Read tshwa Johani 5 Bible Online

Johani 5 - tshwa bible

Johani 5

¹Jesu a hanyisa mubabyi le Betesda. Anzhako ka lezo ku wa hi ni mubuzo munwani wa vaJuda; Jesu i lo kanziha aya Jerusalema. [88]

²Le Jerusalema xi kona a xitivana laha Nyangweni ya Tiyivu, xi vitwako hi xiHeberu ku ngalo Betesda, xi nga ni ntlhanu wa tigumbagumba. Neh. 3:1; 12:39

³A ka tona ku wa etlele a xidlemo xa hombe xa vababyi: a zikhumu, ni zilema, ni lava va khanyeneko ziro, na va lavelela a kuvindlukiswa ka mati.

⁴Hakuva a ngelosi yi wa relela hi zikhati zo kari, yi ta vindlukisa a mati ya lomu xitivaneni; zonake loyi a nga ranga a enghena matini loku mati ma vindlusilwe, i wa hanyiswa hi gihi wubabyi legi a nga hi nago.

⁵Laho ku wa hi ni munhu, loyi a nga hi wubabyini gakwe a 38 wa malembe.

⁶Laha Jesu a nga mu wona na a etlele kona, a zi tiva lezaku i tshamisile lezo a xikhati xa hombe, aku kakwe: Wa zi ranza ku hanyiswa ke?

⁷A mubabyi i lo mu hlamula, aku: Hosi, a nzi na munhu wa ku nzi peta xitivaneni laha mati ma vindlukiswa-ko; kanilezi loku nziku hi kuta, a munwani o relela mahlweni ka mina.

⁸Jesu aku ngalo kakwe: Vuka, u teka sango ga wena, u famba. Mat. 9:6 Mar. 2:11 Lu. 5:24

⁹Zalezo a munhu loyi i lo hanyiswa, a teka sango gakwe, a ti fambela. Kanilezi a siku lego gi wa hi sabado. [89]

¹⁰Hikwalaho a vaJuda vaku ka loyi a hanyisilweko: 1 sabado, a zi faneli ka wena a ku rwala a sango ga wena. [90]

¹¹Yena i lo va hlamula, aku: Loyi a nzi hanyisileko, i te ngalo ka mina: Teka sango ga wena, u famba.

¹²Va lo mu wutisa, vaku: Hi mani a munhu loyi a ngaku ka wena: Teka sango ga wena, u famba?

¹³Kanilezi loyi a hanyisilweko i wa nga zi tivi aku hi mani; hakuva Jesu i wa nyamalele, lezi ku nga hi ni vanhu vo tala wutshanwini lego.

¹⁴Anzhako ka lezo, Jesu i lo mu kuma tempeleni, aku ngalo kakwe: Wangabye, u hanyisilwe; u nga dzuki u onha kambe, ku nga taku a kubiha ka hombe ko hunza loku kuta hehla ka wena. [91]

¹⁵A munhu loyi i lo famba, a ya byela vaJuda, lezaku hi Jesu a mu hanyisileko.

¹⁶Hi kota ya lezi a vaJuda va lo sangula ku xanisa Jesu, hilezi a nga tira lezi zilo hi sabado.

¹⁷Jesu i lo hlamula, aku: Dadani wa ha tira ni lezi, na mina nza tira. [92]

¹⁸Hikwalaho ka mhaka leyi a vaJuda va lo hlota ku mu daya, hakuva a nga tshovangi sabado ntsena, kanilezi i lo vitana Nungungulu aku i Raru wakwe, a ti maha a ecana ni Nungungulu. [93]

¹⁹Jesu i lo hlamula, aku ngalo kabye: Hizinene nziku ka nwina: a Nʼwana a nga zi koti ku ti sangulela a tira nchumu, ntsena lezi a zi wonako na zi mahiwa hi Dadani; hakuva ni zihi zilo Dadani a zi mahako, lezo ni Nʼwana i zi mahisa lezo. [94]

²⁰Hakuva a Dadani wa mu ranza Nʼwana, wa mu kombeta zontlhe lezi a zi mahako yena wutsumbu; zonake i ta mu komba mitiro ya hombe yo hunza leyi, kasi mu fela ku hlamala. [95]

²¹Hakuva khwatsi hilezi Dadani a vuxako a vafileko a va hanyisa, hizalezo kambe a Nʼwana wa va hanyisa lava a zi ranzako. [96]

²²Tlhatakumbiri, Dadani a nga lamuli munhu ni munwe, kanilezi i hendleletele Nʼwana a kulamula kontlhe; [97]

