Read tshwa Johani 12 Bible Online

Johani 12 - tshwa bible

Johani 12

¹A ntlhanu wa masiku ni ginwe na ku nga se kuva Pasika, Jesu i lo chikela Betania, laha a nga tshama Lazaru, loyi Jesu a nga mu vuxa hi ka vafileko. [272]

²Va lo mu mahela xilalelo kona, na Marta a yimelela; na Lazaru i wa hi munwe wa lava va nga tshamile naye kugeni. [273]

³Zonake Maria i lo teka a mafura yo nuhela ya spikenarda, a xipimo xa khihlanya ga kilo, ma nga hi ni tsengo wa hombe, a tota mikonzo ya Jesu, a yi kulula hi misisi yakwe; ni yindlu yi lo tala hi kunuhela ka mafura. [274]

⁴Kanilezi Judasi Iskarioti, a nga hi munwe wa vapizani vakwe, loyi a ta ngava a mu tokometa, aku:

⁵Hikuyini a mafura laya ma nga kala ku xava a 300 wa macheleni, ku hiwa zisiwana ke?

⁶I lo wula lezo, na ku nga hilezi a nga chela kota hi zisiwana, kanilezi hilezi a nga hi khamba, a yiva lezi zi vekiwako xikhwameni, lexi a nga hi mukhomi wa xona. [275]

⁷Jesu aku ngalo: Mu tsikeni, ngha a ma hlayisela a siku ga kulahliwa ka mina.

⁸Hakuva a zisiwana zi na nwina xikhati xontlhe, kanilezi a mu na mina xikhati xontlhe. [276]

⁹A vanhu vanyingi va vaJuda va lozwa lezaku Jesu i kona laho, va lota, na va nga teli ku ta wona Jesu yece, kanilezi kasi va fela ku wona na Lazaru, loyi a nga mu vuxile kufeni. [277]

¹⁰Kanilezi a vapristi va hombe va lo tsema khungo lezaku va daya na yena Lazaru; [278]

¹¹hakuva a vaJuda vanyingi va va tsikile hi kota ya yena, va ya kholwa ka Jesu.

¹²Hi manziko wa kona a xidlemo xa hombe xi nga tile mubuzweni, na xi zwile lezaku Jesu wata Jerusalema, [279]

¹³va lo teka mahanga ya micinzu, va huma ku ya mu tlhangaveta, va kanyuluka, vaku: Hozana; a ku khesiwe yena loyi a tako vitweni ga Hosi, loyi a nga Hosi ya vaIsraeli. [280]

¹⁴Jesu i wa kumile a ximbongolana, a xi khilela; kota lezi ku tsalilweko, ku ngalo: [281]

¹⁵U nga chavi, nhanyana wa Zioni; languta, a Hosi ya wena yata, na yi khilele a role ga mbongola. [282]

¹⁶A mhaka leyi a vapizani vakwe a va yi pimangi hi kusanguleni; kanilezi laha Jesu a nga kulisilwe, va lo alakanya lezaku ku wa tsalilwe lezo ha yena, ni lezaku va mu mahele zona. [283]

¹⁷Makunu a xidlemo lexi xi nga hi zinwe naye laha a nga vitana Lazaru a huma xilahleni, a mu vuxa kufeni, va lo hlawutela lezi va zi wonileko.

¹⁸Hi kota ya lezo ku lo huma vanwani vanhu kambe, hilezi va nga zwile hi xiwoniso lexi a xi mahileko.

¹⁹Lezo a vaFarisi va lo wulawula xikari kabye, vaku: Langutani, a mu vuni nchumu; mangabye, a tiko gontlhe ga mu lanzisela. [284]

²⁰Ku wa hi kona a vaGreki vo kari xikari ka lava va tileko a ku ta khozela mubuzweni. [285]

²¹Vona va lota ka Filipu wa le Betsaida ga Galilea, va mu kombela, vaku: Hosi, hi wa lava ku wona Jesu. [286]

²²Filipu i lo ya byela Andreu; Andreu na Filipu va ya byela Jesu.

