Read tshwa Johani 7 Bible Online

Johani 7 - tshwa bible

Johani 7

¹Anzhako ka lezo, Jesu i wa fambafamba le Galilea; i wa nga ranzi ku fambafamba le Judia, hakuva a vaJuda va wa lava ku mu daya. [144]

²Kanilezi a mubuzo wa vaJuda, lowu va nge Mubuzo wa mixaxa, wu wa tshinele. [145]

³Hikwalaho a vanakulobye vaku ngalo ka yena: Suka laha, uya Judia, kasi a vapizani va wena kambe va fela ku wona a mitiro ya wena leyi u yi mahako. [146]

⁴Hakuva a ku na munhu a mahako nchumu kufihlaleni loku a ranza ku tibyiwa xikari ka vanhu. Lezi u mahako mitiro ya kunghahi ti wonekelise kubaseni mahlweni ka vanhu.

⁵Hakuva hambu ni vanakulobye va wa nga kholwi kakwe. [147]

⁶Jesu aku kabye: A xikhati xa mina a xi se ku chikela, kanilezi a xikhati xa nwina xi kona zikhati zontlhe. [148]

⁷A tiko a gi zi koti ku mu venga; kanilezi mina ga nzi venga, hakuva nza kustumunya ha gona, lezaku a mitiro ya gona yi bihile. [149]

⁸Yanani nwina mubuzweni, mina a nza hayi mubuzweni lowu; hakuva a xikhati xa mina a xi se ku tatiseka.

⁹Loku a va byelile lezo, i lo sala le Galilea.

¹⁰Kanilezi laha vanakulobye na va yile mubuzweni, Jesu kambe i loya kona, na ku nga hi kubaseni, kanilezi a famba xihundleni.

¹¹A vaJuda va lo mu lava le mubuzweni, vaku: I kwihi? [150]

¹²Ku wa hi ni kukanetisana ha yena xikari ka xidlemo; a vanwani vaku ngalo: Munhu nene; a vanwani vaku: Ahihi, wa kanganyisa vanhu. [151]

¹³Hambu lezo ku wa nga hi kona munhu a nga wulawula ha yena kubaseni, hi kota ya kuchava vaJuda.

¹⁴Kanilezi laha xikari ka mubuzo Jesu i loya tempeleni, a gonzisa.

¹⁵A vaJuda va lo hlamala, vaku: A munhu loyi i tivisa kuyini mitsalo, lezi cima a nga gonzangi ke? [152]

¹⁶Jesu i lo va hlamula, vaku: A gonzo ya mina a hi ya mina, kanilezi ya loyi a nzi rumileko. [153]

¹⁷Loku munhu a xuva ku maha kuranza ka Nungungulu, i ta yi tiva a gonzo leyi, loku yita hi ka Nungungulu, kutani nzo ti wulawulela mina wutsumbu. [154]

¹⁸Loyi a wulawulako hi za wutsumbu gakwe, i lava wudzunzo ga yena nwinyi; kanilezi loyi a lavako ku dzunza loyi a mu rumileko; hi yena a gonzisako zinene, ku hava a kungalulami ka yena. [155]

¹⁹Xana Mosi a nga mu nyikangi a nayo ke? Hambu zi hi tano, a nga kona munwe wa nwina a gongako nayo. Hikuyini mu lava ku nzi daya? [156]

²⁰A xidlemo xi lo hlamula, xiku: Wena u na ni dimoni! Himani a lavako ku ku daya? [157]

²¹Jesu i lo va hlamula, aku: Nzi mahile a ntiro munwe ntsena, mu hlamala nwentlhe ha wona.

²²Mosi i lo mu nyika wukwera (a hi lezaku gi sangulwe hi Mosi, kanilezi hi vakokwani), kanilezi hi sabado mu enghenisa munhu wukwera. [158]

²³Loku munhu a engheniswa wukwera hi sabado, lezaku a nayo wa Mosi wu nga hambunyetwi; xana mu nzi zangarela yini, hilezi nzi hanyisileko munhu hi sabado ke? [159]

²⁴Mu nga lamuli hi kota ya lezi zi wonekako, kanilezi lamulani hi nongameto. [160]

²⁵Hikwalaho a vanwani va le Jerusalema vaku ngalo: A hi yena loyi va lavako ku mu daya ke?

²⁶Mangabye, wa wulawula kubaseni, a ya wuli nchumu ka yena. Xana a vafumeli va zi tiva lezaku loyi hi yena Kristu ke?

