Read tshwa Johani 6 Bible Online

Johani 6 - tshwa bible

Johani 6

¹Anzhako ka lezo Jesu i lo tlhatuka a Bimbi ga Galilea, legi gi nga bimbi ga Tiberia. [113]

²A xidlemo xa hombe xi lo mu lanzela, hilezi va nga wona a ziwoniso lezi a nga zi maha ka lava va nga kari va babya:

³Jesu i lo kanziha xitsungeni, a ya tshama kona zinwe ni vapizani vakwe.

⁴Makunu a Pasika, a mubuzo wa vaJuda, gi wa hi kusuhani. [114]

⁵Jesu na a tlakusa mahlo yakwe, i lo wona xidlemo xa hombe na xita kakwe, aku ka Filipu: Hi ta xava kwihi zakuga, kasi vanhu lava va fela kuga ke? [115]

⁶Makunu i lo wula lezo kasi ku mu doma; hakuva yena i wa zi tiva lezi a ta nga zi maha.

⁷Filipu i lo mu hlamula, aku: A 200 wa macheleni ma nga ta xava a zibaba zo enela, hambu loku munwe ni munwani a teka kutsongwani ntsena.

⁸Munwe wa vapizani vakwe, Andreu nakulobye wa Simoni Pedro, aku kakwe:

⁹I kona mufana laha, loyi a nga ni ntlhanu wa zibaba za sevada, ni zidluwani zimbiri; kanilezi zi taku yini lezi xikari ka vanyingi va kunghahi ke? [116]

¹⁰Jesu aku: Tshamisani vanhu. Ku wa hi ni byanyi go tala wutshanwini lego; zonake a vavanuna va lo tshama lahasi, va wa hi 5,000.

¹¹Zonake Jesu i lo teka a zibaba, laha na a bongile, i lo avela ka lava va nga tshamile lahasi, zinghaho ni zidluwani, va kala va xura.

¹²Laha na va xurile, i te ngalo ka vapizani vakwe: Rolelani a matlhatlha ma seleko, kasi ku nga lahleki nchumu.

¹³Lezo va lo ma rolela, va tata khume ga zirunzu ni zimbiri hi matlhatlha ya ntlhanu wa zibaba za sevada, ma nga sala loku va gile.

¹⁴Hikwalaho vanhu na va wonile a xiwoniso lexi a nga xi mahile, vaku: Hakunene loyi muprofeti loyi a nga wa ta kuta lomu tikweni. [117]

¹⁵Jesu na a zi tiva lezaku va lava ku mu kurumeta, va mu maha hosi, i lo nyemuka aya kambe xitsungeni na hi yece.

¹⁶Laha na gi hlwile a vapizani vakwe va lo relela vaya bimbini; [118]

¹⁷va enghena ngalaveni, va tlhatuka bimbi vaya Kapernaume. Gi lo phuma, na Jesu a nga se kuta ka vona.

¹⁸A bimbi gi wa vindluka hi kota ya mheho ya hombe yi nga bhubhutsa.

¹⁹Ku te loku va bonzile mune kutani ntlhanu wa tikilometro, va lo wo na Jesu na a famba hehla ka bimbi, a tshinela ngalaveni; va chava.

²⁰Kanilezi i te ngalo kabye: Hi mina, mu nga chavi.

²¹Zonake va wa vumela ku mu amukela ngalaveni, zalezo a ngalava yi lo chikela tlhatuko lowu va ngaya ka wona.

²²Hi manziko wa kona a xidlemo lexi xi nga sele le tlhatuko wa bimbi, xi lo wona lezaku ku wa nga hi na ngalava laho, saseka leyi a vapizani va nga enghena ka yona, ni lezaku Jesu a nga enghenangi navo, kanilezi a vapizani vakwe va fambile voce.

²³Hambu lezi ku nga wa tile a tingalava hi le Tiberiasi, ti ta chika kusuhani ni wutshamu legi va ngaga zibaba, Hosi na yi bongile.

²⁴Hikwalaho laha xidlemo na xi wonile lezaku Jesu ni vapizani vakwe va hi hava laho, va lo enghena tingalaveni, vaya Kapernaume va ya lava Jesu.

²⁵Laha na va mu kumile le tlhatuko wa bimbi, vaku kakwe: Rabi, u tile rini laha ke?

