Read tshwa Johani 3 Bible Online

Johani 3 - tshwa bible

Johani 3

¹Ku wa hi kona a munwe wa vaFarisi, a vito gakwe hi Nikodemusi, a nga hi nghanakana ya vaJuda.

²Yena i lota ka Jesu ni wusiku, aku ngalo: Rabi, ha zi tiva lezaku u mugonzisi loyi a tileko hi ka Nungungulu; hakuva a ku na munhu a zi kotako ku maha a ziwoniso lezi u zi mahako, loku Nungungulu a nga hi naye. [46]

³Jesu i lo hlamula aku ngalo kakwe: Hakunene loku munhu a nga belekiwi luswa, a nga na ku wona mufumo wa Nungungulu. [47]

⁴Nikodemusi aku ngalo kakwe: A munhu i ta belekiswa kuyini na hi wa kale ke? I ta tlhela a enghena ga wumbiri rumbyini ga nyine, a wuya a belekiwa ke?

⁵Jesu i lo hlamula, aku: Kunenenene nziku ka wena: Loku munhu a nga belekiwi hi mati ni Moya, a nga na ku enghena mufunweni wa Nungungulu. [48]

⁶Lezi zi belekilweko hi nyama zi hi nyama; ni lezi zi belekilweko hi Moya zi hi moya.

⁷U nga hlamali hi lezi nzi ngaku ngalo ka wena: Mu fanele hi ku belekiwa luswa.

⁸A mheho yi pupuxa laha yi ranzako kona, u gizwa lungu ga yona, kanilezi a ku tivi laha yi tako ha kona, ni lomo yi yako kona; hizalezo vontlhe lava va belekilweko hi Moya. [49]

⁹Nikodemusi i lo hlamula, aku kakwe: Lezi zilo zi nga mahekisa kuyini ke?

¹⁰Jesu i lo hlamula, aku kakwe: Wena u mugonzisi wa Israeli, na u nga pimi a timhaka leti ke?

¹¹Hizinene nziku ka wena: Hi wula lezi hi zi tivako, hi maha wukustumunyu ga lezi hi zi wonileko, kanilezi a mu amukeli a wukustumunyu ga hina. [50]

¹²Lezi mu nga kholwiko loku nzi mu byela hi zilo za misava, mu ta kholwisa kuyini loku nzi mu byela hi zilo za le tilweni ke?

¹³A ku na munhu a kanzihileko le tilweni, sine loyi a releleko hi le tilweni, a nga Nʼwana wa munhu, loyi a nga hi le tilweni. [51]

¹⁴Kukotisa lezi Mosi a nga tlakusa a nyoka xiwuleni, hizalezo Nʼwana wa munhu i fanelwe ku tlakuswa; [52]

¹⁵aku kasi ni wihi a kholwako, ka yena ave ni wutomi ga pinzukelwa.

¹⁶Hakuva Nungungulu i lo ranza tiko kota lezi, a kala a nyikela a Nʼwana wakwe a belekilweko yece, kasi ni wihi loyi a kholwako kakwe a nga lovi, kanilezi ave ni wutomi ga pinzukelwa. [53]

¹⁷Hakuva Nungungulu a nga rumelangi a Nʼwana wakwe tikweni a kuta lamula tiko; kanilezi aku kasi a tiko gi fela ku hanyiswa hi yena. [54]

¹⁸Loyi a kholwako kakwe a nga lamulwi; kanilezi loyi a nga kholwiko i lamulwe ni zalezi, hakuva a nga kholwangi vitweni ga Nʼwana a belekilweko yece wa Nungungulu. [55]

¹⁹A kulamula hi kwaloku, lezaku a kuwonekela ku tile misaveni, kanilezi vanhu va ranzile munyama ku hunza kuwonekela; hakuva mitiro yabye yi wa bihile. [56]

²⁰Hakuva ni wihi a mahako kubiha wa venga kuwonekela, zonake a ngati kuwonekeleni, ku nga taku a mitiro yakwe yi tsetsulwa.

²¹Kanilezi loyi a mahako zinene, wata kuwonekeleni, kasi a mitiro yakwe yi fela ku woneka yiku dlunya, lezaku yi tisilwe ka Nungungulu.

²²Anzhako ka lezo, Jesu i loya tikweni ga Judia zinwe ni vapizani vakwe; a tshama navo laho, a bapatiza. [57]

²³Johani kambe i wa bapatiza le Enoni, kusuhi ni Salimi, hakuva hi kona ku nga hi ni mati manyingi; a vanhu va waya kona va ya bapatizwa.

²⁴Hakuva Johani i wa nga se ku khotselwa paxweni. [58]

²⁵Ku lo vuka a kukanetisana hi mhaka ya kuhlazeka, xikari ka vapizani va Johani ni muJuda wo kari.

²⁶Va lota ka Johani, vaku ngalo kakwe: Rabi, loyi a nga hi na wena le tlhatuko wa Jordani, loyi u nga kustumunya ha yena, yena wa bapatiza, ni vanhu vontlhe vaya ka yena. [59]

²⁷Johani i lo hlamula, aku: A munhu a nga na ku amukela nchumu, loku a nga nyikiwi zona hi le tilweni. [60]

²⁸Nwina mu vakustumunyu va mina, lezaku nzi te ngalo: A hi mina Kristu, kanilezi nzi rumilwe a ku mu rangela. [61]

²⁹Loyi a nga ni mutekiwa hi yena muteki; kanilezi a nyatsumi wa muteki, loyi a yimako kona a muzwa, wa tsaka nguvu hi kota ya gezu ga muteki; hi kona kutsaka loku ku tatisekileko ka mina. [62]

³⁰Yena i fanele ku anza, kanilezi mina nzi bohla.

³¹Loyi a tako hi le hehla i hehla ka vontlhe; loyi a nga wa misava ngwa misava, i wulawula hi za misava; loyi a tako hi le hehla i hehla ka vontlhe. [63]

³²I maha wukustumunyu hi lezi a zi wonileko ni lezi a zi zwileko; kanilezi a ku na munhu a amukelako a wukustumunyu gakwe.

³³Loyi a amukelako a wukustumunyu gakwe, wa tiyisa lezaku Nungungulu i tsumbekile. [64]

³⁴Hakuva loyi Nungungulu a mu rumileko, i wulawula timhaka ta Nungungulu; hakuva Nungungulu a nga nyiki Moya hi lipimo. [65]

³⁵A Dadani wa ranza Nʼwana, i vekile zilo zontlhe canjeni gakwe. [66]

³⁶Loyi a kholwako ka Nʼwana i na ni wutomi ga pinzukelwa; kanilezi loyi a nga ingisiko Nʼwana a nga ta wona wutomi, hakuva a khulo ga Nungungulu gi tshamile hehla kakwe. [67]