Read tshwa Johani 13 Bible Online

Johani 13 - tshwa bible

Johani 13

¹A mubuzo wa Pasika na wu nga se va kona, Jesu na a zi tiva lezaku a xikhati xakwe xi chikele xa kuva a suka tikweni, aya ka Dadani, lezi a nga ranza a vanhu vakwe lava va nga laha misaveni, i lo va ranza kala kugumesa, [308]

²Kwalaho xilalelweni, Satani i wa sina a vekile mbilwini ya Judasi Iskarioti nʼwana Simoni, aku a mu tokometa. [309]

³Jesu na a zi tiva ku ngalo, Dadani i wa vekile zilo zontlhe mandleni yakwe, niku i humele hi ka Nungungulu, iya ka Nungungulu, [310]

⁴I lo suka laha kugeni, a tlhatlha a nguwo yakwe; i lo teka tawula, a ti boha. [311]

⁵Zonake i lo chela mati xibyeni, a sangula ku hlambisa vapizani mikonzo, a yi hlanguta hi tawula legi a nga ti bohile ha gona.

⁶Ata ni ka Simoni Pedro, loyi a ngaku ka yena: Hosi, wena u ta hlambisa mikonzo ya mina ke?

⁷Jesu i lo hlamula aku kakwe: Lezi mina nzi zi mahako a ku zi tivi makunu; kanilezi hi lenzhako u ta zi tiva. [312]

⁸Pedro aku ka yena: Cima u nga ta hlambisa mina mikonzo. Jesu aku kakwe: Loku nzi nga ku hlambisi, a ku na xiavelo zinwe na mina.

⁹Simoni Pedro aku ngalo kakwe: Hosi, yi ngavi mikonzo ya mina ntsena, kanilezi ni mandla ni hloko.

¹⁰Jesu aku kakwe: Loyi a hlambileko, a za ha laveki sine ku hlamba mikonzo yakwe, hakuva i hlazekile wontihe miri; na nwina mu hlazekile, kanilezi a hi nwina nwentlhe. [313]

¹¹Hakuva i wa mu tiva loyi a wa ta nga mu tokometa, hikwalaho aku: A mu hlazekangi nwentlhe.

¹²Zonake loku a hlambisile mikonzo yabye, i lo boha nguwo yakwe, a tshama kugeni kambe, aku ngalo kabye: Ma zi tiva lezi nzi mu maheleko zona ke?

¹³Mu nzi vitana muku: Mugonzisi, ni Hosi; mu wula zona, hakuva hi mina yena. [314]

¹⁴Makunu loku mina nzi nga Hosi ni Mugonzisi, nzi mu hlambisile mikonzo, na nwinawu mu fanele ku hlambisana mikonzo. [315]

¹⁵Hakuva nzi mu nyikile xikombiso, kasi na nwinawu ma fela ku maha kota lezi nzi mahileko ka nwina. [316]

¹⁶Hizinene nziku ka nwina: A nanza a hi ga hombe ku hunza a hosi ya gona; ni ntsumi a hi wa hombe ku hunza loyi a wu rumileko. [317]

¹⁷Loku mu tiva a timhaka leti, mu katekile loku mu ti maha. [318]

¹⁸A nzi wulawuli ha nwina nwentlhe; nza tiva lava nzi va hlawulileko; aku kasi wu fela ku tatiseka a mutsalo lowu wu nge ngalo: Loyi a gako zibaba za mina, i nzi tlakusele xirenze. [319]

¹⁹Nza mu byela lezi makunu, na zi nga se ku maheka, kasi loku zi mahekile, mu fela ku kholwa lezaku hi mina yena.

²⁰Hizinene nziku ka nwina: Loye a amukelako loyi nzi mu rumako i amukela mina: ni loyi a nzi amukelako mina, i amukela loyi a nzi rumileko. [320]

²¹Laha Jesu na a wulile lezo, i wa karateka moyeni, a tiyisa aku: Hizinene nziku ka nwina, a munwe wa nwina i ta nzi tokometa. [321]

²²A vapizani va lo cuwukana, va kohlwa hi loyi a mu wulako.

²³Kwalaho mezeni a munwe wa vapizani vakwe i wa khegele xifuveni xa Jesu, hi loyi Jesu a nga mu ranza. [322]

²⁴Simoni Pedro i lo kweneta ka yena, aku kakwe: Hi byele loyi a wulako ha yena.

²⁵Yena i lo khegela laha xifuveni xa Jesu, aku ka yena: Hosi, himani?

²⁶Jesu i lo hlamula, aku: Hi loyi nzi ta nga peta a xikhemu, nzi mu nyika. Lezo na a petile xikhemu, i lo xi nyika ka Judasi, nʼwana Simoni Iskarioti.

²⁷Laha na a amukele xikhemu, Satani i lo enghena kakwe. Jesu aku kakwe: Lezi u zi mahako, hatlisa u zi maha. [323]

²⁸Ku wa nga hi na munhu laha mezeni loyi a nga zi tiva ku ngalo, a wula yini ka yena.

²⁹Hakuva a vanwani va lo alakanya lezaku, lezi Judasi a nga khoma xikhwama, Jesu a mu byela ku, Xava lezi hi zi lavako mubuzweni, kutani ku ya nyika nchumu ka zisiwana. [324]

³⁰Zonake loku a tekile xikhemu i lo hatlisa a huma; gi wa hi wusiku.

³¹Laha na a humele, Jesu aku ngalo: Makunu Nʼwana wa munhu i dumisilwe, na Nungungulu i dumisilwe ka yena; [325]

³²ni Nungungulu i ta mu dumisa a ka wutsumbu gakwe, i ta mu dumisa zalezi. [326]

³³Vana vanga, xikhati xi tsongwani na nza ha hi na nwina. Mu ta nzi lava; kanilezi lezi nzi nga wula ka vaJuda, nziku: Lomo nzi yako kona, a mu zi koti kuta; makunu nza wula lezo ka nwina. [327]

³⁴Nza mu nyika a nayo muswa, wa kuva mu ranzana; khwatsi hilezi mina nzi mu ranzileko, na nwina ranzanani. [328]

³⁵Loku mu ranzana, a vanhu vontlhe va ta zi tiva lezaku mu vapizani va mina. [329]

³⁶Simoni Pedro aku ngalo kakwe: Hosi, uya kwihi? Jesu i lo hlamula, aku: Lomo nzi yako kona a ku zi koti ku nzi lanzela makunu; kanilezi anzhako u ta nzi lanzela. [330]

³⁷Pedro aku kakwe: Hosi, a nzi zi koti ku ku lanzela makunu hikuyini ke? Nzi ta tsika ni wutomi ga mina hi kota ya wena. [331]

³⁸Jesu i lo hlamula, aku: U ta tsika a wutomi ga wena hi kota ya mina ke? Hizinene nziku ka wena: A nkuku wu nga taba, u kala u nzi kaneta kunharu.