Read tshwa Deuteronome 27 Bible Online

Deuteronome 27 - tshwa bible

Deuteronome 27

¹Mosi ni masingalakati ya ka Israeli va lo laya vanhu, vaku: Hlayisani milayo leyi nzi mu nyikako yona nyamutlha.

²A siku lego mu ta nga tlhatuka Jordani mu ya enghena tikweni legi Jehova Nungungulu wa wena a ku nyikileko gona, u ta yimisa a maribye ya hombe u ma tota hi mhemba;

³zonake u ta tsala hehla ka wona a timhaka tontlhe ta lowu nayo, laha na u tlhatukile a ku ya enghena ka tiko legi Jehova Nungungulu wa wena a ku nyikileko, a tiko gi khulungako masi ni wulombe, khwatsi hi lezi Jehova Nungungulu wa vararu va wena a ku tsumbisileko.

⁴Laha na mu tlhatukile Jordani mu ta ya yimisa le xitsungeni xa Ebale a maribye lawa nzi mu leletelako ha wona inyamutlha, zonake mu ta ma tota hi mhemba.

⁵Laho u ta akela Jehova Nungungulu wa wena a alati ga maribye, u nga ma henyi hi xiketse kuakeni ka wena; [96]

⁶Wena u ta aka a alati ga Jehova Nungungulu wa wena hi maribye ma nga vatliwangiko, zonake u ta nyikela ka Jehova Nungungulu wa wena a munyikelo wa kuhiswa laho alatini.

⁷U ta maha ni miphahlo ya kubonga, uga laho u ti tsakela mahlweni ka Jehova Nungungulu wa wena.

⁸U ta tsala hehla ka lawa maribye tontlhe timhaka ta lowu nayo; u dlunyatisa khwatsi.

⁹Mosi i lo wulawula zinwe ni vapristi va vaLevi ka vaIsraeli vontlhe, aku: Miyela, Israeli, u ingisa! Inyamutlha u tiko ga Jehova Nungungulu wa wena.

¹⁰Hikwalaho ingisa a gezu ga Jehova Nungungulu wa wena, u hlayisa milayo yakwe ni zileletelo zakwe lezi nzi ku leletelako inyamutlha.

¹¹Gwalego siku Mosi i lo laya vanhu, aku:

¹²Loku mu tlhatukile Jordani, lava va ta nga yima xitsungeni xa Gerizima va katekisa vanhu, hi lava: mba ka Simeoni, ni va ka Levi, ni va ka Juda, ni va ka Isakari, ni va ka Josefa, ni va ka Benjamini.

¹³Ni lava va ta nga yima xitsungeni xa Ebale va wulawula nzhukano, hi lava: mba ka Rubeni, ni va ka Gadi, ni va ka Axeri, ni va ka Zebuloni, ni va ka Dani, ni va ka Naftali.

¹⁴A vaLevi va ta wulawula hi gezu ga hombe ka vanhu vontlhe va ka Israeli, vaku:

¹⁵Khombo a give ka munhu loyi a mahako xifananiso xi vatlilweko, hambu lexi xi nyekisilweko, xi nga manyala ka Jehova, a ntiro wa mandla ya vanhu, a xi yimisa wutshanwini gi fihleleko! A vanhu vontlhe va ta hlamula, vaku: Amen!

¹⁶Khombo a give ka loye a nyenyako a raru wakwe, kutani mamani wakwe! A vanhu vontlhe va ta hlamula, vaku: Amen! [97]

¹⁷Khombo a give ka loyi a susako a xikombiso xa mbhingano wa misava ya muakelane wakwe! A vanhu vontlhe va ta hlamula, vaku: Amen!

¹⁸Khombo a give ka loyi a hambukisako xikhumu laha ndleleni ya xona! A vanhu vontlhe va ta hlamula, vaku: Amen!

¹⁹Khombo a give ka loyi a hambukisako nongameto ka muluveli, ni ka xisiwana, ni ka noni! A vanhu vontlhe va ta hlamula, vaku: Amen!

²⁰Khombo a give ka loyi a etlelako ni sati wa raru wakwe, hakuva i funungule wumbyiri ga raru wakwe! A vanhu vontlhe va ta hlamula, vaku: Amen!

²¹Khombo a give ka loyi a etlelako ni lihi lixaka la xifuyo! A vanhu vontlhe va ta hlamula, vaku: Amen!

²²Khombo a give ka loyi a etlelako ni makabye, loyi a nga nʼwana wa raru wakwe, kutani nʼwana wa mamani wakwe! A vanhu vontlhe va ta hlamula, vaku: Amen!

²³Khombo a give ka loyi a etlelako ni mukokati wakwe! A vanhu vontlhe va ta hlamula, vaku: Amen!

²⁴Khombo a give ka loyi a dayako muakelane wakwe xihundleni! A vanhu vontlhe va ta hlamula, vaku: Amen!

²⁵Khombo a give ka loyi a amukelako nzhiho wa ku daya munhu loyi a nga hiko na nanzu! A vanhu vontlhe va ta hlamula, vaku: Amen!

²⁶Khombo a give ka loyi a nga khomisisiko a timhaka ta lowu nayo a ti maha! A vanhu vontlhe va ta hlamula, vaku: Amen! [98]