Read tshwa Johani 4 Bible Online

Johani 4 - tshwa bible

Johani 4

¹Laha Hosi na yi zi tivile lezaku vaFarisi va zwile ku ngalo, Jesu wa bapatiza ni ku maha vapizani vanyingi ku hunza Johani, [68]

²hambu lezi Jesu wutsumbu i wa nga bapatizi, kanilezi hi vapizani vakwe,

³i lo suka le Judia, a tlhelela Galilea.

⁴Kanilezi i wa yimelwe hi ku tsemakanya hi le Samaria.

⁵Lezo i lo chikela mutini wo kari wa le Samaria, wu vitwako Sikari, kusuhani ni tiko legi Jakobe a nga nyika Josefa a nʼwana wakwe; [69]

⁶ni hlowo ya Jakobe yi wa hi kona. Jesu i lo tshama laha hlobyeni, hakuva i wa karele hi kufamba. Ku wa hi hora ya wuntlhanu ni yinwe.

⁷Ku lota a wasati wa muSamaria a ku takha mati; Jesu i te ngalo kakwe: Hi nga nziha nzinwa.

⁸Hakuva a vapizani vakwe va wa yile mutini va ya xava zakuga.

⁹A wasati wa muSamaria aku ngalo kakwe: Hikuyini wena, na u hi muJuda, u kombelako mati ka mina, nzi nga wasati wa muSamaria ke? (Hakuva a vaJuda va wa nga tolovelani ni vaSamaria.) [70]

¹⁰Jesu i lo hlamula, aku kakwe: Loku u wa xi tivile a xinyikiwo xa Nungungulu, ni lezaku himani a nge ngalo ka wena: Hi nga nziha nzinwa, ngha u kombele yena, zonake ngha na yena a ku nyikile a mati ya kuhanya. [71]

¹¹A wasati aku ngalo kakwe: Hosi, u hava xa kukha ha xona, ni hlowo yi etile; u ta ma kuma kwihi a mati lawo ya kuhanya ke?

¹²Xana wena u wa hombe ku hunza a dadani wa hina Jakobe, loyi a nga hi nyika leyi hlowo ke, a nganwa kona yena, ni vana vakwe, ni mintlhambi yakwe?

¹³Jesu i lo hlamula, aku ngalo kakwe: Vontlhe lava va nwako laya mati va ta tlhela vazwa tora kambe;

¹⁴kanilezi kani hi wihi a nwako mati laya nzi mu nyikako wona, cima a nga tazwa tora; kanilezi a mati laya nzi mu nyikako wona, ma ta maha a xibuka xa mati nzeni kakwe, laya ma velako ma yisa wutomini ga pinzukelwa. [72]

¹⁵A wasati aku ngalo kakwe: Hosi, nzihe lawo mati, kasi nzi nga hazwi tora, nzi fela ku kala nzi nga ha khiringeli kambe ku takha. [73]

¹⁶Jesu aku ngalo kakwe: Famba, u ya vitana nuna wa wena, u wuya laha.

¹⁷A wasati i lo hlamula, aku ngalo kakwe: A nzi na nuna. Jesu aku kakwe: U wulile khwatsi uku, A nzi na nuna;

¹⁸hakuva u hanyile ni ntlhanu wa vanuna; ni loyi u nga naye lezi a hi nuna wa wena; u wulile zinene.

¹⁹A wasati aku ngalo kakwe: Hosi, nza zi wona lezaku u muprofeti. [74]

²⁰A vakoko va hina va wa khozela xitsungeni lexi; kasi nwina vaJuda mu wula lezaku a wutshamu lego a vanhu va faneleko ku khozela kona hi le Jerusalema. [75]

²¹Jesu aku ngalo kakwe: Wasati, zwana mina, xa hata xikhati laha va ta nga kala va nga khozeli Dadani xitsungeni lexi, ge ni le Jerusalema. [76]

²²Nwina mu khozela lexi mu nga xi tiviko; hina hi khozela lexi hi xi tivako; hakuva a kuhanyiswa ku huma hi ka VaJuda. [77]

²³Kanilezi xikhati xa hata, xi kona ni lezi, laha a vakhozeli va nene va ta nga khozela Dadani hi moya ni zinene; hakuva Dadani wa lava a vakunghahi a kuva vakhozeli vakwe. [78]

²⁴Nungungulu i Moya, ni lava va mu khozelako va fanele ku khozela hi moya ni zinene. [79]

²⁵A wasati aku ngalo kakwe: Nza zi tiva lezaku Messia wata, loyi a tibyako Kristu; loku a chikele, i ta hi tivisa zontlhe.

²⁶Jesu aku ngalo ka yena: Mina loyi nzi wulawulako na wena, nzi mina yena. [80]

²⁷Zalezo a vapizani vakwe va lo wuya, va hlamala hilezi a nga kari a wulawula ni wasati; hambu lezo ku wa nga hi kona ni munwe a ngaku: U lava yini? kutani: Hiyini u wulawulako naye?

