Read tshwa Johani 19 Bible Online

Johani 19 - tshwa bible

Johani 19

¹Zonake Pilatu i lo laya lezaku Jesu a xupulwa. [436]

²A masochwa ma lo luka a xidlodlo xa mizwa, va xi tlhateka hlokweni yakwe, va mu ambexa hi nguwo ya xiwunguwungu;

³va tshinela ka yena, vaku ngalo: Xewe, Hosi ya vaJuda! va mu phakata.

⁴Pilatu i lo huma kambe, aku kabye: Langutani, nzi ta mu humesa ka nwina, kasi mu fela ku zi tiva lezaku a nzi kumi nanzu ka yena.

⁵Jesu i lo huma handle, na a ambele a xidlodlo xa mizwa ni nguwo ya xiwunguwungu. Pilatu aku ngalo kabye: Cuwukani a munhu loyi!

⁶Kanilezi a vapristi va hombe ni malanza loku va mu wonile, va lo kanyuluka, vaku: Mu belele, mu belele! Pilatu aku ngalo kabye: Mu tekeni nwina venyi, mu mu belela; hakuva mina a nzi kumi nanzu ka yena. [437]

⁷A vaJuda va lo hlamula, vaku; Hina hi na ni nayo, hi nayo lowu i yimelwe hi kufa, hakuva i ti mahile a Nʼwana wa Nungungulu. [438]

⁸Pilatu na a zwile leyi mhaka, i lo chava nguvu;

⁹a enghena kambe ndlwini ya wuhosi, aku ngalo ka Jesu: Uta hi kwihi ke? Kanilezi Jesu a nga mu hlamulangi nchumu. [439]

¹⁰Pilatu aku ka yena: A ku nzi hlamuli nchumu ke? Xana a ku zi tivi lezaku nzi na ni ntamu ku ku tlhatlha, ni ntamu a ku ku belela ke?

¹¹Jesu i lo mu hlamula, aku: Ngha u nga hi na ntamu hehla ka mina, loku u nga nyikiwangi wona hi le hehla; hikwalaho loyi a nzi nyikeleko ka wena i na ni nanzu wa hombe. [440]

¹²Makunu Pilatu i wa lava ku mu tlhatlha; kanilezi a vaJuda va lo kanyuluka, vaku: Loku u tlhatlha loyi munhu, a ku xaka ga Kesari; hakuva ni wihi a ti mahako hosi i kanyisa Kesari. [441]

¹³Laha Pilatu na a ti zwile leti timhaka, i lo humesa Jesu lahandle, a tshama xitshanwini xa kulamula, a ka wutshamu gi vitwako, Maribye, kanilezi hi xiHeberu, Gabata.

¹⁴Makunu ku wa hi siku go longisela Pasika; hi xikhati xa hora ya wuntlhanu ni xinwe. Pilatu aku ngalo ka vaJuda: Mangabye, a hosi ya nwina! [442]

¹⁵Va lo kanyuluka, vaku: Mu suse, mu suse, mu belele! Pilatu aku kabye: Nzi belela a hosi ya nwina ke? A vapristi va hombe va lo hlamula, vaku: A hi na hosi saseka Kesari. [443]

¹⁶Zonake i lo mu nyikela kabye, a kuva a belelwa.

¹⁷Vona va lo khoma Jesu va famba naye. I lo huma na a ti rwalele a xihambano xakwe, aya wutshanwini gi vitwako ku ngalo: Xikodo, hi xiHeberu ku ngalo, Golgota. [444]

¹⁸Hi laho va nga mu belela kona; ku belelwa zinwe naye a vanwani va vambiri, munwe hi seyi ni munwani hi seno, Jesu hi laha xikari.

¹⁹Pilatu i lo tsala papilo, a gi nameka laha xihambanweni; ku wa tsalilwe ku ngalo: Jesu wa le Nazareta, a Hosi ya vaJuda. [445]

²⁰A vaJuda vanyingi va lo gonza papilo legi, hakuva a wutshamu lego a nga belelwe kona Jesu, gi wa hi kusuhani ni muti; ni papilo gi wa tsalilwe hi xiHeberu, ni xiLatini, ni xiGreki.

²¹Hikwalaho a vapristi va hombe va vaJuda vaku ngalo ka Pilatu: U nga tsali lezaku, I Hosi ya vaJuda; kanilezi uku: I wa ku ngalo: Nzi Hosi ya vaJuda.

²²Pilatu i lo hlamula, aku: Lezi nzi zi tsalileko, nzi tsalile.

