Read tshwa Mitiro 10 Bible Online

Mitiro 10 - tshwa bible

Mitiro 10

¹Le Kesaria ku wa hi kona a munhu a nga hi Korneliu a vito gakwe, a nga hi nduna ya ntlawa wa zana ga masochwa, lowu wu vitwako wa Italia.

²I wa hi munhu a pinyamileko kukhongeleni, loyi a nga chava Nungungulu zinwe ni yindlu yakwe yontlhe; i wa bana nguvu ka zisiwana, ni xontlhe xikhati i wa khongela ka Nungungulu. [200]

³Hi siku go kari i lo wona muwoniso hi hora ya wuntlhanu ni mune, a ngelosi ya Nungungulu na yi enghena ka yena, yiku ngalo kakwe: Korneliu!

⁴I lo yi cuwukisisa hi kuchava, aku ngalo: Mahungu muni, Hosi? Yona yiku ngalo kakwe: A mikhongelo ya wena ni kuhana ka wena zi yile ziya maha xialakanyiso mahlweni ka Nungungulu. [201]

⁵Makunu rumela vanhu le Jopa, va ya vitana Simoni, loyi a ginwani vito a nga Pedro;

⁶a enzeleko ka Simoni, a mufuki wa madzowo, loyi a yindlu yakwe yi nga kusuhi ni bimbi. [202]

⁷Laha yi nga sukile a ngelosi leyi yi nga wulawula naye, i lo vitana a malanza mambiri, ni sochwa ginwe gi chavako Nungungulu, ga vona lava va tshamako naye;

⁸laha na a va hlawutele zontlhe, i lo va rumela Jopa.

⁹Hi manziko wa kona, kota lezi va nga ha hi ndleleni, na va tshinela mutini, Pedro i lo kanziha hehla ka yindlu a ku ya khongela; ku wa hi hora ya wuntlhanu ni yinwe. [203]

¹⁰Yena i lozwa ndlala, a lava zakuga; kanilezi na va ha longisa, i lo chikelelwa hi muwoniso;

¹¹a wona tilo na gi vululekile, ku relela a xibya xo khwatsi i nguwo ya hombe, na yi releliswa hi mune Wa tichoka. [204]

¹²Xikari ka yona ku wa hi ni tixaka tontlhe ta zihari za mune wa milenge, ni zikokakoka za misava ni tinyanyani ta tilo.

¹³Ku lo zwala a gezu giku kakwe: Pedro, vuka, u tlhava uga.

¹⁴Kanilezi Pedro aku ngalo: Kokwihi, Hosi; cima a nzi se ngaga a xilo xo yila, ni xi nga hlazekangiko. [205]

¹⁵A gezu gi lo engeta giku kakwe: Lexi Nungungulu a xi basisileko, u nga wuli wena uku xa yila.

¹⁶Lezi zi lo maheka kunharu, zonake a xibya xi lo kokelwa tilweni.

¹⁷Makunu laha Pedro a nga ha kanganyiseka nguvu, lezaku xi ngava xi wula yini a xiwoniso lexi a xi wonileko, a vavanuna lava va nga rumilwe hi Korneliu, na va wutisile a yindlu ya Simoni, va lo yima laha nyangweni,

¹⁸va vitana, va wutisa, vaku: Kutani Simoni loyi a ginwani vito a nga Pedro, i enzele laha ke?

¹⁹Kota lezi Pedro a nga ha alakanya hi xiwoniso, a Moya wuku ka yena: Languta, a vanhu vanharu va ku lava.

²⁰Suka, u chika, u famba navo, u nga vileli nchumu; hakuva hi mina nzi va rumileko.

²¹Pedro i lo chika, aya ka vona, a yaku ngalo: Hi mina yena loyi mu mu lavako; i mhaka muni mu yi tisako ke?

²²Vaku ngalo: Korneliu, a nga nduna ya zana, a munhu a lulamileko loyi a chavako Nungungulu, loyi a khesiwako hi vaJuda vontlhe, i lo layiwa hi Nungungulu hi nomu wa ngelosi yo basa ku ku vitana ndlwini yakwe, lezaku a yazwa lezi u ta nga mu byela zona. [206]

²³Zonake i lo va rurela ndlwini a kuva va etlela. Hi manziko wa kona Pedro i lo suka, a famba navo, ni vamakabye va le Jopa va lo mu pangalata.

²⁴Ni mixo ya kona va lo chikela Kesaria. Korneliu i wa va rinzele, na a tsombanyisile a maxaka yakwe ni vanghana vakwe a ranzanako navo.

²⁵Laha Pedro a nga enghena, Korneliu i lo mu tlhangaveta, awa mikonzweni yakwe, a mu khizamela.

