Read tshwa Mitiro 16 Bible Online

Mitiro 16 - tshwa bible

Mitiro 16

¹Zonake i lo chikela le Derbe ni le Listra. Laho ku wa hi kona a mupizani wo kari, a vitwako Timote, loyi a nyine wakwe a nga hi muJuda a kholilweko, kanilezi a raru wakwe i wa hi muGreki. [287]

²Yena i wa khesiwa hi vamakabye lavo va nga wa hi le Listra ni le Ikoniume. [288]

³Paule i wa xuva a kuva a famba naye; i lo mu teka a mu enghenisa wukwera, hi kota ya vaJuda lava va nga hi le matlhelweni lawo; hakuva vontlhe va wa zi tiva lezaku a raru wakwe muGreki. [289]

⁴Kota lezi va nga ha famba va tsemakanya miti, va lo nyika vamakabye a zileletelo lezi zi nga wa yimisilwe hi vapostoli ni masingalakati ya le Jerusalema, lezaku va zi gonga. [290]

⁵Zinghaho a mabandla ma lo tiyiswa kukholweni, ni ziro za wona zi engetelana masiku ni masiku.

⁶Va lo famba va tsemakanya Frigia ni le Galatia, hakuva va wa tsimbetelwe hi Moya wa ku Basa a ku kanela mhaka le Asia.

⁷Laha va nga chikele ku cuwukana ni le Misia, va lo ringa a kuya Bitunia; kanilezi a Moya wa Jesu a wu va vumelangi.

⁸Na va hunzile Misia, va lo relela vaya Troasi. [291]

⁹Ni wusiku ku lo woneka a muwoniso ka Paule, wa wanuna wa le Makedonia a nga yima a mu khongotela, aku: Tlhatuka, uta leno Makedonia, u ta hi vunetela. [292]

¹⁰Laha a nga wonile a muwoniso, khalekhale hi lo hlota ndlela ya kuya le Makedonia, na hi pimile lezaku Nungungulu i hi vitanile ku ya kanela ivangeli kabye. [293]

¹¹Na hi suka Troasi hi taru, hi lo lulameta hiya Samotrake, hi manziko wa kona hi chikela Neapoli.

¹²Ku sukela laho hi loya le Filipi, lowu wu nga muti wa hombe tikweni ga Makedonia, gi nga kolonia ga vaRoma; hi loxwa mutini lowo a masiku yo kari. [294]

¹³Hi siku ga sabado hi lo huma handle ka muti hiya congweni, laha ku nga hi kona a wutshamu ga kukhongela; hi lo tshama hasi, hi kanela ka vavasati lava va nga tsombene laho.

¹⁴A wasati a nga hi Lidia a vito gakwe, a muxavisi wa ziwunguwungu, wa le mutini wa Tuatira, loyi a chavako Nungungulu, i lo hizwa; zonake a Hosi yi lo mu vulula mbilu lezaku a ingisa lezi zi nga kanelwa hi Paule. [295]

¹⁵Laha na a bapatizilwe zinwe ni va yindlu yakwe, i lo hi khongotela, aku: Loku muku nzi tsumbekile ka Hosi, ngonani ndlwini ya mina, mu ta tshama kona. I lo hi kurumeta. [296]

¹⁶Ku te laha hi nga kari hi famba wutshanwini ga kukhongela, hi lo tlhangana ni nhwana wo kari wa khumbi, loyi a nga hi ni moya wa kuvumba, a nga bhinzulela nguvu a venyi vakwe hi kuvumba. [297]

¹⁷Yena i lo lanzela Paule na hina, a kanyuluka aku: A vavanuna lava malanza ya Nungungulu a nga Hehlahehla, lava va bako hungu ka nwina hi ndlela ya kuhanyiswa.

¹⁸I lo maha lezo masiku manyingi; kanilezi Paule na a karatiwa ha zona, i lo hunzuluka, aku ngalo ka moya lowo: Nza ku laya hi vito ga Jesu Kristu a kuva u huma ka yena! Wu lo huma kakwe hi xwalexo xikhati. [298]

¹⁹Kanilezi laha a venyi vakwe va nga wona lezaku va nga ta ha bhinzula nchumu ha yena va lo khoma Paule na Silasi, va ya rorovisela le hubyeni mahlweni ka vafumeli.

