Read tshwa Deuteronome 25 Bible Online

Deuteronome 25 - tshwa bible

Deuteronome 25

¹Loku vavanuna va holovisana, zonake vaya mahlweni ka Valamuli kasi va fela ku ya lamulwa, a Valamuli va ta tlhatlha loyi a lulamileko ni ku kona loyi a nga ni nanzu.

²Ni loyi a konekileko loku a fanele ku biwa, a mulamuli i ta mu etlelisa lahasi, a biwa kuwoneni kakwe a tsengo lowu wu ringanako ni nanzu wakwe.

³A nga mubi ku hunza 40 wa timbirimbi, hakuva a makabye wa wena i tava ni tingana mahlweni ka wena, loku a biwa ku hunza fanelo. [88]

⁴V nga bohi a nomu wa homu laha yi hulako timbewu.

⁵Loku a vamakabye va akile wutshamu ginwe, zonake munwani afa na a nga siyangi nʼwana, loye wasati a felweko a nga tekiwi hi munwani wanuna wa limbe lixaka, a tekwe hi makabye wa nuna wakwe, kasi a fela ku ya tira a ntiro wa nakulobye. [89]

⁶Zonake a matewula lawa a ta nga beleka, i ta vuxa a vito ga nakulobye loyi a fileko; kasi a vito gakwe gi nga hlangulwi lomu ka Israeli.

⁷Kanilezi loku wanuna loye a ala ku hlambela nhombe yakwe, a wasati i taya hubyeni ka masingalakati a yaku: A nhombe ya mina ya ala ku vuxa a vito ga nakulobye lomu ka Israeli; a nga vumeli ku nzi hlambela kota fanelo ya nhombe.

⁸Zonake a masingalakati ya muti wabye ma ta vitana loye wanuna va wulawula naye, ni loku a simama aku: A nzi lavi ku mu hlambela,

⁹zonake loyi wasati i ta tshinela kusuhani ka nhombe yakwe kuwoneni ka masingalakati, a ta mu susa xilato lomu ka nkonzo, a mu phelela mari lomu nghoheni, a wulawula, aku: Ku ta mahiwa lezo ka munhu loye a alako ku vuxa a yindlu ya nakulobye.

¹⁰Zonake a vito lomu ka Israeli gi ta vitanwa ku ngalo, yindlu ya loyi a susilweko xilato.

¹¹Loku a vavanuna vambiri valwa, zonake a wasati wa munwani wanuna a tshinela ku ta yimela nuha wakwe kasi ku mu ponisa canjeni ga loyi a mu bako, loku wasati a nawuluta a canja gakwe a khoma loye wanuna hi wununa gakwe;

¹²zonake wena u ta mu tsema canja gakwe, u nga mu nyenyeleteli.

¹³O ngavi ni tipimo timbiri ti hambeneko lomu kwameni wa wena, a la ntsongwani ni la hombe. [90]

¹⁴Wena u ngavi ni tiefa timbiri lomu ndlwini ya wena, a ya hombe ni ya yitsongwani.

¹⁵U tava ni lipimo li nene, ni lipimo li nene la efa, kasi masiku ya wena ma fela ku anza tikweni legi Jehova Nungungulu wa wena a ku nyikileko gona.

¹⁶Hakuva loye a mahako lezi zilo, ni loyi a kanganyisako, xinyenyeko ka Jehova Nungungulu wa wena.

¹⁷Alakanya lezi a vaAmaleki va ku maheleko laha ndleleni na ma hata hi le Gipite, [91]

¹⁸lezi va mu tsangileko laha ndleleni va mu vukela, va hlasela lava va nga wa sele le nzhako, laha mu nga wa karele mu mbhela ntamu, na yena a nga khatalangi hi Nungungulu.

¹⁹Hikwalaho laha Jehova Nungungulu wa wena a ta nga ku nyika kuhumula ka vontlhe valala va wena lava va ku ranzeleko, lomu ka tiko legi Jehova Nungungulu wa wena a ku nyikileko kasi gi maha tshomba ya wena u gi fumela, zonake wena u ta hlanguta muAmaleki, a nga ha alakanyiwi kambe lahasi ka tilo; u nga rivali lezo. [92]