²⁸Zonake a wasati i lo siya a fuko yakwe, aya mutini, a ya byela vanhu, aku:

²⁹Ma nga tani, mu ta wona a munhu loyi a nzi byelileko zontlhe lezi nzi zi mahileko; xana loyi a ngha nga a hi Kristu ke?

³⁰Va lo huma mutini, vaya ka Jesu.

³¹Na a sukile wasati, a vapizani va lo mu khongotela, vaku: Rabi, gana!

³²Aku ngalo kabye: Nzi na ni zakuga lezi mu nga zi tiviko.

³³A vapizani va wutisana vaku: Xana i kona munhu a mu neheleko zakuga ke?

³⁴Jesu aku kabye: A zakuga za mina hi ku maha a kuranza ka loyi a nzi rumileko, ni ku mbhetisa a ntiro wakwe. [81]

³⁵Xana a mu wuli muku: Ka ha sele mune wa tihweti, zonake kuva ni kutshovela? Kanilezi nziku ka nwina: Tlakusani a mahlo ya nwina, mu cuwuka masimu, lezaku ma te xwe a kuva ma tshovelwa. [82]

³⁶A mutshoveli i sina a amukela hakhelo, a hlengeletela mihanzu wutomini ga pinzukelwa; lezaku a muxwanyi ni mutshoveli va fela ku tsaka zinwe. [83]

³⁷Hakuva hi kwalaha gi wulako zinene a gezu legi gi nge ngalo: Munwe wa byala, ni munwani wa tshovela.

³⁸Nzi mu rumile a ku tshovela laha mu nga tirangiko kona; a vanwani va tirile, nwina mu enghenile ntirweni wabye.

³⁹A vaSamaria vanyingi va lowo muti va lo kholwa ka yena hi kota ya kuwulawula ka wasati, loyi a nga kustumunya aku: I nzi byelile zontlhe lezi nzi zi mahileko.

⁴⁰Zonake loku a vaSamaria va chikele ka: Jesu, va lo mu khongotela ku tshama navo; a tshama kona masiku mambiri.

⁴¹A vanwani vo tala va lo kholwa hi kota ya kuwulawula kakwe;

⁴²vaku ngalo ka wasati: Makunu a ha ha kholwi hi kota ya kuwula ka wena, hakuva hi ti zwele hi wutsumbu ga hina, ha zi tiva lezaku loyi hakunene hi Muhanyisi wa tiko. [84]

⁴³Anzhako ka masiku mambiri i lo suka laho, aya Galilea.

⁴⁴Hakuva Jesu wutsumbu i lo kustumunya lezaku a muprofeti a nga dzunziwi tikweni ga le kabye. [85]

⁴⁵Laha na a chikele Galilea, a vanhu va kona va lo mu amukela khwatsi, hilezi va nga wonile zontlhe lezi a nga zi mahile Jerusalema mubuzweni wa Pasika, hakuva na vona va wa yile mubuzweni. [86]

⁴⁶Yena i lo tlhela aya Kana wa le Galilea, laha a nga hunzula mati ma maha vinya. Laho yi wa hi kona a nduna yo kari, leyi yi nga babyelwa hi nʼwana wa yona le Kapernaume.

⁴⁷Laha na a zwile lezaku Jesu a tile le Galilea hi le Judia, i loya kakwe, a ya mu khongotela a kuva a relela, a ta hanyisa a nʼwana wakwe; hakuva i wa hi kusuhani ni kufa.

⁴⁸Jesu i te ngalo kakwe: Loku mu nga woni ziwoniso ni zirewukiso a mu kholwi. [87]

⁴⁹A nduna yiku kakwe: Hosi, relela a nwananga na a nga se kufa.

⁵⁰Jesu aku kakwe: Famba, a nʼwana wa wena i hanyile. Zonake a munhu loyi i lo kholwa a gezu legi Jesu a nga wulile kakwe, a ti fambela.

⁵¹Na a ha relela, a malanza yakwe ma lo mu khinga, maku: A nʼwana wa wena i hanyile.

⁵²Yena i lo va wutisa a xikhati a nga sangula ku kalamuka ha xona. Vaku kakwe: Atolo, hi hora ya wuntlhanu ni yimbiri a feveri yi lo mu tsika.

⁵³Lezo a raru loyi i lo zi tiva lezaku hi xwalexo xikhati Jesu a ngaku kakwe: A nʼwana wa wena i hanyile. Yena i lo kholwa ni yindlu yakwe yontlhe.

⁵⁴Lexi hi xiwoniso xa wumbiri lexi Jesu a nga xi maha le Galilea na ata hi le Judia.