lezo u seletela a chaka ga wena.

¹⁴Hakuva Jehova Nungungulu wa wena wa fambafamba xikari ka wugovelo ga wena kasi ku ku ponisa ni ku nyikela valala va wena canjeni ga wena; hikwalaho a wugovelo ga wena gi fela ku tshama na gi basile; kasi Jehova a nga dzuki a wona a zilo zo biha ka wena, ku nga taku a suka ka wena.

¹⁵Wena u nga nyikeli a khumbi ka nwinyi wa yona leyi yi tsutsumeleko ka wena, yi chava ka nwinyi wa yona;

¹⁶kanilezi yi ta tshama ka wena ni lomu tikweni ga wena ka wutshamu lego yi ta nga gi hlawula, ni ka muti lowo yi ta nga wu lava; ni kambe u nga mu xanisi.

¹⁷Ngha ku nga hi kona xibhayi xikari ka vanhwana va ka Israeli, ni kambe ngha ku nga hi kona wanuna a ti mahako wasati xikari ka vanana va ka Israeli.

¹⁸U nga nehi lomu ndlwini ka Jehova Nungungulu wa wena a hakhelo ya xibhayi, hambu ni kurihwa ka mbyana, a ku rihela xifungo xa kuhlambanya; hakuva lezo zilo manyala ka Jehova Nungungulu wa wena.

¹⁹Wena u nga lavi bhinzu ka makabye wa wena loku u mu pembisile, kutani zakuga kutani hi zinwani zilo lezi zi pembiwako hi bhinzu. [82]

²⁰U ta pembisa wamatiko kasi u fela ku bhinzula, kanilezi u nga lavi bhinzu ka makabye wa wena, kasi Jehova Nungungulu wa wena a fela ku ku katekisa ka mitiro yontlhe ya wena, ka tiko lego u ta ngaya enghena ka gona u gi fumela.

²¹Loku u hlambanya xifungo ka Jehova Nungungulu wa wena, a ku maha xona, u nga hlweli ku xi maha; hakuva Jehova Nungungulu wa wena i ta xi lavisisa ka wena zonake u te kumeka na u hi ni nanzu.

²²Kanilezi loku u nga hlambanyangi ku maha lexo xilo, cima u nga ta kuva ni nanzu.

²³Kanilezi u fanele ku tiyisa gezu legi gi humileko hi le nonwini wa wena, khwatsi hi lezi u hlambanyileko ka Jehova Nungungulu wa wena hi kuranza ka wena nwinyi, ni laha u vulileko ha kona a nomu wa wena u tsumbisa lezo zilo.

²⁴Loku wena u enghena masinwini ya xivina xa makabye wa wena, u ngaga mihanzu ya kona kota kuranza ka mbilu ya wena, uga u xura, kanilezi u nga cheli nchumu lomu xirunzwini xa wena.

²⁵Ni loku u enghena lomu ka zipfhaki za wakelane wa wena, u nga tshova zipfhaki hi canja ga wena, kanilezi u nga enghenisi a sikela u tshovela a zipfhaki za muakelane wa wena. [83]