Read tshwa Johani 18 Bible Online

Johani 18 - tshwa bible

Johani 18

¹Laha Jesu a nga kanele leti timhaka, i lo huma ni vapizani vakwe vaya tlhatuko wa xicongwana Kidroni, laho gi nga hi kona simu; i lo enghena kona, yena ni vapizani vakwe. [415]

²Kanilezi Judasi kambe, loyi a nga mu tokometa, i wa gi tiva lego wutshamu; hakuva Jesu i wa tolovele ku tlhangana kona ni vapizani vakwe. [416]

³Judasi na a tekile a ntlawa wa vanyakasani, ni malanza ya vapristi va hombe ni ya vaFarisi, va loya laho na va welele minwenge ni zihlahle ni matlhari. [417]

⁴Jesu na a zi tiva zontlhe zi ta nga mu humela, i lo huma aku ngalo kabye: Mu lava mani ke?

⁵Va lo mu hlamula, vaku: Ha lava Jesu wa le Nazareta. Jesu aku kabye: Hi mina loyi. Na yena Judasi, loyi a mu tokometako, i wa yimile navo.

⁶Laha Jesu a nge ngalo kabye: Hi mina loyi, va lo hlehla hi lenzhako, va su gangatsala lahasi misaveni.

⁷Jesu i lo va wutisa kambe, aku: Mu lava mani ke? Vaku ngalo: Ha lava Jesu wa le Nazareta.

⁸Jesu i lo hlamula, aku: Nzimu byelile nziku: Hi mina loyi. Loku mu lava mina, va tsikeni lava, va ti fambela.

⁹Hakuva yi wa fanele ku tatiseka a mhaka leyi a nga yi wulile, yaku: A nzi lahlangi ni munwe wa lava u nzi nyikileko vona. [418]

¹⁰Simoni Pedro loyi a nga hi ni supado, i lo yi hlomula, aba nanza ga mupristi wa hombe, a mu tsema a ndleve ya xinene. A vito ga nanza lego i wa hi Malkusi. [419]

¹¹Kanilezi Jesu aku ngalo ka Pedro: Tihomeka a supado kocelweni; a gombe legi a nzi nyikileko Dadani, nzi nga ginwi ke? [420]

¹²Zonake a ntlawa lowu ni nduna ya wona, zinwe ni malanza ya vaJuda, va lo khoma Jesu, va mu boha.

¹³Va lo mu yisa ka Anasi kusangula; hakuva i wa hi mukonʼwana wa Kayafasi, loyi a nga hi mupristi wa hombe lego lembe. [421]

¹⁴Ku wa hi Kayafasi loyi a nga nyika wusungukati ka vaJuda ga ku ngalo: Zi sasekile lezaku munhu munwe a fela tiko. [422]

¹⁵Simoni Pedro i lo lanzela Jesu, a maha lezo ni munwani mupizani. A mupizani loyi i wa hi xinetsi ka mupristi wa hombe, i lo enghena zinwe na Jesu a hubyeni ya mupristi wa hombe. [423]

¹⁶Kanilezi Pedro i wa yimile laha nyangweni hi lehandle. Lezo loyi munwani mupizani a nga hi xinetsi ka mupristi wa hombe, i lo huma a ya wulawula ni wasati loyi a rinzelako nyangwa, a enghenisa Pedro.

¹⁷Zonake a nanza ga xisati legi gi nga rinzela a nyangwa gi te ngalo ka Pedro: Wenawu u mupizani wa loyi munhu ke? Yena aku: A nzi yena.

¹⁸Ku wa yimile kwalaho a tikhumbi ni malanza, na va dzivele nzilo wa makhala; hakuva ku wa hi xirami; na yena Pedro kambe i wa yimile navo a wora nzilo.

¹⁹A mupristi wa hombe i lo wutisa Jesu hi vapizani vakwe, ni gonzo yakwe.

²⁰Jesu i lo mu hlamula, aku: Nzi kanele kubaseni lomu tikweni; nzi wa gonzisa masinagogeni, ni lomo tempeleni, laha va tsombanako kona a vaJuda vontlhe; a nzi kanetangi nchumu xihundleni. [424]

²¹Hi yini u nzi wutisako mina ke? Wutisa lava va nga kari va nzizwa lezi nzi nga kanela ka vona; hi vona va zi tivako lezi nzi nga zi wulawula.