²³A masochwa laha na ma mu belele Jesu, ma lo teka a tinguwo takwe, ma avanyisa mune wa zipanze, lezaku sochwa ginwe ni ginwani gi teka xipanze xinwe. Va lo teka ni bhaji, kanilezi a bhaji gi wa nga hi na nzhungo, gi wa lukilwe kusukela le hehla kala magumo. [446]

²⁴Hikwalaho vaku ngalo: Hi nga gi hanzuli, kanilezi a hi hlahluveni, lezaku gi ta maha ga mani; kasi ku fela ku tatiseka a mutsalo, lowu wu nge ngalo: Va lo avana a tinguwo ta mina, Va hlahluveta a bhaji ga mina. A masochwa ma lo maha lezo. [447]

²⁵Kanilezi kusuhani ni xihambano xa Jesu ku wa yimile a nyine wakwe, ni makabye Wa nyine wakwe, a nga Maria a sati wa Klopasi, na Maria wa le Magdala. [448]

²⁶Laha Jesu na a wona a nyine wakwe, na a yimile kona zinwe ni mupizani loyi a mu ranzako, aku ka nyine wakwe: Wasati, a nʼwana wa wena hi loyi! [449]

²⁷Zonake aku ngalo ka mupizani: A nyine wa wena hi loyi! Kusukela lexo xikhati a mupizani i lo mu rurela kaya kakwe.

²⁸Anzhako ka lezo Jesu na a zi tiva lezaku zontlhe zi mbhelile; kasi mutsalo wu fela ku tatiseka aku ngalo: Nzi na ni tora. [450]

²⁹Laho ku wa vekilwe a xibya na xi tele hi viniga; lezo va lo tihomeka a kuvi lihlangeni la hisopi na gi tele hi viniga, va gi yisa nonwini wakwe. [451]

³⁰Jesu na a amukele viniga, aku ngalo: Ku mbhelile. Zonake i lo gowota hloko, afa. [452]

³¹A vaJuda hi ku chava lezaku a zirumbi zi ta sala zihambanweni hi siku ga sabado, hakuva a sabado lego gi wa hi ga hombe, hi siku go Longisela, va lo kombela Pilatu lezaku yi tshobyiwa milenge yabye, kasi va fela ku susiwa. [453]

³²Zonake a masochwa ma lota, ma ta tshova a milenge ya wo sangula ni ya munwani wa lava a nga belelwe navo;

³³kanilezi loku vata ka Jesu a va tshovangi milenge yakwe, hakuva va lo wona lezaku i wa sina a file.

³⁴Kanilezi a sochwa ginwe gi lo mu tlhava reve hi tlhari, zalezo ku lo huma nkhata ni mati. [454]

³⁵Loyi a zi wonileko i mahile wukustumunyu ha zona, ni wukustumunyu gakwe gi nene; wa zi tiva lezaku i wula zinene, kasi na nwinawu ma fela ku kholwa.

³⁶Hakuva lezi zi lo maheka, kasi wu fela ku tatiseka a mutsalo, lowu wu nge ngalo: Ku nga ta tshobyiwa ni rambu gihwe ka yena. [455]

³⁷A munwani mutsalo wu ngalo: Va ta mu cuwuka yena loyi va mu tlhavileko. [456]

³⁸Anzhako ka lezo Josefa wa le Arimatea, loyi a nga hi mupizani wa Jesu, kanilezi hi kufihlaleni hi ku chava vaJuda, i lo kombela Pilatu lezaku a vumelwa ku hawula a xirumbi xa Jesu; Pilatu i lo mu vumela. Zonake i lo famba, a ya susa a xirumbi xakwe. [457]

³⁹Ku lota kambe na Nikodemusi, loyi a nga ranga aya kakwe ni wusiku, a neha mure ni alosi na zi patsilwe, a xipimo xa 50 wa makilo. [458]

⁴⁰Lezo va lo teka a xirumbi xa Jesu, va xi petsela hi tinguwo to basa, zinwe ni mipepo, khwatsi hi malahlela ya xijuda. [459]

⁴¹Makunu a wutshanwini legi a nga belelwa kona gi wa hi kona a simu, ni le sinwini wu wa hi kona a nkele muswa, lowo cima ku wa nga se ku vekiwa munhu kona.

⁴²Hi laho va nga mu lahla kona Jesu hi kota ya Kulongisela ka vaJuda, hakuva a xilahla xi wa hi kusuhani. [460]