Read tshwa Mitiro 17 Bible Online

Mitiro 17 - tshwa bible

Mitiro 17

¹Ku te na va tsemakanyile Amfipoli ni le Apolonia, va lo chikela Tesalonika, laha gi nga wa hi kona a sinagoga ga vaJuda.

²Paule hi kutolovela kakwe, i lo enghena kabye a masabado manharu, a wulawulisana navo hi timhaka ta Mitsalo, [308]

³a va tlhatlhambutela ni ku va kombisa aku zi wa lavekile lezaku Kristu a xaniseka, a tlhela a vuka hi ka vafileko; ni lezaku Jesu loyi nzi mu kanelako ka nwina, hi yena Kristu. [309]

⁴A vanwani va vona va lo kholwa, va tolovetana na Paule na Silasi; xi lo maha lezo ni xidlemo xa hombe xa vaGreki va chavako Nungungulu, ni vavasati vanyingi va hombe.

⁵Kanilezi a vaJuda na va tatisilwe hi mona, va lo kombela a vanyamijiri a ku tsombanyisa a xidlemo, va vuxa dzolonga mutini; zonake va lo ranzela a yindlu ya Jasoni, va lava a vapostoli a ku va humesa ka vanhu. [310]

⁶Laha va nga kala ku va kuma, va lo kokovisa Jasoni ni vamakabye vo kari, va va yisa mahlweni ka vafumeli va muti, va kanyuluka, vaku: Lava va vangileko gujeguje misaveni yontlhe va tile ni laha kambe. [311]

⁷Jasoni loyi i va amukele ndlwini yakwe; kasi vona vontlhe va hambunyeta a milayo ya Kesari, vaku yi kona yinwani hosi, leyi yi nga Jesu. [312]

⁸Lezo va lo vuxa a xidlemo ni tinduna ta muti leti ti ngazwa timhaka leto.

⁹Laha a nga zima seve Jasoni ni vanwani, va lo va tsika va famba.

¹⁰A vamakabye va lo fambisa Paule na Silasi hi xikavikavi ni wusiku le Berea; laha va nga chikele kona va lo enghena sinagogeni ga vaJuda.

¹¹A vaJuda va kona va wa hi va nene ku hunza va le Tesalonika, laha ka kuva va amukela a mhaka hi timbilu ti longileko, va hlola Mitsalo a masiku wontihe, lezaku a timhaka leti ti nghaho ke. [313]

¹²A vanyingi va vona va lo kholwa; ni vavasati va hombe va vaGreki, ni vavanuna vo tala.

¹³Kanilezi laha a vaJuda va le Tesalonika va nga zi zwile, lezaku a mhaka ya Nungungulu ya biwa hungu hi Paule ni le Berea, va loya kona, va ya Vuxa ni ku vindlukisa a zidlemo.

¹⁴Zonake a vamakabye va lo hatlisa va fambisa Paule a kala a chikela bimbini; kanilezi Silasi na Timote va lo nonohisa va tshama laho. [314]

¹⁵Lava va nga heleketa Paule va lo mu chiketa le Atensi; va tlhela na va leletelwe lezaku Silasi na Timote a vate kakwe hi kuhatlisa. [315]

¹⁶Paule na a ha va rinzela le Atensi, a moya wakwe wu lo zangariswa nzeni kakwe hi ku wona muti na wu tele hi zifananiso za vanungungulu. [316]

¹⁷Lezo i lo wulawulisana sinagogeni ni vaJuda hi lava va chavako Nungungulu; ni masiku wontihe i lo maha lezo le hubyeni ni lava a nga tlhangana navo kona.

¹⁸Ni titlhari to kari ta gonzo ya vaEpikure ni ya vaStoike ti kanetisana naye. Vanwani vaku ngalo: I lava ku wula yini a mubyabyatsi loyi ke? A vanwani vaku: I khwatsi mukaneli wa vanungungulu va le matikweni. Va lo wula lezo hilezi a nga kanela hi Jesu ni kuvuka ka vafileko.

¹⁹Va lo mu khoma, va mu yisa Areopagu, vaku: Xana zi nga koteka a kuva u hi tivisa hi gonzo leyi yiswa, leyi u yi kanelako ke?

²⁰Hakuva u wulawula a timhaka ti hlamalisako tindleveni ta hina; hikwalaho ha xuva ku tiva lezaku ti wula yini.

²¹Hakuva vontlhe va le Atensi, ni vamatiko va nga wa luvele kona, va wa nga mahi nchumu, sine ku hlawutela kutani ku ingisa a timhaka tiswa.

²²Lezo Paule i lo yima xikari ka Areopagu, aku ngalo: Nwina madota ya le Atensi, hi matlhelo wontihe nzi wona lezaku mu khozela nguvu vanungungulu.

²³Hakuva khwatsi hilezi nzi nga kari nzi hunza, nzi cuwuka lezi mu zi khozelako, nzi lo kuma ni alati gi nga hi ni mutsalo, waku: Ga Nungungulu loyi a nga tibyiwiko. Makunu a Nungungulu loyi mu mu khozelako hi ku nga mu tivi, hi yena loyi nzi mu byelako ha yena. [317]

²⁴Nungungulu loyi a nga maha misava ni zontlhe zi nga ka yona, yena loyi a nga Hosi ya tilo ni misava, a nga tshami titempeleni leti ti akilweko hi mandla. [318]

²⁵Tlhatakumbiri a nga tirelwi hi mandla ya vanhu, a ku khwatsi o vumala nchumu; kasi hi yena a va nyikako wutomi vontlhe, ni kuhefemula, ni zilo Zontlhe.

²⁶I lo maha tixaka tontlhe ta vanhu ti huma ka nyapanze munwe, a kuva ti aka misaveni yontlhe; na a tiyisile a zikhati za tona zi yimisilweko, ni mimbhingano ya kuaka ka tona;

²⁷lezaku ti fela ku lava Nungungulu, kutani ti nga hulumetela ti mu kuma, hambu lezi a nga hiku kule ka munwe ni munwani wa hina. [319]

²⁸Hakuva ka yena ha hanya, ha fambafamba, hi hi ni kuvakona ka hina; kota lezi va wulileko a vanwani va vasimi va nwina va tisimu, vaku: Hinawu kambe hi pswalo wakwe. [320]

²⁹Lezi hi nga pswalo wa Nungungulu, ngha hi nga alakanyi lezaku a wuNungungulu gi fanana ni nzalama, ni siliva, kutani ribye, zi nga zilo zi vatlilweko hi wumeseri ni kutlhariha ka vanhu.

³⁰Nungungulu i lo hunisela zikhati za kungativi; kanilezi makunu wa laya vanhu vontlhe, a matshanwini wontihe, lezaku va hunzuluka.

³¹Hakuva i vekile a siku legi a ta nga lamula ha gona tiko hi kululama hi munhu loyi a mu yimisileko; hi ka kona i nyikile a xitsumbiso ka vanhu vontlhe, hilezi a nga mu vuxa hi ka vafileko. [321]

³²Kanilezi laha va ngazwa hi kuvuka hi ka vafileko, vanwani va lo mu tseketsela; kanilezi vanwani vaku ngalo: Hi ta tlhela hi kuzwa kambe hi mahungu laya.

³³Zinghaho Paule i lo huma kabye.

³⁴Kanilezi a vanhu vo kari va lo namarela ka yena, va kholwa; xikari ka vona ku wa hi na Dionisi a muAreopagu, ni wasati a vito gakwe a nga hi Damari, ni vanwani va nga wa hi navo.