²⁶Jesu i lo va hlamula, aku: Hizinene nziku ka nwina: A mu nzi lavi hilezi mu nga wona ziwoniso, kanilezi hilezi mu ngaga zibaba, mu xura.

²⁷Mu nga tireli a zakuga lezi zi mbhelako, kanilezi tirelani a zakuga lezi zi simamisako wutomini ga pinzukelwa, lezi a Nʼwana wa munhu a ta nga mu nyika zona; hakuva hi yena loyi a vekilweko xifungo hi Dadani, loyi a nga Nungungulu. [119]

²⁸Vaku ngalo kakwe: Hi fanele ku maha yini, kasi hi tira mitiro ya Nungungulu ke?

²⁹Jesu i lo hlamula, aku kabye: A ntiro wa Nungungulu hi lowu, lezaku mu kholwa ka yena loyi a mu rumileko. [120]

³⁰Vaku kakwe: Xiwoniso muni u xi mahako wena, kasi hi fela ku xi wona, hi ku kholwa? U tira yini ke? [121]

³¹A vakoko va hina va waga manna le xiwuleni, kota lezi ku tsalilweko ku ngalo: I lo va nyika zibaba zita hi le tilweni, a kuva vaga. [122]

³²Jesu aku ngalo kabye: Hizinene nziku ka nwina: Ku wa nga hi Mosi a nga mu nyika xibaba xa le tilweni; kanilezi a Dadani wa mu nyika a xibaba leʼxi nene xi tako hi le tilweni.

³³Hakuva a xibaba xa Nungungulu hi xona lexi xi relelako hi le tilweni, xi nyikako tiko wutomi.

³⁴Vaku ngalo kakwe: Hosi, hi nyike xibaba lexo xontlhe xikhati.

³⁵Jesu aku kabye: Mina nzi xibaba xa wutomi. Loyi a tako ka mina a nga tazwa ndlala, ni loyi a kholwako ka mina, cima a nga tazwa tora. [123]

³⁶Kanilezi, nzi sina nzi mu byelile lezaku, Mu nzi wonile, hambu lezo a mu kholwangi.

³⁷Zontlhe lezi a nzi nyikako Dadani, zi tata ka mina; ni loyi a tako ka mina, cima nzi nga ta mu hlongola. [124]

³⁸Hakuva nzi relele hi le tilweni, na ku nga hi lezaku nzi maha kuranza ka mina, kanilezi ku maha kuranza ka loyi a nzi rumileko. [125]

³⁹A kuranza ka loyi a nzi rumileko hi lezaku nzi nga lahli ni munwe wa vontlhe lava a nzi nyikileko, kanilezi nzi fela ku va vuxa hi siku go gumesa. [126]

⁴⁰Hakuva kuranza ka Dadani lezaku ni wihi loyi a cuwukako Nʼwana, a kholwa ka yena, i fela kuva ni wutomi ga pinzukelwa; ni lezaku nzi mu vuxa hi siku go gumesa. [127]

⁴¹A vaJuda va lo tsanwa hi yena, hilezi a ngaku: Mina nzi xibaba xi releleko hi le tilweni.

⁴²Vaku ngalo: Xana loyi, a hi yena Jesu, nʼwana Josefa, loyi a raru wakwe ni nyine hi va tivako ke? Makunu hikuyini a wulako, aku: Nzi relele hi le tilweni? [128]

⁴³Jesu i lo va hlamula, aku: Mu nga nʼununʼuteli timbilwini ta nwina.

⁴⁴A ku na munhu a zi kotako kuta ka mina, loku a nga kokiwi hi Dadani loyi a nzi rumileko; zonake nzi ta mu vuxa hi siku go gumesa.

⁴⁵Lomu bhukwini ga vaprofeti ku tsalilwe, ku ngalo: Vontlhe va ta gonziswa hi Nungungulu. Loyi a ingisileko Dadani, a gonza ka yena, wata ka mina. [129]

⁴⁶A hi ku munhu i wonile Dadani, sine loyi a tileko hi ka Nungungulu, hi yena a mu wonileko Dadani. [130]

⁴⁷Hizinene nziku ka nwina: Loyi a kholwako, i na ni wutomi ga pinzukelwa. [131]

⁴⁸Mina nzi xibaba xa wutomi.