²⁰Laha va nga va yisile tinduneni, vaku ngalo: A vanhu lava, va nga vaJuda, va vuxa woyonga mutini wa hina, [299]

²¹va gonzisa mikhuwo leyi hina vaRoma hi nga faneliko ku yi amukela ni ku yi gonga.

²²A xidlemo xontlhe xi lo va vukela; a tinduna ti lo va runzuwulela a tinguwo tabye, ti laya lezaku a va biwe hi tinhonga. [300]

²³Na va va bile a tirimbiri to tala, va lo va khotsela paxweni, va laya murinzeli wa gona ku va lavelela nguvu.

²⁴Yena na a layisisilwe lezo, i lo va enghenisa paxweni ga lomo xikari, a va boha milenge yabye hi makhotso. [301]

²⁵Hi laha xikari ka wusiku, Paule na Silasi va wa kari va khongela, va yimbelela tisimu to dumisa Nungungulu, a tiperesu na ti va ingisela.

²⁶Hi xitshuketi xa lezo ku wa hi kona a kutsekatseka ka hombe ka misava, laha ka kuva ku tsekatsekiswa ni ziseketelo za yindlu ya paxo, ni tinyangwa tontlhe ti vululeka, ni ziboho za tontlhe tiperesu zi tlhatlheka, [302]

²⁷A murinzeli wa paxo na a khindlimukile, i lo wona a tinyangwa ta paxo na ti vululekile, a hlomula supado yakwe a lava ku ti daya, na a alakanya lezaku a tiperesu ti pfovole.

²⁸Kanilezi Paule i lo vitana hi gezu ga hombe, aku: U nga ti lamati, hakuva hina hontlhe hi kona.

²⁹I lo vitanisa tikandiya, a enghena hi kuhatlisa na a rurumela hi kuchava, i lowa lahasi mahlweni ka Paule na Silasi,

³⁰a va humesa, aku: Tihosi, nzi fanele ku maha yini kasi nza hanyiswa ke? [303]

³¹Vona vaku ngalo: Kholwa ka Hosi Jesu, zonake u ta hanyiswa, wena ni ngango wa wena. [304]

³²Va lo kanela a mhaka ya Hosi ka yena, ni ka vontlhe lava va nga wa hi lomo ndlwini yakwe.

³³Zonake i lo va teka hi xikhati lexo xa wusiku, a va hlaza a tirimbiri tabye, zalezo a bapatizwa yena ni va yindlu yakwe yontlhe.

³⁴Zonake i lo va yisa ndlwini yakwe, a ya va phamela zakuga, a tsaka nguvu zinwe ni vontlhe va yindlu yakwe, hilezi a nga kholilwe ka Nungungulu. [305]

³⁵Loku gi cile, a tinduna ti lo ruma a vanyakasani, tiku: Va tlhatlheni vanhu lavo va famba.

³⁶A murinzeli wa paxo i lo byela Paule leti timhaka, aku: A tinduna ti rumele a kuva mu tlhatlhiwa mu famba; hikwalaho humani makunu, mu famba hi kurula.

³⁷Kanilezi Paule aku ngalo ka vona: Va hi bile kubaseni na hi nga lamuliwangi, hina vanhu hi nga vaRoma, va hi khotsela paxweni; makunu va lava ku hi humesa xihundleni ke? Kokwihi, kanilezi a vate vona wutsumbu, va ta hi humesa. [306]

³⁸A vanyakasani va lo ya bikela a tinduna leti timhaka; laha ti ngazwa lezaku mbaRoma ti lo chava;

³⁹ti lota ti ta va khongotela; na ti va humesile, ti lo va kombela a kuva va suka mutini wabye. [307]

⁴⁰Vona va lo huma paxweni, vaya enghena ndlwini ya Lidia; ni laha va nga wonene ni vamakabye, va lo va tangalisa, va ti fambela.