²⁷Ahemba-lokoke, loyi munhu ha mu tiva laha a tako ha kona; kanilezi laha Kristu a ta ngata, a ku na munhu loyi a tivako laha a humako kona. [161]

²⁸Hikwalaho Jesu na a kari a gonzisa tempeleni, i lo vitana hi gezu ga hombe, aku: Hakunene mina ma nzi tiva, ni laha nzi tako ha kona ma ku tiva; kanilezi a nzi ti telangi hi wutsumbu ganga, ni loyi a nzi rumileko ngwa zinene, loyi nwina mu nga mu tiviko. [162]

²⁹Mina nza mu tiva, hakuva nzi huma ka yena, hi yena a nzi rumileko. [163]

³⁰Zonake va wa lava ku mu khoma, kanilezi ku wa nga hi kona munhu a nga mu henya, hakuva xikhati xakwe xi wa nga se ku chikela. [164]

³¹Kanilezi vanyingi va lomo xidlenwini va lo kholwa hi yena, vaku: Kristu loku a tile, xana i ta maha ziwoniso Zo hunza lezi a zi mahako loyi munhu ke?

³²A vaFarisi va lozwa a vanhu na va kari va wula lezi ha yena; zonake a vapristi va hombe ni vaFarisi va lo ruma vanyakasani ku ya mu khoma.

³³Kanilezi Jesu aku ngalo: Ka ha hi xikhatanyana na nza ha hi na nwina, zonake nza famba ka loyi a nzi rumileko. [165]

³⁴Mu ta nzi lava, kanilezi mu nga ta nzi kuma; ni laha nzi nga kona, nwina a mu zi koti kuta. [166]

³⁵Hi laha vaJuda va ngaku ngalo xikari kabye: I taya kwihi, laha hi ta nga kala hi nga mu kumi ke? Xana i xuva kuya ka lava va hangalakileko xikari ka vaGreki, a ya gonzisa vaGreki ke? [167]

³⁶I mhaka muni leyi a yi wulako yaku: Mu ta nzi lava, kanilezi mu nga ta nzi kuma; ni laha nzi nga kona, nwina a mu zi koti kuta.

³⁷Hi siku go gumesa, legi gi nga siku ga hombe ga mubuzo, Jesu i lo yima, aba hungu, aku: Loku munhu azwa tora, a ate ka mina, a tanwa. [168]

³⁸Loyi a kholwako ka mina, hi lomo xifuveni kakwe ku ta khulunga a micongo ya mati ya wutomi, kota lezi yi wulako mitsalo. [169]

³⁹Kanilezi lexi i lo wula hi kota ya Moya lowu va ta nga wu amukela lava va kholwako ka yena; hakuva a Moya wu wa nga se nyikiwa, hilezi Jesu i wa nga se ku kuliswa. [170]

⁴⁰A vanwani va xidlemo laha na va zwile leti timhaka, vaku ngalo: Hizinene loyi Muprofeti. [171]

⁴¹Vanwani vaku: Loyi hi Kristu. Kanilezi vanwani vaku: Kokwihi! Xana Kristu a nga huma Galilea ke? [172]

⁴²Kasi mitsalo a yi wuli lezaku Kristu i ta huma lixakeni la Davida ke, hi le Betlehema, a mutini lowu Davida a nga hi ka wona ke? [173]

⁴³Lezo ku lo vuka a kuhambana xikari ka xidlemo hi kota ya yena.

⁴⁴A vanwani va wa ranza ku mu khoma, kanilezi ku wa nga hi kona munhu a nga mu henya.

⁴⁵Hikwalaho a vanyakasani va lo wuya ka vapristi va hombe ni ka vaFarisi; vona vaku ngalo kabye: Hikuyini mu nga kala ku wuya naye ke?

⁴⁶A vanyakasani va lo hlamula, vaku: Cima a ku wulawulangi munhu kota gaya. [174]

⁴⁷Zonake a vaFarisi va hlamula, vaku: Kasi na nwinawu mu hambukisilwe ke?

⁴⁸Ku kona ni munwe wa tinghanakana kutani wa vaFarisi va kholwako ka yena ke? [175]

⁴⁹Kanilezi a xidlemo lexi xi nga wu tiviko nayo, xi rukatelwe.

⁵⁰Nikodemusi, loyi a ngaya ka Jesu ni wusiku, na hi munwe wa vona, aku kabye: [176]

⁵¹Xana a nayo wa hina wa kona munhu na va nga rangangi hi ku mu hlola, ni ku tiva lezi a zi mahileko ke? [177]

⁵²Va lo hlamula, vaku kakwe: Na wena u wa le Galilea ke? Hlola u wona lezaku ngalo a ku humi muprofeti hi le Galilea. [178]

⁵³Zonake munwe ni munwani aya kaya kakwe.