²⁶Kanilezi Pedro i lo mu vuxa, aku: Suka, u yima, minawu nzi munhu kota wena. [207]

²⁷Kota lezi a nga ha wulawula naye, i lo enghena a kuma vo tala va nga tsombene kona;

²⁸aku ngalo kabye: Nwina ma zi tiva lezaku a muJuda a nga faneli a ku tlhangana ni wamatiko, hambu ku enghena ndlwini yakwe; kanilezi Nungungulu i nzi wonisile lezaku nzi nga vitani munhu nziku wa nyalidede kutani a nga hlazekangi. [208]

²⁹Hikwalaho laha na nzi vitanilwe nzi lota na nzi nga kanakani; makunu nza mu wutisa, mu nzi vitanele yini ke?

³⁰Korneliu i te ngalo: Hi mune wa masiku ma hunzileko, hi hora yaleyi nzi wa khongela lomu ndlwini ya mina; zonake ku lo yima munhu mahlweni ka mina, na a ambele tinguwo to basa,

³¹aku: Korneliu, a mikombelo ya wena yi zwilwe, ni kuhana ka wena ka tibyiwa mahlweni ka Nungungulu. [209]

³²Hikwalaho rumela le Jopa, u ya vitana Simoni, loyi a ginwani vito a nga Pedro; i enzele le ndlwini ya Simoni a mufuki wa madzowo, leyi yi nga kusuhi ni bimbi.

³³Lezo nzi lo rumela ka wena; u mahile khwatsi lezi u tileko. Makunu hontlhe hi laha mahlweni ka Nungungulu, a kuzwa zontlhe lezi u layelweko zona hi Hosi.

³⁴Pedro i lo vulula nomu wakwe, aku ngalo: Hakunene nza zi wona lezaku Nungungulu a nga hi na xihlawulela;

³⁵kanilezi ka tixaka tontlhe loyi a mu chavako, ni ku maha kululama, wa amukeleka ka yena. [210]

³⁶Ma yi tiva a mhaka leyi a nga yi rumela ka vana va Israeli, laha a nga kanela a mahungu yo saseka ya kurula hi Jesu Kristu, loyi a nga Hosi ya vontlhe; [211]

³⁷leyi yi nga biwa hungu a Judia gontlhe, a ku sangula hi le Galilea, anzhako ka kubapatiza loku a nga kanela Johani;

³⁸yaku ngalo: Nungungulu i lo tota Jesu wa le Nazareta hi Moya wa ku Basa ni ntamu; loyi a nga nzulanzula a maha kusaseka, a hanyisa vontlhe lava va nga tsimbeketwa hi Diabolus; hakuva Nungungulu i wa hi naye. [212]

³⁹Hina hi vakustumunyu va zontlhe lezi a nga zi tira le tikweni ga vaJuda ni le Jerusalema; kanilezi va lo mu daya hi ku mu hayeka sinyeni.

⁴⁰Kanilezi Nungungulu i lo mu vuxa hi siku ga manharu, a vumela a kuva a woneka,

⁴¹na ku nga hi ka vanhu vontlhe, kanilezi ka vakustumunyu lava va nga wa hlawulilwe kale hi Nungungulu, ku nga hina lava hi ngaga hinwa zinwe naye anzhako ka kuva na a vukile hi ka vafileko. [213]

⁴²I lo hi layisisa ku kanela ka vanhu, ni ku tiyisa lezaku hi yena loyi a yimisilweko hi Nungungulu a ku maha mulamuli wa va hanyako ni vafileko. [214]

⁴³Hi yena loyi a vaprofeti vontlhe va mu mahelako wukustumunyu, lezaku munwe ni munwani a kholwako ka yena, i ta amukela a kurivalelwa ka zionho. [215]

⁴⁴Laha Pedro na a ha wulawula timhaka leti, a Moya wa ku Basa wu lo relela hehla ka vontlhe lava va ngazwa a kuwulawula kakwe.

⁴⁵Ni makholwa wontihe ya zitshiva, lawa ma nga tile na Pedro, ma lo hlamala hilezi ni vamatiko va chululelwa a xinyikiwo xa Moya wa ku Basa.

⁴⁶Hakuva va lo vazwa na va wulawula hi tirimi va dumisa Nungungulu.

⁴⁷Zonake Pedro i lo wula, aku: A nga zi kota munhu a ku beletela lezaku va nga bapatizwi hi mati, lava va amukeleko a Moya wa ku Basa khwatsi hi hina ke?

⁴⁸I lo laya lezaku va bapatizwa vitweni ga Jesu Kristu. Zonake va mu kombela a kuxwa navo a masiku yo kari. [216]