Read tshwa Deuteronome 33 Bible Online

Deuteronome 33 - tshwa bible

Deuteronome 33

¹Lexi hi xikatekiso xa Mosi, a munhu wa Nungungulu, lexi a nga katekisa ha xona a vanana va ka Israeli na a nga se kufa, aku:

²Jehova i lota hi le Sinai, A ta va tsuwukela hi le Seire: I lo woninga na hi le xitsungeni xa Parani, Na sukela xikari ka zidlemo zo basa; Lomu canjeni gakwe a nzilo wa nayo wu lo va humelela. [130]

³Ina, yena wa ranza a tiko gakwe, Vontlhe va kubasa va gona va le canjeni ga wena, Vona va tshama laha mikonzweni ya wena, Va amukela a timhaka ta wena.

⁴Mosi i hi leletele a nayo, Yi nga yona a tshomba ya hlengeletano wa Jakobe.

⁵Ku wa hi ni hosi ya Jexuruni, Laho a tihosana ta vanhu ti tlhangeneko Ni tontlhe tinyangwa ta ka Israeli ti tsombeneko.

⁶Ngha Rubeni a hanya, a ngafi, Hambu loku vanhu vakwe va hi va tsongwani!

⁷Na a katekisa Juda, i te ngalo: Jehova, zwana a gezu ga Juda, U mu wuyisa a tikweni gabye. I lo ti lwela hi mandla yakwe wutsumbu, Wena uva muvuni wakwe a ku mu tlhatlhisa ka valala vakwe!

⁸Ha Levi i te ngalo: Tumina wa wena ni Urima wa wena a zi nyikiwe ka wa kubasa wa wena, Loyi u mu ringileko le Masa, Loyi u nga kanetisana naye le matini ya le Meriba. [131]

⁹Loyi a nga ku ngalo hi dadani wakwe ni mamani wakwe: A nzi va wonangi! Loyi a nga tivangiko vamakabye vakwe, Loyi a nga khataleliko a vanana vakwe, Kasi va hlayisa a gezu ga wena. Va chivirikela xivumelwano xa wena. [132]

¹⁰Vona va gonzisa Jakobe a zileletelo za wena, Ni nayo wa wena ka Israeli. Vona va vekela a libani lomu tinhovini ta wena, Ni minyikelo yo hiswa alatini ga wena.

¹¹O Jehova, katekisa ntamu wakwe, U amukela mitiro ya mandla yakwe. Lamata mihlana ya valala vakwe, ni ya lava va mu vengako, Kasi va fela ku kala va nga ha suki kambe.

¹²Ha Benjamini i te ngalo: Xiranzwa xa Jehova, I ta tshama kuruleni zinwe na yena; Jehova i ta mu fenengeta kala kupinzuka, Yena i ta tshama makatleni ya yena.

¹³Ha Josefa i te ngalo: A tiko gakwe a gi katekiswe hi Jehova Hi zilo zo saseka za le tilweni, hi nzhokati, Ni za le kueteni lezi zi nga le hasi,

¹⁴Ni mihanzu yo nanziha ya gambo, Ni mihanzu yo nanziha ya tihweti,

¹⁵Ni mihanzu yo nanziha ya zitsunga za kale, Ni malongo ya zitsunga za kala kupinzuka,

¹⁶Ni mihanzu yo nanziha ya misava, ni ya kutala ka yona. Ni tipswalo ta loyi a nga wa tshamile xihlahleni. A zi tshame hlokweni ya Josefa, Ni le hlokweni ya hosi ya vanakulobye! [133]

¹⁷A nkuzi yakwe ya matewula mbukosi ga yena, A timhonzo takwe timhonzo ta nyari; I ta tlhava ha tona vontlhe vanhu khatiginwe, Kala le magemeta-musi ya misava. Hi gona wunyingi ga va ka Efraime, Ni matala ya va ka Manasa.

¹⁸Ha Zebuloni i te ngalo: Tsaka, Zebuloni, a kuhumeni ka wena, Na wena Isakari, le matendeni ya wena!

¹⁹Vona va ta vitana a vanhu le xitsungeni; Va nyikela miphahlo ya kululama, Hakuva va ta anwa a wunyingi ga mabimbi. Ni le tshombeni leyi yi fihlilweko vunyeni.

²⁰Ha Gadi i te ngalo: I katekile loye a enzelekisako Gadi! A etleleko khwatsi i pswele ga nghala, A pfhemula a woko ni hloko.

²¹Yena i ti hlawulele a wutshamu ga chukwana, Hakuva a xiavelo xa hosi xi vekelwe yena, Yena a famba ni tihosana ta vanhu, A maha kululama mahlweni ka Jehova, Ni zileletelo zakwe zinwe na Israeli.

²²Ha Dani i te ngalo: Dani i role ga nghala, Legi gi tlulako hi le Baxani.

²³Ha Naftali i te ngalo: O Naftali, U xure hi ma thomo! U tatisilwe hi zikatekiso za Jehova! Yana u ya fumela a tlhelo ga Mupela-gambo ni le Dzongeni!

²⁴Ha Axeri i te ngalo: Axeri a katekiswe xikari ka vana va vavanuna; Ngha a ranzeka ka vanakulobye, A pete nkonzo wakwe lomu ka mafura.

²⁵Zikwinyaro za wena zi tava za ziketse ni za suku, A ntamu wa wena wu ta ecana ni masiku ya wena.

²⁶O Jexuruni! A nga kona wa ku fanana ni Nungungulu, Loyi a tako ku ta ku vuna na khilele matilo; A wukulu gakwe gi tlakusilwe le marefini,

²⁷Nungungulu wa pinzukelwa mbuchavelo ga wena, Ni laha hasi ku fumela a mawoko yakwe ya pinzukelwa. I hlongolile a valala mahlweni ka wena, A ku ngalo: Lovisa!

²⁸Israeli i akile hi kurula, A hlowo ya Jakobe yi tshameka, A tikweni ga mavele ni vinya; Hakunene a tilo gakwe gi dona a nzhokati. [134]

²⁹U katekile wena, Israeli! Himani a fananako na wena, Wena tiko u hanyiswako hi Jehova! A nga xitlhangu xi vikelako, Ni supado ya wukulu ga wena! A valala va wena va ta khoziswa mahlweni ka wena, Kanilezi wena u ta kanzihela a matshamu yabye ma tlakukileko!