²³Jesu i lo va hlamula, aku: Makunu xi chikele a xikhati xa kuva Nʼwana wa munhu a dumiswa. [287]

²⁴Hizinene nziku ka nwina: Loku a mbewu ya mavele yi ngawi misaveni yifa, yi ta tshama yoce; kanilezi loku yifa, ya pswala nguvu. [288]

²⁵Loyi a ranzako kuhanya kakwe i ta lahlekelwa ha kona; kanilezi loyi a vengako kuhanya kakwe lomu tikweni, i ta ku hlayisela wutomini ga pinzukelwa. [289]

²⁶Loku munhu a nzi tirela, a nzi lanzele; ni laha nzi nga kona, i ta va kona loyi a nzi tirelako. Loku munhu a nzi tirela, yaloye i ta dzunziwa hi Dadani. [290]

²⁷Makunu a muhefemulo wa mina wa karateka; nzi ta kuyini ke? Dadani, nzi ponise ka lexi xikhati? Kanilezi hi xigelo lexi nzi tileko ka xona a xikhati lexi. [291]

²⁸Dadani, dumisa a vito ga wena! Kwalaho ku lota gezu hi le tilweni, giku: Nzi gi dumisile, nzi ta engeta nzi gi dumisa. [292]

²⁹A xidlemo lexi xi nga yimile laho, xi lo gizwa, xiku: Ku dzinzile. A vanwani vaku; I ngelosi yi wulawulileko ka yena.

³⁰Jesu i lo hlamula, aku: Legi gezu a gi tangi hi kota ya mina, kanilezi hi kota ya nwina. [293]

³¹Makunu a tiko ga lamuliwa; a hosana ya legi tiko yi ta hlongolwa makunu. [294]

³²Mina loku nzi tlakusilwe misaveni, nzi ta kokela vanhu vontlhe ka mina. [295]

³³Kanilezi i lo wula lezo, a kombisa a fela legi a ta nga fisa gona.

³⁴A xidlemo xi lo mu hlamula, xiku: Hi zwile nayweni lezaku Kristu i ta tshama kala kupinzuka; hi yini u wulako uku: A Nʼwana wa munhu i yimelwe hi ku tlakuswa ke? Hi mani yena Nʼwana loye wa munhu ke? [296]

³⁵Jesu aku ngalo kabye: A kuwonekela ka ha hi na nwina a xikhatanyana. Fambani na ma ha hi ni kuwonekela, kasi a munyama wu nga mu kamanyeti. Loyi a fambako munyameni a nga ku tivi laha a yako kona. [297]

³⁶Kholwani hi kuwonekela na ma ha hi nako, kasi ma fela ku maha vanana va kuwonekela. Jesu i lo kanela timhaka leti, a suka ka vona, a ya ti fihla. [298]

³⁷Hambu lezi a nga mahile a ziwoniso zinyingi mahlweni ka vona, a va kholwangi ka yena;

³⁸kasi yi fela ku tatiseka a mhaka ya muprofeti Isaya, leyi yi nge ngalo: Hosi, himani a kholilweko lezi hi nga byeliwa zona ke? A woko ga Hosi gi wonekelisilwe ka mani ke? [299]

³⁹Hi kota ya lexi va wa nga zi koti ku kholwa, hakuva Isaya i te ngalo kambe:

⁴⁰I phumisile mahlo yabye, a nonohisa timbilu tabye; Ku nga taku va wona hi mahlo yabye, va pima hi timbilu tabye; Va hunzuluka, nzi va hanyisa. [300]

⁴¹Isaya i lo wula lezo, hakuva i wonile a kungangamela kakwe, a kanela ha yena, [301]

⁴²Ahemba-lokoke, hambu ni vanyingi va vahombe va lo kholwa ka yena; kanilezi a va zi wulangi hi kota ya vaFarisi, hi lezaku va nga humeswa sinagogeni;

⁴³hakuva va wa ranza ku dzunziwa hi vanhu a ku hunza ku dzunziwa hi Nungungulu: [302]

⁴⁴Zonake Jesu i lo kanyuluka, aku: Loyi a kholwako ka mina, a nga kholwi ka mina, kanilezi i kholwa ka loyi a nzi rumileko. [303]

⁴⁵Loyi a nzi wonako, wa mu wona loyi a nzi rumileko.

⁴⁶Nzi tile nzi hi kuwonekela tikweni, lezaku ni wihi a kholwako ka mina a nga tshami munyameni. [304]

⁴⁷Loku munhu azwa a timhaka ta mina, a nga ti hlayisi, mina a nzi mu lamuli; hakuva a nzi telangi ku ta lamula tiko, kanilezi ku ta hanyisa tiko. [305]

⁴⁸Loyi a nzi alako, a nga amukeliko a timhaka ta mina, i na ni mulamuli loyi a mu lamulako; a mhaka leyi nzi nga yi wulawula, hi yona leyi yi ta nga mu lamula hi siku go gumesa. [306]

⁴⁹Hakuva a nzi kanelangi hi wutsumbu ganga; kanilezi Dadani loyi a nzi rumileko, i nzi layile hi lezi nzi ta nga wulawula, ni lezi nzi ta nga kanela. [307]

⁵⁰Nza zi tiva lezaku a kulaya kakwe hi wutomi ga pinzukelwa; hikwalaho lezi nzi zi kanelako, nzi kanela zona kota lezi Dadani a nzi byelileko.