²³kasi vontlhe va fela kuva ni xichawo hi Nʼwana, kota lezi va nga ni xichawo hi Dadani. Loyi a nga hiko na xichawo hi Nʼwana, a nga chavi ni Dadani loyi a mu rumileko. [98]

²⁴Hizinene, nziku ka nwina: Loyi a zwako a mhaka ya mina, ni ku kholwa loyi a nzi rumileko, i na ni wutomi ga pinzukelwa; zonake a ngati kulamulweni, kanilezi i humele kufeni, a enghena wutomini. [99]

²⁵Hizinene, nziku ka nwina: A xikhati xa hata, xi kona ni lezi, laha a vafileko va ta ngazwa a gezu ga Nʼwana wa Nungungulu; lava va ta nga gizwa va ta hanya. [100]

²⁶Hakuva kota lezi Dadani a nga ni wutomi nzeni kakwe, hizalezo i nyikile Nʼwana a kuva ni wutomi nzeni kakwe.

²⁷I mu nyikile ntamu ku lamula, hilezi a nga Nʼwana wa munhu. [101]

²⁸Mu nga hlamali hi lexi, hakuva xikhati xa hata, laha vontlhe va nga le zilahleni va ta ngazwa a gezu gakwe,

²⁹va huma; lava va mahileko kusaseka, va vuka a kuya wutomini; ni lava va mahileko kubiha, va vuka vaya kulamulweni. [102]

³⁰Mina a nzi zi koti ku maha nchumu ha nzoce. Nza lamula kota lezi nzi zi zwako; a kulamula ka mina ku lulamile, hakuva a nzi lavi kuranza ka mina, kanilezi a kuranza ka loyi a nzi rumileko. [103]

³¹Loku nzi ti mahela wukustumunyu, a wukustumunyu ga mina a hi gi nene. [104]

³²Kanilezi i kona munwani a nzi kustumunyelako; nza zi tiva lezaku a wukustumunyu legi a nzi mahelako gona gi nene. [105]

³³Mu rumile mitsumi ka Johani, zonake yena i mahile wukustumunyu hi zinene.

³⁴Kanilezi mina a nzi amukeli Wukustumunyu ga munhu; ahemba-lokoke nza wula lezi kasi mu fela ku hanyiswa.

³⁵Johani i wa hi kandiya yi vurako yi woningako; nwina mu vumele ku tsaka xikhatanyana kuwonekeleni kakwe. [106]

³⁶Kanilezi mina nzi na ni wukustumunyu ga hombe ku hunza legi ga Johani; hakuva a mitiro levi a nzi nyikileko Dadani a kuva nzi yi mbhetisa, ya kustumunya hi mina lezaku Dadani i nzi rumile. [107]

³⁷Na yena Dadani, loyi a nzi rumileko, i mahile wukustumunyu hi mina. Nwina cima a mu zwangi gezu gakwe, hambu ni ku wona xiyimo xakwe; [108]

³⁸ni mhaka yakwe a yi tshami nzeni ka nwina, hakuva a mu kholwi loyi a rumilweko hi yena.

³⁹Mu kamba mitsalo, hakuva mu alakanya lezaku ka yona mu ta kuma a wutomi ga pinzukelwa; yona hi yona yi kustumunyako hi mina. [109]

⁴⁰A mu vumeli kuta ka mina, kasi mu fela ku kuma wutomi.

⁴¹A nzi amukeli kudzunziwa hi ka vanhu;

⁴²kanilezi nza mu tiva, lezaku mu hava liranzo la Nungungulu timbilwini ta nwina.

⁴³Nzi tile hi vito ga Dadani, a mu nzi amukeli; kasi loku ata munwani hi vito gakwe yena nwinyi, yena mu ta mu amukela.

⁴⁴Mu ta kholwisa kuyini nwina lava va dzunzanako, kasi a wudzunzo legi gi tako hi ka Nungungulu a nga yece, a mu gi lavi? [110]

⁴⁵Mu nga alakanyi muku nzi ta mu kecara ka Dadani; i kona loyi a mu kecarako, hi yena Mosi, loyi mu tsumbako kakwe. [111]

⁴⁶Hakuva loku mu wa kholwa hi Mosi, ngha na mu kholwa hi mina; hakuva yena i tsalile hi mina. [112]

⁴⁷Kanilezi loku mu nga kholwi a kutsala kakwe, mu ta kholwisa kuyini a timhaka ta mina ke?