Read tshwa Deuteronome 29 Bible Online

Deuteronome 29 - tshwa bible

Deuteronome 29

¹Leti hi timhaka ta xivumelwano lexi Jehova a nga leletela Mosi a ku maha zinwe ni vanana va ka Israeli le tikweni ga Moabi, ahandle ka xivumelwano lexi a nga xi maha zinwe navo le Horebe.

²Na Mosi i lo vitana vontlhe va ka Israeli, aku kabye: Nwina mu wonile zontlhe lezi Jehova a nga zi maha ka Faro mahlweni ka nwina, le tikweni ga le Gipite, ni ka malanza yakwe wontihe, ni ka tiko gakwe gontlhe.

³A zikarato za hombe lezi u zi wonileko hi mahlo ya wena, ni zikombiso ni masingita ya hombe.

⁴Kanilezi kala lego siku Jehova a nga se mu nyika a mbilu ya ku pima ni mahlo ya ku wona, ni tindleve ta kuzwa. [106]

⁵Mina nzi mu rangele lomu xiwuleni 40 wa malembe; a tinguwo ta nwina a ti hlakalangi mimirini ya nwina, ni zilato za nwina a zi hlakalangi mikonzweni ya nwina;

⁶nwina a mu gangi zibaba, a mu nwangi a vinya ni byala, kasi nwina ma fela ku tiva lezaku hi mina Jehova Nungungulu wa nwina.

⁷Laha nwina mu nga wa chikele ka wutshamu legi, Sihoni a hosi ya le Hexboni, na Ogi a hosi ya le Baxani, va lo hloma yimpi ya ku talwa na hina, hina hi lo va hlula.

⁸Hina hi lo wutla a tiko gabye, hi gi nyikela ka va ka Rubeni ni va ka Gadi, ni khihlanya ga nyangwa ya Manasa.

⁹Hikwalaho hlayisa a timhaka ta lexi xivumelwano, mu ti maha kasi ma fela ku vuvuma ka zontlhe lezi mu zi mahako. [107]

¹⁰Nyamutlha mu yimile laha mahlweni ka Jehova Nungungulu wa nwina; nwina nwentlhe, ni tihosana ta tinyangwa ta nwina, ni masingalakati ya nwina, ni tinduna ta nwina, ni vontlhe vavanuna va ka Israeli,

¹¹ni vanana va nwina, ni vasati va nwina, ni valuveli va nwina lava va nga lomu wugovelweni ga nwina, kusukela ka vatsemi va tihunyi ta nwina ni vakhi va mati ya nwina.

¹²Mu yimile laha kasi nwina mu fela ku enghena ka xivumelwano xa Jehova Nungungulu wa nwina, lexi xi tiyiswako hi kuhlambanya, lexi Jehova Nungungulu wa wena a xi mahako zinwe na wena legi siku.

¹³Inyamutlha i ta ku yimisa a kuva tiko gakwe wutsumbu, na yena a maha Nungungulu wa wena, khwatsi hi lezi a wulileko ka wena, ni ku khwatsi hi lezi a hlambanyileko ka vararu va wena, Abrahama na Isaka na Jakobe.

¹⁴A nzi mahi lexi xivumelwano, ni ku hlambanya xifungo lexi ka nwina nwece;

¹⁵kanilezi nzi xi maha ka lava va yimileko laha nyamutlha zinwe na hina, mahlweni ka Jehova Nungungulu wa hina, ni ka vona lava va nga hiko zinwe na hina legi siku.

¹⁶Nwina ma zi tiva lezi hi nga hanyisa zona le tikweni ga Gipite, ni lezi hi nga fambisa zona xikari ka matiko lawa hi tsemakanyileko,

¹⁷nwina mu wonile manyala yabye, ni zifananiso zabye za chaka za tisinya, ni maribye, ni siliva, ni nzalama, lezi zi nga xikari ka vona.

¹⁸Ku nga dzuki kuva kona xikari ka nwina a wanuna, kutani wasati, kutani i ngango, kutani lixaka leli a mbilu ya lona yi hambukileko legi siku ga Jehova Nungungulu wa hina, aya khozela vanungungulu va matiko lawo; ku nga taku kuva kona xikari ka nwina a mutsu lowu wu humesako nyongwa ni manonwe. [108]

¹⁹Ni kambe ku nga dzuki kuva kona munhu waku loku a zwile timhaka ta xifungo lexi, a rutisa mbilu yakwe aku: Nzi tava ni kurula, hambu loku nzi famba kuranzeni ka mbilu ya mina; lezo ku ta lova a byanyi go nyuka ni go woma.

²⁰Jehova a nga ta mu tsetselela, hakuva a zanga ya Jehova ni khulo gakwe zi ta vura hehla ka munhu loye; zonake wontihe makhombo lawa ma tsalilweko lomu bhukwini legi ma tava hehla kakwe, na Jehova i ta hlanguta a vito gakwe lahasi ka tilo.

²¹Na Jehova i ta mu pambula a mu veka tlhelweni ka tinyangwa tontlhe ta ka Israeli, i ta welwa hi makhombo ni tinzhukano tontlhe ta xivumelwano lexi xi tsalilweko bhukwini legi ga milayo.

²²Zonake a zizukulwana za nwina lezi zi ta ngava kona anzhako ka nwina, ni vamatiko lava va ta ngata hi le matikweni ya le kule, laha va ta nga ta wona a zixaniso ni makhombo lawo Jehova a ta nga xanisa tiko lego ha wona,

²³va ta ku ngalo: A tiko ga kona i tiko ga solufa, ni munyu, i tiko gi swileko gontlhe, i tiko gi nga hiko na mbewu ni kuga, a ha ha wuli hi byanyi, a gi mili; gi fanana ni kuvilinganyiswa ka Sodoma ni Gomora, ni Adma ni Zeboime, a miti leyi Jehova a yi vilinganyisileko hi zanga ya khulo gakwe. [109]

²⁴A vamatiko vontlhe va taku: Jehova i mahele yini lezi zilo ka legi tiko? Xana ka kuyini a kuvura ka zanga leyi ya hombe ya kunghahi ke?

²⁵Zonake a vanhu va ta hlamula, vaku: Hi lezi va tsikileko xivumelwano xa Jehova Nungungulu wa vararu vabye, lexi a mahileko zinwe na vona xikhatini lexo a nga va humesa hi le Gipite;

²⁶va famba va ya khozela vanwani vanungungulu va ya khizama mahlweni ka vona, na va hi vanungungulu lava va nga va tiviko, ni lava a nga va nyikangiko.

²⁷Hikwalaho a zanga ya Jehova yi vindlukisilwe ku vukela legi tiko, kasi ku yisa hehla ka gona wontihe makhombo ma tsalilweko lomu bhukwini legi.

²⁸Na Jehova i va tsuwule lomu tikweni gabye hi zanga, ni kuholova, ni kuhlamuka ka hombe, na yena i va hoxile ka ginwani tiko, khwatsi hi lezi hi zi wonako legi siku.

²⁹A zilo lezi zi fihleleko za Jehova Nungungulu wa hina, kanilezi a zilo lezi zi wonekako za hina ni vanana va hina kala kupinzuka, kasi ha fela ku maha tontlhe timhaka ta lowu nayo. [110]