Read tshwa Deuteronome 7 Bible Online

Deuteronome 7 - tshwa bible

Deuteronome 7

¹Laha Jehova Nungungulu wa wena a ta nga ku chiketa ka tiko legi u yako ka gona ku ya gi fumela, ni laha a ta nga panzanya mahlweni ka wena wontihe matiko lawa yo tala, a vaHiti, ni vaGirgaxi, ni vaAmori, ni vaKanani, ni vaPerezi, ni vaHivi, ni vajebusi, a ntlhanu wa matiko ni mambiri lawa ma ku hunzako hi wukulu ni ntamu, [30]

²ni laha Jehova Nungungulu wa wena a ta nga va nyikela mahlweni ka wena, u va hlasela, u va lovisa, u va hihirita; u nga dzuki u maha xivumelwano zinwe navo, hambu ni ku va mahela tipswalo.

³U nga tekani navo; u nga dzuki u va nyika a vanhanyana va wena ka vafana vabye, hambu ni ku tekela a vafana va wena a vanhanyana vabye. [31]

⁴Hakuva va ta hambukisa a vana va wena va nzi fularela, zonake va ya khozela vanwani vanungungulu, kwalahoke a zanga ya Jehova yi ta vura hehla ka nwina yi mu lovisa hi kuhatlisa.

⁵Hikwalaho mu ta va mahisa lezi: Mu ta khungumula maganzelo yabye, mu fayetela timhinga tabye, ni ku tsemelela zifananiso zabye za Axera, mu hisa zifananiso zabye zi vatlilweko,

⁶hakuva nwina mu vanhu va kubasa va Jehova Nungungulu wa nwina; na Jehova Nungungulu wa wena i ku hlawulile kasi u fela ku maha tiko gakwe wutsumbu, a xikari ka wontihe matiko lawa ma nga laha misaveni.

⁷Jehova a nga mu ranzangi hambu ku mu hlawula hi kota ya kuva mu hunzako matiko wontihe hi kutala, hakuva nwina mu wa hi vanhu vatsongwani nguvu ka wontihe matiko;

⁸kanilezi hi lezi Jehova a mu ranzako, ni lezaku a hlayisa xifungo xakwe lexi a hlambanyileko ka vararu va nwina; hi kota ya lezo Jehova i mu humesile hi canja ga ntamu, ni ku mu tlhatlhisa lomu ndlwini ya wukhumbi, lomu mandleni ya Faro a hosi ya le Gipite.

⁹Zi tive lezaku Jehova Nungungulu wa wena hi yena Nungungulu; i Nungungulu a tsumbekako, loyi a hlayisako xivumelwano xakwe ni wuxinji, kala ka xizukulwana xa khume ga mazana xa lava va mu ranzako, ni ka lava va hlayisako milayo yakwe. [32]

¹⁰Kanilezi i tlhelisela lava va mu vengako hi ku va lovisa. A nga hlweli ku rihisa lava va mu vengako, i ta va tlhelisela.

¹¹Hikwalaho u ta hlayisa milayo ni ziyimiso ni zileletelo lezi nzi ku leletelako nyamutlha, u zi maha.

¹²Ku taku loku u ingisa zileletelo lezi, ni loku u zi hlayisa ni ku zi maha, Jehova Nungungulu wa wena i ta hlayisa a xivumelwano ni wuxinji, lezi a hlambanyileko ka vararu va wena;

¹³na yena i ta ku ranza, a ku katekisa, a ku anzisa; na yena i ta katekisa a pswalo wa rumbu ga wena, ni ku katekisa mihanzu ya masimu ya wena, ni mavele ya wena, ni vinya ga wena, ni mafura ya wena, ni kupswala ka tihomu ta wena ni tiyivu ta wena, ka tiko legi a hlambanyileko ka vararu va wena ku ku nyika gona.

¹⁴Wena u ta kateka ku hunza wontihe matiko; cima ku nga tava kona a ngonwa xikari ka nwina, a wanuna hambu wasati, hambu xifuyo tlhambini wa wena.

¹⁵Na Jehova i ta susa mababyi wontihe xikari ka wena; cima a nga ta ku babyisa hi ginwe ga mababyi yo biha ya le Gipite, lawa u ma tivako, kanilezi i taba ha wona vontlhe lava va ku vengako. [33]

¹⁶Wena u ta heta wontihe matiko lawa Jehova Nungungulu wa wena a ku nyikileko wona, u nga ta va hawukela. Kambe u nga khozeli vanungungulu vabye, hakuva lezo zi tava ziyo ka wena.

¹⁷Loku u wula lomu mbilwini ya wena ku ngalo: Matiko lawa ma nzi hunza hi kutala; nzi ta va wutlelisa kuyini a tiko ke?

¹⁸U nga va chavi! Alakanya khwatsi lezi Jehova Nungungulu wa wena a zi mahileko ka Faro ni ka vontlhe vaGipite,

¹⁹a zikarato lezi za hombe zi wonilweko hi mahlo ya wena, ni ziwoniso ni zihlamaliso, ni canja ga ntamu, ni woko gi nawulutilweko, lezi Jehova Nungungulu wa wena a ku humesileko ha zona. Zinghaho Jehova Nungungulu wa wena i ta mahisa zalezo ka wontihe matiko lawo u ma chavako.

²⁰Ni kambe Jehova Nungungulu wa wena i ta va rumela mivi kuya mbhetisa lava va ponileko, lava va ti fihlileko mahlweni ka wena. [34]

²¹Wena u nga dzukiswi ha vona, hakuva Jehova Nungungulu wa wena i kona xikari ka wena, i Nungungulu wa hombe, wo tshisa.

²²Na Jehova Nungungulu wa wena i ta hlongola matiko lawo ha kutsongwani ni kutsongwani mahlweni ka wena. Wena u nga ta ma mbheta hi khatiginwe, hakuva ku nga anza zivanza za khwati zi ku talela.

²³Kanilezi Jehova Nungungulu wa wena i ta va nyikela canjeni ga wena, i ta va rumela vilinganya va kala va mbhela.

²⁴I ta nyikela tihosi tabye canjeni ga wena, zonake u ta fuvisa mavito yabye lahasi ka tilo. A ku na munhu loyi a ta nga tiya mahlweni ka wena, kala u va lovisa.

²⁵Zifananiso lezi zi vatlilweko za vanungungulu vabye mu ta hisa nzilweni; mu nga mbilukeli a siliva ni nzalama lezi zi nga ka zona, ni kambe u nga zi teki, zi nga maha ziyo ka wena, hakuva zona zinyenyeko mahlweni ka Jehova Nungungulu wa wena.

²⁶Na wena u nga enghenisi xinyenyeko lomu ndlwini ya wena, ku nga taku u nyenyezawu kota zilo lezo; u ta zi nyenya nguvunguvu, mava manyala ka wena, hakuva za yila.