Read tshwa Deuteronome 3 Bible Online

Deuteronome 3 - tshwa bible

Deuteronome 3

¹Hi lo tlhela hi kanziha hi tlhelo ga le Baxani. Zonake Ogi a hosi ya le Baxani ni vontlhe vanhu vakwe, va lo hi tlhangaveta le Edrei, va lava kulwa na hina. [12]

²Kanilezi Jehova i te ngalo ka mina: U nga mu chavi, hakuva nzi mu nyikele canjeni ga wena, yena ni vanhu vakwe vontlhe ni tiko gakwe, u ta mu maha kota lezi u mahileko ka Sihoni a hosi ya vaAmori, loyi a akileko le Hexboni.

³Zonake Jehova Nungungulu wa hina i lo nyikela Ogi a hosi ya le Baxani zinwe ni vontlhe vanhu vakwe canjeni ga hina, hi va hlasela ku nga sali ni munwe.

⁴Ka xona xikhati lexo hi lo teka yontlhe miti yakwe; cima a hi siyangi ni munwe: yi wa hi 60 wa miti, gontlhe tiko ga Argoba, a mufumo wa Ogi wa le Baxani.

⁵Yontlhe leyi miti yi wa bhiyelwe hi makhokhola yo leha, ni tinyangwa ni malongonzo; na ku nga hlayiwi a miti leʼyo tala yi nga bhiyelwangiko.

⁶Hina hi lo va lovisa bhi kota lezi hi nga maha ka Sihoni, a hosi ya le Hexboni, hi hlasela vavanuna ni vavasati ni vanana.

⁷Kanilezi hi phangile zifuyo zontlhe ni lezi hi nga zi kuma lomu mitini.

⁸Lezo ka xona xikhati lexo hina hi lo teka a tiko ga tihosi timbiri ta maAmori, leti ti nga wa hi le tlhatuko wa Jordani, kusukela Congweni wa Amoni kala le xitsungeni xa Hermoni

⁹(legi Hermoni a vaSidoni va gi vitanako ku ngalo i Sirioni, ni maAmori vona va gi vitana ku ngalo Senira);

¹⁰hina hi tekile miti yontlhe ya le nkoveni, gi nga tiko ga Gileade gontlhe, ni tiko ga Baxani gontlhe, kala le Saleka ni Edrei, a miti ya mufumo wa Ogi wa le Baxani.

¹¹(Hakuva hi yena Ogi a hosi ya le Baxani yece a nga sele ka misalela ya zihotlovila. Kasi a mubhedi wakwe lowu wa simbi, a hi wona lowu wu nga wa hi le Raba, mutini wa ka Amoni ke? A kuleha ka wona wu wa hi ntlhanu wa mikono ni mune, a kuanama wu wa hi mune wa mikono, hi nkono wa wanuna.)

¹²Hi tekile tiko lego xona xikhati lexo, kusukela Aroera legi gi nga le Congweni wa Amoni, ni khihlanya ga xitsunga xa Gileade, ni miti ya kona hi yona nzi nga nyika va ka Rubeni ni va ka Gadi;

¹³legi gi seleko ga Gileade, ni tlhelo gontlhe ga le Baxani legi gi nga tiko ga Ogi, nzi nyikile khihlanya ga nyangwa ya ka Manasa; a tiko gontlhe ga Argoba ni ga Baxani gontlhe, legi gi vitwako ku i tiko ga vaRefaime.

¹⁴Jaira a nʼwana Manasa i lo teka gontlhe a tiko ga Argoba, kala mbhinganwini wa Gexuri ni va ka Maakati, a gi chula a vito gakwe; a miti ya Baxani ni nyamutlha lezi ya ha vitanwa aku i miti ya Jaira.

¹⁵Zonake nzi nyikela a tiko ga Gileade ka Makira.

¹⁶A va ka Rubeni ni va ka Gadi nzi va nyikile a tiko kusukela Gileade kala lomu nkoveni wa Amoni, xikari ka nkova lowu wu nga mbhingano kala le Congweni wa Jaboke, wu nga mbhingano wa vanana va ka Amoni,

¹⁷ni Araba ni Jordani lowu wu nga mbhingano, kusukela Kinereta kala le Bimbini ga Munyu, hi le hasi ka xitsunga xa Pisga hi tlhelo ga Mutsuwuka-gambo.

¹⁸Ka xona xikhati lexo mina nzi mu leletele, nziku: Jehova Nungungulu wa nwina i lo mu nyika a tiko legi a kuva ga nwina. Nwina nwentlhe vavanuna va tinhenha mu ta famba na mu hlomile mahlweni ka vamakabye va nwina, a vanana va ka Israeli.

¹⁹Ntsena vasati va nwina, ni vanana va nwina, ni zifuyo za nwina (mina nza zi tiva lezaku mu na ni mitlhambi yo tala), zi ta sala mitini ya nwina leyi nzi nga mu nyika,

²⁰kala Jehova a nyika kuhumula ka vamakabye va nwina kota nwina, zonake vonawu va ta fumela a tiko legi Jehova Nungungulu wa nwina a va nyikileko le tlhatuko wa Jordani; zonake munwe ni munwani i ta tlhelela tshombeni yakwe leyi nzi mu nyikileko yona. [13]

²¹Ka xona xikhati lexo nzi lo leletela Joxua, nziku: A mahlo ya wena ma wonile zontlhe lezi Jehova Nungungulu wa nwina a mahileko ka tihosi timbiri; Jehova i ta mahisa zalezo ka wontihe matiko lawo mu ta nga enghena ka wona.

²²Mu nga va chavi, hakuva Jehova Nungungulu wa nwina hi yena a mu lwelako.

²³Ka xona xikhati lexo nzi lo khongela ka Jehova, nziku:

²⁴Hosi Jehova, wena u sangule ku kombisa ka nanza ga wena a wukulu ga wena, ni ntamu wa canja ga wena, hakuva hi wihi nungungulu le tilweni ni laha misaveni a nga mahako mi-tiro yo kota ya wena ke?

²⁵Nzi vumele nzi tlhatuka nzi ya wona a tiko lego go saseka gi nga le tlhatuko wa Jordani, a zitsunga lezo zo saseka ni Lebanoni.

²⁶Kanilezi Jehova i lo nzi holovela hi kota ya nwina, a nga nzi ingisangi, aku ngalo ka mina: Zi ku enele, u nga engeti u wulawula na mina mhakeni leyo. [14]

²⁷Kanilezi kanziha le hehla ka xitsunga xa Pisga, u tlakusa a mahlo ya wena le Mupela-gambo, ni le Nwalungu, ni le Dzongeni, ni le Mutsuwuka-gambo, u cuwuka hi mahlo ya wena, hakuva cima u nga ta tlhatuka loyi Jordani.

²⁸Kanilezi leletela Joxua, u mu tiyisa-hlana ni ku mu nyika ntamu, hakuva hi yena a ta nga rangela vanhu lava, ni lezaku hi yena a ta nga va nyika a tiko legi u ta nga gi wona, giva tshomba yabye.

²⁹Zinghaho hi lo tshama xitsungeni ngomama ni Bet-Peori.