Read tshwa Johani 8 Bible Online

Johani 8 - tshwa bible

Johani 8

¹Kanilezi Jesu i lo famba xitsungeni xa maOliva.

²Hi manziko wa kona i lo tlhela aya tempeleni ni mixo, ni vanhu vontlhe va lota ka yena; i lo tshama hasi a va gonzisa.

³A vatsali ni vaFarisi va lo neha a wasati loyi a kumilweko kurembeni. Laha na va mu veka xikari,

⁴vaku ngalo ka Jesu: Mugonzisi, loyi wasati i khomilwe na a kari a remba.

⁵Makunu Mosi i hi layile lomu nayweni a ku gandla hi maribye a va kunghahi; xana wena u wula yini ha yena ke? [179]

⁶Va lo wula lezo kasi ku mu ringa, lezaku va fela ku kuma xilo xo mu kecara ha xona. Kanilezi Jesu i lo korama, a tsala misaveni hi litiho lakwe.

⁷Zonake laha va nga nonohisa va mu wutisa, i lo ti ololoxa, aku ngalo kabye: Loyi wa nwina a nga hiko na kuonha, a range a mu hoxa hi ribye. [180]

⁸I lo korama kambe, a tsala misaveni hi litiho.

⁹Laha vona na va zi zwile, va lo huma ha munwe-munwe, ku sangula hi lava va kale, ku kala Jesu a siyiwa yece ni wasati loyi a nga yimile xikari. [181]

¹⁰Jesu i lo tlakusa mahlo yakwe, aku ka yena: Wasati, makunu va kwihi ke? A ku na munhu a nga ku kona ke?

¹¹Yena aku ngalo: A nga kona, Hosi. Jesu aku ngalo: Na minawu, a nzi ku koni. Ti fambele, u nga ha onhi kambe. [182]

¹²Zonake Jesu i lo engeta a kanela ka vanhu, aku: Mina nzi kuwonekela ka tiko. Loyi a nzi lanzelako a nga ta ha famba munyameni; kanilezi i tava ni kuwonekela ka wutomi. [183]

¹³A vaFarisi vaku ngalo ka yena: U ti mahela wukustumunyu wena nwinyi; a wukustumunyu ga wena a hi ginene.

¹⁴Jesu i lo va hlamula, aku: Hambu loku nzi ti mahela wukustumunyu mina nwinyi, a wukustumunyu ga mina gi nene; hakuva nza ku tiva laha nzi humako kona, ni laha nzi yako kona; kanilezi nwina a mu ku tivi laha nzi humako kona, ni laha nzi yako kona. [184]

¹⁵Nwina mu lamula hi ka nyama; mina a nzi lamuli munhu. [185]

¹⁶Hambu loku nzi wa ta lamula, a kulamula ka mina ku nene; hakuva a nzi tshami nzoce, kanilezi nzi na Dadani loyi a nzi rumileko.

¹⁷Ni lomu nayweni wa nwina ku tsalilwe ku ngalo: A wukustumunyu ga vanhu vambiri gi nene. [186]

¹⁸Mina loyi nzi ti mahelako wukustumunyu nzi munwe, ni Dadani loyi a nzi rumileko wa nzi mahela wukustumunyu na yenawu. [187]

¹⁹Vona vaku ngalo kakwe: I kwihi a Raru wa wena? Jesu i lo hlamula, aku: Mina a mu nzi tivi, hambu ni ku tiva Dadani wa mina. Loku mu wa nzi tivile mina, ngha na mu tivile ni Dadani. [188]

²⁰A timhaka leti i lo ti kanela laha ka bhako ga minyikelo, na a kari a gonzisa tempeleni. Ku wa nga hi kona munhu a nga mu khoma, hakuva a xikhati xakwe xi wa nga se ku chikela. [189]

²¹I lo engeta aku ngalo kabye: Mina nza famba, zonake mu ta nzi lava, kanilezi mu ta fela kuonheni ka nwina; ni laha nzi yako kona, a mu zi koti kuta, [190]

²²A vaJuda vaku ngalo: I ta ti daya ke, lezi a nge ngalo: Laha nzi yako kona, a mu zi koti kuta?

²³Aku ngalo kabye: Nwina mu huma hi lahasi, mina nzi huma hi le hehla; nwina mu va misava, mina a nzi wa misava leyi. [191]

²⁴Hikwalaho nzi mu byelile, lezaku mu ta fela zionhweni za nwina; hakuva loku mu nga kholwi lezaku nzi mina yena, mu ta fela zionhweni za nwina. [192]

²⁵Vaku ngalo ka yena: Hi wena mani? Jesu aku ngalo kabye: Nzi zona lezo nzi wulawulileko ha zona ka nwina hi le kusanguleni.

²⁶Nzi na ni timhaka to tala ku wulawula ni ku ti lamula hi tlhelo ga nwina; ahemba-lokoke, loyi a nzi rumileko wa tsumbeka; ni lezi nzi zi zwileko ka yena, hi zona lezi nzi wulawulako tikweni. [193]

²⁷Va wa nga zi tivi lezaku i kanela kabye hi Dadani.

²⁸Hikwalaho Jesu aku ngalo: Loku mu tlakusile Nʼwana wa munhu, zonake mu ta zi tiva lezaku nzi mina yena, ni lezaku a nzi mahi nchumu ha nzoce, kanilezi nza kanela kota lezi a nzi gonzisileko Dadani. [194]

²⁹Loyi a nzi rumileko i zinwe na mina, a nga nzi siyangi nzoce; hakuva xontlhe xikhati nzi maha lezi zi mu xalalisako. [195]

³⁰Lal a a nga kanela timhaka leti, a vanyingi va lo kholwa ka yena.

