Read tshwa Johani 11 Bible Online

Johani 11 - tshwa bible

Johani 11

¹A munhu wo kari i wa babya, a nga Lazaru wa le Betania, a mutini ka vaMaria ni makabye Marta. [250]

²Hi yena Maria loyi a nga tota Hosi hi mafura, a kulula mikonzo ya yona hi misisi yakwe; hi makabye wakwe, Lazaru, loyi a nga kari a babya. [251]

³A vamakabye va lo rumela ka Jesu, vaku: Hosi, wangabye, loyi u mu ranzako wa babya.

⁴Kanilezi laha Jesu na a zi zwile, aku: Legi wubabyi a gi yisi kufeni, kanilezi gi yisa wudzunziweni ga Nungungulu; kasi a Nʼwana wa Nungungulu a fela ku dumiswa ha gona.

⁵Jesu i wa ranza Marta, ni makabye wakwe, na Lazaru.

⁶Hambu lezi a nga zwile lezaku wa babya, i lo tshama masiku mambiri laha a nga hi kona. [252]

⁷Anzhako ka lezo, a ku ngalo ka vapizani: A hi tlheleleni Judia.

⁸A vapizani vaku ngalo ka yena: Rabi, lokuloku lezi a vaJuda va nga lava ku ku gandla hi maribye; wa haya kona kambe ke? [253]

⁹Jesu i lo hlamula, aku: Xana a ku kona a khume ga tihora ni timbiri hi siku ke? Loku munhu a famba munwini, a nga khunguvanyeki, hakuva wa wona a kuwonekela ka misava leyi. [254]

¹⁰Kanilezi loku munhu a famba ni wusiku, wa khunguvanyeka, hakuva a nga na kuwonekela.

¹¹Loku a wulawulile lezo, aku ngalo kabye: Lazaru, a xaka ga hina, i etlele; kanilezi nza famba, nzi ya mu vuxa. [255]

¹²A vapizani vaku ngalo kakwe: Hosi, loku a etlele, i ta kalamuka.

¹³Jesu i wa wulile hi kufa kakwe, kanilezi vona va lo alakanya lezaku i wula hi ku etlela wurongo.

¹⁴Zonake Jesu i lo va byela ziku dlunya, aku: Lazaru i file.

¹⁵Nzi tsakile hi kota ya nwina, lezaku nzi wa hi hava laho, kasi ma fela ku kholwa; kanilezi a hi yeni kakwe.

¹⁶Tomasi, loyi a vitwako Didimusi, i te ngalo ka vapizani-kulobye: A hi fambeniwo, hi yafa naye.

¹⁷Laha Jesu na a chikele, i lo mu kuma na a xwile xilahleni mune wa masiku.

¹⁸Betania ku wa hi kusuhani ni Jerusalema, a pfhuka wa ku ringana tikilometro timbiri.

¹⁹A vaJuda vanyingi va wa tile ka Marta na Maria a ku ta va chavelela hi kota ya kufa ka makabye wabye.

²⁰Laha Marta a ngazwa lezaku Jesu wata, i lo mu khinga; kanilezi Maria i lo nonohisa a tshamile ndlwini.

²¹Marta i te ngalo ka Jesu: Hosi, loku u wa hi kona laha, a makabye wa mina ngha a nga fangi.

²²Kanilezi nza zi tiva ni zalezi, lezaku ni zihi lezi u ta nga zi kombela ka Nungungulu, Nungungulu i ta ku nyika zona. [256]

²³Jesu aku ngalo kakwe: A makabye wa wena i ta vuka.

²⁴Marta aku kakwe: Nza zi tiva lezaku i ta vuka hi siku go gumesa, a kuvukeni ka vafileko. [257]

²⁵Jesu aku kakwe: Mina nzi kuvuka ni wutomi; loyi a kholwako ka mina, hambu loku a file, i ta hanya; [258]

²⁶ni wihi a hanyako a kholwa hi mina, cima a nga tafa. Wa kholwa lexi ke?

²⁷Yena aku: Ina, Hosi; nza kholwa lezaku hi wena Kristu, a Nʼwana wa Nungungulu, loyi a nga wa ta kuta misaveni. [259]

²⁸Laha na a wulile lezo, i lo ya vitana Maria makabye wakwe hi le xihundleni, aku: A Mugonzisi i kona, wa ku vitana.

²⁹Yena laha na a zi zwile, i lo hatlisa a suka, aya ka yena.

³⁰Jesu i wa nga se ku chikela mutini, kanilezi i wa tshamile laha Marta a nga mu khingela kona.

³¹A vaJuda lava va nga hi naye lomo ndlwini, va mu chavelela, laha va nga wona Maria a hatlisa a suka, va lo mu lanzela, na va alakanya lezaku iya xilahleni ku ya rila kona.

