Read tshwa Johani 14 Bible Online

Johani 14 - tshwa bible

Johani 14

¹A timbilu ta nwina ngha ti nga karateki; kholwani ka Nungungulu, mu kholwa ka mina kambe. [332]

²Le ndlwini ya Dadani gi kona wutshamu ginyingi; loku zi wa nga hi lezo, ngha nzi mu byelile; hakuva nza famba a ku ya mu longisela wutshamu. [333]

³Hambu loku nzi famba nzi ya mu longisela wutshamu, nzi ta wuya kambe, nzi ta mu teka muta ka mina; kasi laha nzi nga kona, mu fela kuva kona na nwinawu. [334]

⁴Ni lomo nzi yako kona, ma yi tiva a ndlela.

⁵Tomasi aku kakwe: Hosi, a hi ku tivi lomo u yako kona; hi ta tivisa kuyini a ndlela ke?

⁶Jesu aku kakwe: Mina nzi ndlela, ni zinene, ni wutomi; a nga kona a tako ka Dadani, loku a ngati ha mina. [335]

⁷Loku mu wa nzi tivile, ngha mu tivile ni Dadani kambe; a kusukela lezi ma mu tiva, mu mu wonile. [336]

⁸Filipu aku ngalo kakwe: Hosi, hi wonise Dadani, zi ta hi enela.

⁹Jesu aku kakwe: Kale na nzi tshamile na nwina, kasi a ku nzi tivi ke, Filipu? Loyi a wonileko mina, i wonile ni Dadani: u wulawula hikuyini uku, hi wonise Dadani? [337]

¹⁰A ku kholwi lezaku mina nzi kona ka Dadani, ni Dadani i kona ka mina ke? A timhaka leti nzi ti wulawulako ka nwina, a nzi ti kaneti hi wutsumbu ganga; kanilezi hi Dadani a tshamileko ka mina a mahako mitiro yakwe. [338]

¹¹Kholwani hi mina lezaku nzi kona ka Dadani, ni Dadani ka mina; loku zi nge nghaho, kholwani ka mina hi kota ya yona mitiro.

¹²Hizinene nziku ka nwina: Loyi a kholwako ka mina, yenawu i ta maha mitiro leyi nzi yi mahako; ni mitiro ya hombe yo hunza leyi i ta yi maha, hakuva nziya ka Dadani. [339]

¹³Ni xihi lexi mu ta nga xi kombela hi vito ga mina, nzi ta xi maha, lezaku Dadani i fela ku dumiswa ka Nʼwana. [340]

¹⁴Loku mu kombela xa nchumu hi vito ga mina, nzi ta xi maha.

¹⁵Loku mu nzi ranza, mu ta hlayisa milayo ya mina. [341]

¹⁶Nzi ta kombela ka Dadani, i ta mu nyika munwani Muyimeli, kasi a tshama na nwina kala kupinzuka, [342]

¹⁷wu nga Moya wa zinene, lowu tiko gi nga zi kotiko ku wu amukela; hakuva a gi wu woni, hambu ni ku wu tiva; kanilezi nwina ma wu tiva, hakuva wu tshama na nwina, wu ta tshama nzeni ka nwina. [343]

¹⁸Nzi nga ta mu siya na mu hi zisiwana, nzi tata ka nwina. [344]

¹⁹Ka ha hi xikhatanyana, zonake a tiko gi nga ta ha nzi wona; kanilezi nwina mu ta nzi wona, hakuva nza hanya, na nwina mu ta hanya. [345]

²⁰Hi lego siku mu ta zi tiva lezaku nzi kona ka Dadani, na nwina ka mina, na mina ka nwina.

²¹Loyi a nga ni milayo ya mina, a yi hlayisa, hi yena loyi a nzi ranzako; ni loyi a nzi ranzako, i ta ranziwa hi Dadani; na mina nzi ta mu ranza, nzi ta ti wonekisa ka yena. [346]

²²Judasi (na ku nga hi yena Iskarioti), aku kakwe: Hosi, u ta ti wonekisa kuyini ka hina, u nga ti wonekisi ka tiko ke? [347]

²³Jesu i lo mu hlamula, aku: Loku munhu a nzi ranza, i ta hlayisa timhaka ta mina; Dadani i ta mu ranza, zonake hi tata ka yena, hi tshama zinwe naye. [348]

²⁴Loyi a nga nzi ranziko, a nga hlayisi timhaka ta mina; kasi a mhaka leyi mu yi zwako a hi ya mina, kanilezi nja Dadani loyi a nzi rumileko. [349]

²⁵A timhaka leti nzi ti kanele ka nwina, na nza ha hi na nwina.

²⁶Kanilezi a Muyimeli, a nga Moya wa ku Basa, loyi Dadani a ta nga mu rumela hi vito ga mina, yena i ta mu gonzisa zontlhe, a mu alakanyisa zontlhe lezi nzi wulawulileko ka nwina. [350]

²⁷A kurula nza ku siya ka nwina; nza mu nyika a kurula ka mina; a nzi mu nyiki kota lezi gi nyikisako zona tiko. A timbilu ta nwina ngha ti nga karateki, hambu ni ku chava. [351]

²⁸Mu zwile lezi nzi ngaku ngalo ka nwina: Nza famba, nzi tlhela nzi wuya ka nwina. Loku mu wa nzi ranza, mu wa ta tsaka hilezi nzi yako ka Dadani; hakuva Dadani ngwa hombe a ku hunza mina. [352]

²⁹Makunu nzi mu byelile na zi nga se ku maheka, kasi loku zi mahekile mu fela ku kholwa.

³⁰Nzi nga ta ha wulawula nguvu na nwina, hakuva a hosana ya tiko yata; kanilezi a yi na nchumu ka mina, [353]

³¹kanilezi zi maheka kasi tiko gi fela ku zi tiva lezaku nza mu ranza Dadani, ni lezaku nzi maha lezi Dadani a nzi layileko. Vukani, a hi sukeni laha. [354]