Read tshwa Johani 1 Bible Online

Johani 1 - tshwa bible

Johani 1

¹A kusanguleni gi wa hi kona Gezu, Gezu gi wa hi na Nungungulu, Gezu gi wa hi Nungungulu. [1]

²Yena i wa hi ka Nungungulu le kusanguleni. [2]

³Zilo zontlhe zi lo mahiwa hi yena; hi lahandle kakwe a ku mahiwangi nchumu xikari ka lezi zi mahilweko.

⁴A kuhanya ku wa hi ka yena; ni kuhanya ku wa hi kuwonekela ka vanhu. [3]

⁵A kuwonekela ku lo woninga munyameni, kanilezi a munyama a wu ku amukelangi.

⁶Ku lota munhu a rumilweko hi Nungungulu, loyi a vito gakwe a nga hi Johani. [4]

⁷Yena i lo tela ku ta maha wukustumunyu, kasi a fela ku kustumunya hi kuwonekela, lezaku vontlhe va fela ku kholwa hi kota ya yena. [5]

⁸I wa nga hi kuwonekela, kanilezi i lo tela ku ta maha wukustumunyu hi kuwonekela.

⁹A kuwonekela ka zinene, loku ku woningako vanhu vontlhe, ku wa kari kuta misaveni. [6]

¹⁰Gezu gi wa hi kona misaveni, ni misava yi wa mahilwe hi yena, kanilezi misava a yi mu tivangi. [7]

¹¹I lota kaya kakwe, kanilezi lava va nga hi vakwe a va mu amukelangi.

¹²Kanilezi vontlhe lava va nga mu amukela, i va nyikile ntamu wa ku maha vana va Nungungulu, vona lava va kholwako hi vito gakwe;

¹³lava va nga pswaliwangiko hi nkhata, hambu hi kuranza ka nyama, hambu hi kuranza ka munhu, kanilezi va pswalilwe hi Nungungulu. [8]

¹⁴Zonake Gezu gi lova ni miri, gi tshama xikari ka hina; hina hi lo wona kungangamela kakwe, ku nga kungangamela loku Dadani a nyikako a Nʼwana wakwe a belekilweko yece, na a tele hi wuxinji ni zinene. [9]

¹⁵Johani i lo kustumunya ha yena, a vitana aku: Hi yena loyi nzi nga wulawula ha yena, nziku: Loyi a tako anzhako ka mina hi yena wo ranga, hakuva i wa hi kona na nzi nga se va kona. [10]

¹⁶Hakuva hina hontlhe hi amukele hi kakwe kutala, a wuxinji hehla ka wuxinji. [11]

¹⁷Hakuva a nayo wu lo nyikiwa hi Mosi; kanilezi a wuxinji ni zinene zi humele hi Jesu Kristu. [12]

¹⁸Nungungulu cima a nga woniwangi hi munhu; a Nʼwana loyi a belekilweko yece, loyi a nga xifuveni xa Dadani, hi yena a hi tivisileko lezi Nungungulu a nga zona. [13]

¹⁹Legi hi wukustumunyu ga Johani, laha a vaJuda va nga rumele a vapristi ni vaLevi hi le Jerusalema, a ku ya mu wutisa, vaku: Hi wena mani ke?

²⁰I lo hlamula, a nga kanetangi, i lo vumela aku: A hi mina Kristu. [14]

²¹Zonake va mu wutisa, vaku: Kasi hi wena mani ke? Hi wena Elija ke? Yena aku: A hi mina yena. Kutani u muprofeti ke? I lo hlamula, aku: Kokwihi! [15]

²²Zonake vaku ngalo kakwe: Hi wena mani ke? Hi fela ku ya va hlamula lava va hi rumileko. U ti wula uku u mani ke?

²³Yena aku: Mina nzi gezu ga loyi a bako hungu xiwuleni, aku: Lulametani a ndlela ya Hosi, kota lezi a nga wula muprofeti Isaya. [16]

²⁴A vanhu lavo va wa rumilwe hi vaFarisi.

²⁵Va lo mu wutisa, vaku: Hi yini u bapatizako loku u nga hi Kristu, hambu Elija, hambu ni Muprofeti ke?