³²Maria na a chikele laha a nga hi kona Jesu, a mu wona, i lowa mikonzweni yakwe, aku ka yena: Hosi, loku u wa hi kona laha, a makabye wa mina ngha a nga fangi.

³³Laha Jesu a nga mu wona na kari a rila, va rila kambe ni vaJuda lava va nga tile naye, i lo keta moyeni, a karateka,

³⁴aku ngalo: Mu mu lahlile kwihi? Vaku kakwe: Hosi, ngona u ta wona.

³⁵Jesu a rila. [260]

³⁶A vaJuda vaku ngalo: Mangabye, lezi a nga mu ranzisa zona!

³⁷Kanilezi vanwani vaku ngalo: Xana munhu loyi a nga vulula mahlo ya xikhumu, i wa nga zi koti hikuyini a ku maha loyi munhu a ngafi ke? [261]

³⁸Jesu na a keta kambe mbilwini, i lota xilahleni. Makunu a xilahla xi wa hi mhako, yi nga valilwe hi ribye.

³⁹Jesu i te ngalo: Susani ribye. Marta, a makabye wa loyi a fileko, aku kakwe: Hosi, makunu wa nuha, hakuva mune wa masiku na a file.

⁴⁰Jesu aku kakwe: Xana a nzi ku byelangi nziku, loku u kholwa u ta wona a wukulu ga Nungungulu ke?

⁴¹Loku va susile a ribye ga xilahla, Jesu i lo tlakusa a mahlo yakwe, aku ngalo: Dadani, nza ku bonga hilezi u nzi zwile.

⁴²Nza zi tiva lezaku wa nzizwa xikhati xontlhe; kanilezi nzi wula lezi hi kota ya xidlemo lexi xi yimileko laha, kasi va fela ku kholwa lezaku hi wena u nzi rumileko. [262]

⁴³Laha na a wulile lezo, i lo vitana hi gezu ga hombe, aku: Lazaru, huma!

⁴⁴Loyi a nga file i lo huma, na a bohilwe mandla ni mikonzo hi miceka ya zilahlelo, ni nghohe yakwe yi fenengetilwe hi lesu. Jesu aku kabye: Mu tlhatlheni, mu mu tsika a famba. [263]

⁴⁵A vaJuda vanyingi, lava va nga tile ka Maria, na va wona lezi Jesu a nga zi maha, va lo kholwa ka yena. [264]

⁴⁶Kanilezi a vanwani va vona va loya ka vaFarisi, va ya va hlawutela lezi Jesu a zi mahileko.

⁴⁷Zonake a vapristi va hombe ni vaFarisi va lo tsombanyisa a huwo, vaku ngalo: Hi ta maha yini? A munhu loyi i maha ziwoniso zinyingi. [265]

⁴⁸Loku hi mu tsika a maha lezo, a vanhu vontlhe va ta kholwa ka yena; zonake a vaRoma va ta ta hi tekela a wutshamu legi ni tiko ga hina.

⁴⁹Kanilezi a munwe wa vona, Kayafasi, loyi a nga hi mupristi wa hombe lego lembe, aku ngalo kabye: Nwina a mu tivi nchumu, [266]

⁵⁰hambu ni ku pima lezaku zi mu sasekele lezaku munhu munwe a fela vanhu, kasi a tiko gontlhe gi nga lovi. [267]

⁵¹Makunu a nga wulangi lezi hi wutsumbu gakwe; kanilezi na a hi mupristi wa hombe lego lembe, i lo profeta ku ngalo: Jesu i ta fela tiko.

⁵²Na ku nga hi tiko goce, kanilezi hi lezaku a fela ku wungeletela a vana va Nungungulu lava va hangalakileko. [268]

⁵³A kusukela lego siku va lo tsema khungo lezaku va ta mu daya.

⁵⁴Hikwalaho Jesu i wa nga ha fambi kubaseni xikari ka vaJuda; kanilezi i lo suka laho, aya tikweni legi gi nga kusuhani ni xiwula, le mutini wu vitwako Efraime, a tshama kona zinwe ni vapizani. [269]

⁵⁵A Pasika ga vaJuda gi wa tshinele; a vanyingi va lomu tikweni va loya Jerusalema, kasi ku ya ti basisa, a Pasika na gi nga se ku chikela. [270]

⁵⁶Va wa lava Jesu, va wutisana na va yimile lomo tempeleni, vaku: Mu alakanya yini? A nga tata laha mubuzweni ke? [271]

⁵⁷Kanilezi a vapristi va hombe ni vaFarisi va wa layile ku, loku munhu a ku tiva laha a nga kona, a va tivise, kasi va fela ku ya mu khoma.