³¹Jesu i te ngalo ka vaJuda lava va kholilweko ka yena: Loku mu simamisa kugonziseni ka mina, zonake mu vapizani va mina hakunene;

³²zonake mu ta tiva zinene, ni zinene zi ta mu tlhatlhisa. [196]

³³Va lo mu hlamula, vaku: Hina hi pswalo wa Abrahama, cima a hi na ngava tikhumbi ta munhu. Hi yini u wulako wena, uku: Mu ta tlhatlhiswa? [197]

³⁴Jesu i lo va hlamula, aku: Hizinene nziku ka nwina: Loyi a mahako kuonha, i tshama khumbi ya kuonha. [198]

³⁵A khumbi a yi tshami ndlwini xontlhe xikhati, kanilezi a nʼwana i tshama kona xontlhe xikhati. [199]

³⁶Hikwalaho loku Nʼwana a mu tlhatlhisa, mu tava mu tlhatlhekile futsi. [200]

³⁷Nza zi tiva lezaku mu pswalo wa Abrahama; kanilezi mu ranza ku nzi daya, hakuva a mhaka ya mina a yi kumi wutshamu ka nwina.

³⁸Mina nza mu byela lezi nzi zi wonileko ka Dadani, na nwina mu maha lezi mu zi zwileko ka raru wa nwina. [201]

³⁹Va lo mu hlamula, vaku: A dadani wa hina hi Abrahama. Jesu aku ngalo kabye: Loku mu wa hi vana va Abrahama, ngha na mu maha mitiro ya Abrahama. [202]

⁴⁰Kanilezi makunu mu lava ku nzi daya, mina nzi nga munhu loyi a mu byelileko a zinene, lezi nzi zi zwileko ka Nungungulu; Abrahama a nga mahangi lezo.

⁴¹Nwina mu maha a mitiro ya raru wa nwina. Vaku ngalo kakwe: A hi pswalwangi hi wubhayi; hi na ni Dadani munwe, yena Nungungulu.

⁴²Jesu aku ngalo kabye: Loku Nungungulu a wa hi Raru wa nwina, ngha na mu nzi ranza; hakuva nzi humele nzita hi le ka Nungungulu; hakuva a nzi ti telangi hi wutsumbu ganga, kanilezi yena i lo nzi ruma. [203]

⁴³Hiyini mu nga pimiko a xuxela ga mina ke? I hakuva a mu na ku ingisa a mhaka ya mina.

⁴⁴Nwina mu vana va raru wa nwina a nga Satani, mu ranza ku maha a kunavela ka raru wa nwina. Yena i wa hi mudayi hi kusanguleni, a nga yimi zineneni, hakuva ku hava zinene ka yena. Loku a wulawula mawunwa, i wulawula hi za wutsumbu gakwe; hakuva hi muhembi, i raru wa mawunwa. [204]

⁴⁵Kanilezi mina, lezi nzi wulako zinene, a mu nzi kholwi.

⁴⁶Hi wihi ka nwina a nzi konako hi kuonha ke? Loku nzi wula zinene, hikuyini mu nga nzi kholwiko ke?

⁴⁷Loyi a nga wa ka Nungungulu, wazwa a timhaka ta Nungungulu; nwina a mu ti ingisi, hakuva a mu va ka Nungungulu. [205]

⁴⁸A vaJuda va lo hlamula, vaku kakwe: Kasi a hi wulangi zona, laha hi nge ngalo, lezaku u muSamaria, ni ku u na ni dimoni?

⁴⁹Jesu i lo hlamula, aku: A nzi na dimoni; kanilezi mina nzi dzunza Dadani, kasi nwina ma nzi kanyisa.

⁵⁰A nzi ti laveli a wudzunzo ga mina nwinyi; i kona munwe loyi a gi lavako, hi yena a lamulako. [206]

⁵¹Hizinene nziku ka nwina: Loku munhu a hlayisa mhaka ya mina, cima a nga tazwa kufa. [207]

⁵²A vaJuda vaku kakwe: Makunu ha zi tiva lezaku u na ni dimoni. Abrahama i file, ni vaprofeti kambe; na wena u ngalo: Loku munhu a hlayisa mhaka ya mina, cima a nga tazwa kufa. [208]

⁵³Wena u wa hombe ku hunza a dadani wa hina, loyi a ngafa ke? Ni vaprofeti va file; u ti maha mani wena ke?

⁵⁴Jesu i lo hlamula, aku: Loku nzi ti dzunza, a wudzunzo ga mina a hi nchumu, kanilezi hi Dadani a nzi dzunzisako, loyi ha yena mu nge ngalo, i Nungungulu wa nwina; [209]

⁵⁵kasi a mu mu tivangi, kanilezi mina nza mu tiva; ni loku nzi wa ta wula nziku: A nzi mu tivi, nzi tava muhembi kota nwina. Kanilezi nza mu tiva, nzi hlayisa a mhaka yakwe. [210]

⁵⁶A raru wa nwina Abrahama i lo tsaka lezaku i wa ta ngha a wona a siku ga mina; i gi wonile a nengela. [211]

⁵⁷A vaJuda vaku ngalo kakwe: A ku se kuva nawo a 50 wa malembe, kasi u mu wonile Abrahama ke?

⁵⁸Jesu aku ngalo kabye: Hizinene nziku ka nwina: Nzi wa hi kona Abrahama na a nga se ku pswaliwa. [212]

⁵⁹Hikwalaho va lo rola maribye, a kuva va mu cukunyetela ha wona; kanilezi Jesu i lo ti fihla a huma tempeleni. [213]