²²Laha a nga wulile lezo, a ginwe ga malanza lawa ma nga yimile laho gi lo phakata Jesu, giku: Wena u mu hlamulisa lezo a mupristi wa hombe ke? [425]

²³Jesu i lo hlamula, aku: Loku nzi wulawulile kubiha, kombisa a kubiha ka kona; kanilezi loku nzi wulawulile khwatsi, hi yini u nzi phakatako ke?

²⁴Zonake Anasi i lo mu rumela na a bohilwe ka Kayafasi a mupristi wa hombe. [426]

²⁵Kanilezi Simoni Pedro i wa yimile a kari a wora nzilo. Vaku ngalo kakwe: Wenawu a ku mupizani wa yena ke? I lo kaneta, aku: A nzi yena. [427]

²⁶A munwe wa malanza ya mupristi wa hombe, na hi xaka ga loyi a nga tsemiwa ndleve hi Pedro, aku ngalo: Xana nzi wa nga ku wonangi zinwe naye le sinwini ke?

²⁷Pedro i lo kaneta kambe; zalezo a nkuku wu lo yimba.

²⁸Zonake va lo huma na Jesu le ka Kayafasi, va mu yisa ndlwini ya wuhosi, yi wa hi mixo nguvu. Vona a va enghenangi ndlwini ya wuhosi, va nga ti nyenyezisa, kasi va ta zi kota kuga a pasika. [428]

²⁹Hikwalaho Pilatu i lo huma ka vona, aku: I keco muni mu nehako hi loyi munhu ke?

³⁰Va lo hlamula, vaku ngalo kakwe: Loku munhu loyi a wa nga onhangi, ngha hi nga mu nehangi ka wena.

³¹Pilatu aku ngalo kabye: Mu tekeni nwina venyi, mu mu lamula kota nayo wa nwina. A vaJuda vaku kakwe: A hi vumelwi hina ku daya munhu.

³²Kasi yi fela ku tatiseka a mhaka ya Jesu, leyi a nga yi wulawula, na a wonisa a fela legi a ta nga fisa gona. [429]

³³Pilatu i lo tlhela a enghena ndlwini ya wuhosi, a vitana Jesu aku ngalo kakwe: Wena u hosi ya vaJuda ke? [430]

³⁴Jesu aku ngalo: U wula lexi hi wutsumbu ga wena ke, kutani u lo byeliwa hi vanwani ha mina ke?

³⁵Pilatu i lo hlamula, aku: Nzi muJuda-kuloni mina ke? A tiko ga wena ni vapristi va hombe va ku nyikele ka mina; xini u xi mahileko ke?

³⁶Jesu i lo hlamula, aku: A mufumo wa mina a hi wa misava; loku a mufumo wa mina wu wa hi wa misava, zonake a malanza ya mina ngha ma lwile, kasi nzi nga nyikelwi ka vaJuda: kanilezi makunu a mufumo wa mina a hi wa lomu. [431]

³⁷Zonake Pilatu aku ngalo kakwe: Kasi wena u hosi ke? Jesu i lo hlamula, aku: Wa wula wena uku nzi hosi. Nzi belekelwe lezo, nzi tele lezo tikweni, lezaku nzi fela ku kustumunya hi zinene. Vontlhe lava va nga va zinene, va ingisa a gezu ga mina. [432]

³⁸Pilatu aku ka yena: Xini zinene? Loku a wulile lezo, i lo huma kambe aya ka vaJuda, aku ngalo kabye: A nzi kumi nanzu ka yena. [433]

³⁹Kanilezi mu na ni mukhuwo, wa ku ngalo, nzi mu tlhatlhela munhu hi Pasika; makunu ma zi ranza lezaku nzi mu tlhatlhela a Hosi ya vaJuda ke? [434]

⁴⁰Kanilezi va lo kanyuluka kambe, vaku: U nga tlhatlhi loyi munhu, tlhatlha Barabasi. Makunu Barabasi i wa hi khamba. [435]