Read tshwa Mitiro 11 Bible Online

Mitiro 11 - tshwa bible

Mitiro 11

¹Kanilezi a vapostoli ni vamakabye lava va nga hi le Judia va lozwa lezaku a vamatiko kambe va amukele a mhaka ya Nungungulu. [217]

²Laha Pedro a nga wuyile le Jerusalema, lava va zitshiva va lo kanetisana naye, [218]

³vaku: Wena u enghenile ka vavanuna va nga makhuna, u yaga navo. [219]

⁴Zonake Pedro i lo sangula a ku hlawutela a mahungu ya kona hi ku xaxameta, aku: [220]

⁵Mina nzi wa hi le mutini wa le Jopa, na nzi kari nzi khongela; lomu ka muwoniso nzi lo wona a xibya xo khwatsi i nguwo ya hombe, na xi kari xi releliswa hi le tilweni hi mune wa tichoka, xi tshinela ka mina. [221]

⁶Na nzi cuwukisile ka xona, nzi languta, nzi lo wona zihari za misava za mune wa milenge ni zivanza za khwati, ni zikokakoka ni tinyanyani ta tilo.

⁷Zonake nzi lozwa a gezu giku ka mina: Pedro, vuka, u tlhava uga.

⁸Kanilezi mina nzi te ngalo: Kokwihi, Hosi hakuva a xilo xo yila kutani xi nga hlazekangiko cima a xi enghenangi nonwini wa mina. [222]

⁹Kanilezi a gezu gi lo engeta gi huma hi le tilweni, gi nzi hlamula, giku: Lexi Nungungulu a xi basisileko, u nga wuli wena uku xa yila.

¹⁰Lezi zi lo maheka kunharu; zonake zontlhe zi lo kokelwa tilweni.

¹¹Hi xwalexo xikhati ku lo yima a vanhu vanharu nyangweni ya yindlu leyi hi nga hi ka yona, na va rumelwe ka mina vata hi le Kesaria,

¹²A Moya wu lo nzi laya a ku famba navo, na nzi nga kanakani nchumu. A vamakabye lava va ntlhanu ni munwe va lo nzi pangalata; hi lo ya enghena ndlwini ya loye munhu. [223]

¹³Yena i lo hi byela lezi a nga yi wonisa zona a ngelosi, na yi yimile lomo ndlwini yakwe, yiku: Rumela le Jopa, u ya vitana Simoni, loyi a ginwani vito a nga Pedro;

¹⁴yena i ta ta ku byela a timhaka leti u ta nga hanyiswa ha tona, wena ni yindlu ya wena yontlhe.

¹⁵Kota lezi nzi nga sangula ku kanela, a Moya wa ku Basa wu lo relela hehla ka vona, kota lezi wu nga mahisa zona ka hina kusanguleni.

¹⁶Hi kona nzi nga alakanya a mhaka ya Hosi, yi yi wulileko, yiku: Hakunene Johani i lo bapatiza hi mati, kanilezi nwina mu ta bapatizwa hi Moya wa ku Basa. [224]

¹⁷Loku Nungungulu a va nyikile a xinyikiwo xalexi a nga xi nyika ka hina, laha hi nga kholwa ka Hosi Jesu Kristu, xana nzi wa hi mani mina, wo kala nzi kaneta Nungungulu ke?

¹⁸Laha na va zwile leti timhaka va lo miyela, va dumisa Nungungulu, vaku: Kasi Nungungulu i nyikile ni ka vamatiko a kuhunzuluka loku ku yisako wutomini.

¹⁹Lava va nga hangalakile hi kota ya kuxaniseka loku ku nga huma hi kota ya Stefani, va lo famba va kala va ya chikela Fenikia ni le Kupero, ni le Antiokia, va nga kaneli ivangeli ka vanwani, saseka ka vaJuda voce. [225]

²⁰Kanilezi xikari ka vona ku wa hi ni vavanuna va le Kupero ni va le Kirene; laha va nga chikela le Antiokia va lo wulawula ka vaGreki kambe, va kanela ivangeli ya Hosi Jesu.

²¹A canja ga Hosi gi wa hi zinwe navo, ni vanyingi va lo kholwa, va hunzulukela ka Hosi. [226]

²²A mhaka leyi yi lo zwala tindleveni ta handla ga le Jerusalema; va rumela Barnabasi lezaku a famba Antiokia. [227]

²³Laha a nga wa chikele kona, a wona lezi zi mahilweko hi tipswalo ta Nungungulu, i lo tsaka; a va khongotela vontlhe lezaku ngha va namarela ka Hosi hi kutiyisa ka mbilu.

²⁴Kakuva i wa hi munhu nene, a teleko hi Moya wa ku Basa ni kukholwa; ni vanhu vo tala va lo ti nyikela ka Hosi.

²⁵Yena i lo suka aya Tarsusi, a ku ya lava Saule. [228]

²⁶Laha a nga wa mu kumile, i lo mu heleketa le Antiokia. Va lo tshama kona lembe gontlhe va tsombana ni handla, va gonzisa vanhu vanyingi. Hi kwa le Antiokia a vapizani va nga sangula kona a ku vitanwa aku maKristu.

²⁷Hi lawo masiku a vaprofeti va lo relela hi le Jerusalema, vaya Antiokia. [229]

²⁸A munwe wa vona a nga hi Agabusi a vito gakwe, i lo yima a tivisa hi Moya wa ku Basa, lezaku ku tava kona a ndlala ya hombe misaveni yontlhe; hi yona yi nga chikela masikwini ya Klaudiu. [230]

²⁹A vapizani va lo vumelana, lezaku va ta rumela a vamakabye lava va nga hi le Judia a za ku va vuna, munwe ni munwani a nyika kukotisa a ntamu wakwe.

³⁰Va lo maha lezo, va zi rumela ka masingalakati hi canja ga Barnabasi na Saule.