⁴⁹A vakoko va nwina va waga manna xiwuleni, kanilezi va file;

⁵⁰kanilezi a xibaba xi relelako hi le tilweni, loku munhu a xiga, a ngafi. [132]

⁵¹Mina nzi xibaba lexi xi hanyako, lexi xi nga relela hi le tilweni; loku munhu aga xibaba lexi, i ta hanya kala kupinzuka. Ni xibaba lexi nzi ta nga nyika xona, hi nyama ya mina, yi nyikilweko kasi tiko ga hanya. [133]

⁵²A vaJuda va lo kanetana vaku: A munhu loyi i ta hi nyikisa kuyini a nyama yakwe a kuva hi yiga ke?

⁵³Jesu aku ngalo kabye: Hizinene nziku ka nwina: Loku mu ngagi a nyama ya Nʼwana wa munhu, munwa a nkhata wakwe, a mu na wutomi nzeni ka nwina. [134]

⁵⁴Loyi a gako a nyama ya mina, anwa a nkhata wa mina, i na ni wutomi ga pinzukelwa; nzi ta mu vuxa hi siku go gumesa.

⁵⁵Hakuva a nyama ya mina hi kuga hakunene, ni nkhata wa mina hi kunwa hakunene.

⁵⁶Loyi a gako a nyama ya mina, anwa a nkhata wa mina, i tshama nzeni ka mina, na mina nzeni kakwe. [135]

⁵⁷Kota lezi a Dadani loyi a hanyako a nga nzi ruma, na mina nza hanya hi kota ya Dadani; hizalezo loyi a nzi gako, i ta hanya hi kota ya mina.

⁵⁸Hi xona xibaba xi nga relela hi le tilweni; xi nga koti lexi a vakokwani va nga xiga, vafa; loyi a gako lexi xibaba, i ta hanya kala kupinzuka.

⁵⁹A timhaka leti Jesu i lo ti kanela laha a nga gonzisa sinagogeni le Kapernaume.

⁶⁰A vanyingi va vapizani vakwe na va zi zwile, vaku: A mhaka leyi ya nonoha, himani a ta nga yi ingisa ke? [136]

⁶¹Kanilezi Jesu na a zi tivile nzeni kakwe, lezaku a vapizani vakwe va tsanwa hi yona, aku ngalo kabye: Xana a mhaka leyi ya mu khunguvanyisa ke?

⁶²Zonake mu taku yini loku mu wona Nʼwana wa munhu na a kanziha laha a nga hi kona hi kusanguleni ke? [137]

⁶³A moya hi wona wu hanyisako, a nyama a yi vuni nchumu. A timhaka leti nzi mu byelileko tona, hi moya ni wutomi. [138]

⁶⁴Kanilezi va kona vanwani xikari ka nwina lava va nga kholwiko. Hakuva Jesu i wa zi tiva hi le kusanguleni lezaku vamani lava va nga kholwiko niku himani a to mu tokometa. [139]

⁶⁵Aku ngalo: Hi kota ya lexi nzi wa te ngalo ka nwina: A ku na munhu a zi kotako kuta ka mina, loku a nga nyikiwi hi Dadani. [140]

⁶⁶Hi kota ya mhaka leyi a vanyingi va vapizani vakwe va lo tlhelela nzhako, a va ha fambangi naye.

⁶⁷Zonake Jesu i te ngalo ka vakhume ni vambiri: Nwinawu mu lava ku suka ke?

⁶⁸Simoni Pedro i lo mu hlamula, aku: Hosi, hi taya ka mani ke? Wena u na ni timhaka ta wutomi ga pinzukelwa. [141]

⁶⁹Hi kholilwe, ha zi tiva lezaku wena u Loyi wa Kubasa wa Nungungulu. [142]

⁷⁰Jesu i lo va hlamula, aku: Xana a nzi mu hlawulangi, nwina vakhume ni vambiri ke? Hambu zi hi tano a munwe wa nwina i dimoni. [143]

⁷¹I lo wula hi Judasi Iskarioti, nʼwana Simoni, hakuva ku wa hi yena a ta nga mu tokometa, na a hi munwe wa vakhume ni vambiri.