²⁶Johani i lo va hlamula, aku: Mina nzi bapatiza hi mati; kanilezi i kona munwe xikari ka nwina loyi mu nga mu tiviko, [17]

²⁷hi yena loyi a tako nzhako ka mina, loyi mina nzi nga faneliko ku tlhatlha a tingoti ta zilato zakwe. [18]

²⁸Lezi zi lo maheka le Betania, tlhatukweni wa Jordani, laha Johani a nga bapatiza kona. [19]

²⁹Hi manziko wa kona Johani i lo wona Jesu na a kari ata kakwe, aku: Wonani Yivana ya Nungungulu, leyi yi susako zionho za tiko! [20]

³⁰Hi yena loyi nzi nga wulawula ha yena nziku: Wata munhu anzhako ka mina loyi a nzi rangeleko; hakuva i wa hi kona na nzi nga se va kona mina.

³¹Mina nzi wa nga mu tivi; kanilezi nzi tile na nzi bapatiza hi mati, lezaku kasi i ta tivekiswa ka Israeli. [21]

³²Johani i lo kustumunya aku: Nzi wonile a Moya wu relela hi le tilweni kota tuva, wu tshama hehla kakwe. [22]

³³Mina nzi wa nga mu tivi; kanilezi loyi a nzi rumileko a ku bapatiza hi mati, i te ngalo ka mina: Loyi u ta nga wona a Moya wu relela wu tshama hehla kakwe, hi yena a bapatizako hi Moya wa ku Basa. [23]

³⁴Nzi zi wonile, nza maha wukustumunyu lezaku loyi i Nʼwana wa Nungungulu.

³⁵Hi manziko wa kona kambe, Johani i wa yimile kona zinwe ni vambiri va vapizani vakwe.

³⁶Laha a nga wona Jesu na a kari a famba, aku: Wonani Yivana ya Nungungulu!

³⁷A vapizani lava vambiri va lo muzwa na a wula lezo, va lanzela Jesu.

³⁸Jesu i lo hunzuluka, a va wona na va kari va mu lanzela, aku kabye: Mu lava yini? Vaku ngalo kakwe: Rabi (hi kutlhamusela ku ngalo, Mugonzisi), u tshama kwihi?

³⁹Aku ngalo kabye: Ngonani, mu ta wona. Va loya va ya wona lomu a tshamako kona; zonake va tshama naye lego siku; yi wa hi hora ya wukhume.

⁴⁰Andreu, a nakulobye wa Simoni Pedro, i wa hi munwe wa lava vambiri va ngazwa a gezu ga Johani, va lanzela Jesu. [24]

⁴¹A kusangula i lo kuma nakulobye Simoni, aku kakwe: Hi mu kumile Messia, (hi kutlhamusela ku ngalo, Kristu).

⁴²I lo mu neha ka Jesu. Jesu i lo mu cuwuka aku ngalo: Hi wena Simoni, nʼwana Johani; u ta vitanwa ku ngalo, Kefasi, (hi kutlhamusela ku ngalo, Pedro). [25]

⁴³Hi manzike wa kona na a xuva ku famba Galilea, i lo kuma Filipu; aku ngalo kakwe: Nzi lanzele.

⁴⁴Filipu i wa hi wa le Betsaida, a mutini wa va Andreu na Pedro. [26]

⁴⁵Filipu i lo kuma Nataneli, aku kakwe: Hi mu kumile loyi Mosi a nga tsala ha yena nayweni, kambe ni vaprofeti, hi Jesu wa le Nazareta, a nʼwana Josefa. [27]

⁴⁶Nataneli aku ngalo kakwe: Ku nga huma a xilo xo saseka hi le Nazareta ke? Filipu aku kakwe: Ngone, u ta wona. [28]

⁴⁷Jesu i lo wona Nataneli na a kari ata kakwe, aku ngalo: Langutani a muIsraeli wa zinene, loyi a nga hiko na kuxengetela. [29]

⁴⁸Nataneli aku kakwe: U nzi tivisa kuyini? Jesu i lo hlamula, aku: Hi mahlweni na Filipu a nga se ku ku vitana, nzi ku wonile na u hi lahasi ka nkuwu.

⁴⁹Nataneli i lo hlamula, aku ngalo: Rabi, wena u Nʼwana wa Nungungulu, U Hosi ya vaIsraeli. [30]

⁵⁰Jesu i lo hlamula, aku ngalo kakwe: Wa kholwa hilezi nzi ngaku ngalo ka wena: Nzi ku wonile lahasi ka nkuwu ke? U ta wona a zilo za hombe zo hunza lezi.

⁵¹A engeta aku: Hizinene, hizinene, nziku ka nwina: Mu ta wona tilo na gi vululekile, a tingelosi ta Nungungulu na ti kari ti kanziha ti relela hehla ka Nʼwana wa munhu. [31]