Read tshwa Johani 20 Bible Online

Johani 20 - tshwa bible

Johani 20

¹Hi siku go ranga ga viki, Maria wa le Magdala i lo famba xilahleni ni mpunzu, na ga ha te mphu, a wona ribye na gi susilwe nkeleni. [461]

²I lo tsutsuma aya ka Simoni Pedro, ni ka munwani mupizani loyi a nga kari a ranziwa hi Jesu, aku ngalo kabye: Va yi susile Hosi nkeleni, a hi ku tivi laha va yi vekileko kona. [462]

³Pedro ni munwani mupizani va lo suka, vaya xilahleni. [463]

⁴Va lo tsutsuma hi wumbiri gabye; kanilezi munwani mupizani i lo siya Pedro, a ranga a chikela laha nkeleni;

⁵na a koramile a hlomela lomo nzeni, i lo wona a tinguwo to basa na ti hi kona laha hasi, kanilezi a nga enghenangi lomo nzeni. [464]

⁶Zonake Simoni Pedro a mu lanzela a chikelawu, a enghena nkeleni, a wona tinguwo na ti hi kona laha hasi,

⁷ni lesu kambe leyi yi nga hi hlokweni yakwe, na yi nga hi zinwe ni tinguwo to basa, kanilezi na yi petsilwe yi vekiwa yoce tlhelweni.

⁸Zonake i lo enghenawu a munwani mupizani, loyi a nga ranga a chikela nkeleni, i lo wona a kholwa.

⁹Hakuva va wa nga se ku wu pima a mutsalo, lowu wu nge ngalo i fanele a ku vuka hi ka vafileko. [465]

¹⁰Zonake a vapizani va lo tlhela kaya kabye.

¹¹Kanilezi Maria i wa yimile lahandle ka nkele na a rila; kota lezi a nga rila, i lo korama a hlomela nzeni ka nkele, [466]

¹²a wona tingelosi timbiri leti ti ambeleko to basa na ti tshamile, yinwe hi le hlokweni, ni yinwani hi le mikonzweni, laha xirumbi xa Jesu xi nga tshamile kona.

¹³Ti ku ngalo ka yena: Wasati, u rilela yini ke? Aku ka tona; Hilezi va susileko a Hosi ya mina, a nzi ku tivi laha va yi vekileko kona.

¹⁴Laha na a wulile lezo, i lo hunzuluka, a wona Jesu na a yimile; kasi i wa nga zi tivi lezaku hi Jesu. [467]

¹⁵Jesu aku ngalo kakwe: Wasati, u rilela yini ke? Maria na a alakanya lezaku hi murimi wa simu, aku ka yena: Hosi, loku u mu susile laha, nzi byele laha u mu vekileko kona, nzi ta ya mu teka.

¹⁶Jesu aku ngalo kakwe: Maria! Yena i lo hunzuluka, aku ka yena hi xiHeberu: Raboni; hi ku ngalo: Mugonzisi.

¹⁷Jesu aku ngalo kakwe: U nga nzi khumbi; hakuva a nzi se ku kanziha a kuya ka Dadani; kanilezi famba ka vanakulori, u yaku ka vona: Nza kanziha ka Dadani wa mina ni Dadani wa nwina, a Nungungulu wa mina ni Nungungulu wa nwina. [468]

¹⁸Maria wa le Magdala i lo ya byela vapizani, aku: Nzi yi wonile Hosi, niku yi mu byelile timhaka leto. [469]

¹⁹Laha gi nga hlwile gwalego siku, gi nga siku go ranga ga viki, na ti valilwe tivati laha vapizani va nga hi kona hi ku chava vaJuda, Jesu i lota a ta yima xikari kabye, aku ngalo: A kurula a kuve ka nwina. [470]

²⁰Laha na a wulile lexo, i lo va komba a mandla yakwe ni reve gakwe. A vapizani va lo tsaka hi ku wona Hosi. [471]

²¹Jesu i lo engeta aku kabye; A kurula a kuve ka nwina! Kota lezi Dadani a nzi rumileko, hizalezo na minawu nza mu ruma nwina. [472]

²²Laha na a wulile lezo, i lo va pupuxela, aku ka vona: Amukelani Moya wa ku Basa.

²³Lava mu va tsetselelako zionho zabye, va tsetselelwe zona; ni lava a zionho zabye mu zi bohako, zi bohelwe. [473]

²⁴Kanilezi Tomasi, a vitwako Didimusi, a munwe wa vakhume ni vambiri, i wa nga hi navo a kuteni ka Hosi. [474]

²⁵Zonake a vanwani vapizani vaku ngalo kakwe: Hi wonile Hosi. Kanilezi yena aku ngalo kabye: Loku nzi nga woni a timbanga ta tikhokho mandleni yakwe, nzi enghenisa a litiho la mina timbangeni ta tikhokho, nzi enghenisa a canja ga mina reveni gakwe, cima nzi nga ta kholwa.

²⁶Loku ku hunzile a ntlhanu wa masiku ni manharu, a vapizani vakwe va wa hi lomo ndlwini, na hi kona Tomasi. Na ti valilwe tivati, Jesu i lo ta yima xikari kabye, aku ngalo: A kurula a kuve ka nwina.

²⁷Zonake aku ngalo ka Tomasi: Tisa litiho la wena laha, a mandla ya mina hi laya; tisa a canja ga wena, u gi enghenisa laha reveni ga mina; u ngavi loyi a nga kholwiko, kanilezi kholwa. [475]

²⁸Tomasi i lo hlamula, aku kakwe: Hosi ya mina ni Nungungulu wa mina.

²⁹Jesu aku ngalo kakwe: U kholwa hilezi u nzi wonileko; va katekile lava va kholwako na va nga wonangi. [476]

³⁰Zinyingi a ziwoniso zinwani lezi Jesu a nga zi maha mahlweni ka vapizani, lezi zi nga tsaliwangiko bhukwini legi; [477]

³¹Kanilezi lezi zi tsalilwe, aku kasi mu fela ku kholwa lezaku Jesu hi Kristu, a Nʼwana wa Nungungulu; ni ku hi kukholwa mu fela kuva ni kuhanya vitweni gakwe. [478]