Read tshwa Mitiro 19 Bible Online

Mitiro 19 - tshwa bible

Mitiro 19

¹Laha Apolosi a nga hi le Korinte, Paule na a tsemakanyile a matiko ma nga kule ni bimbi, i lo chikela Efesusi, a kuma vapizani vanwani; [338]

²aku ngalo kabye: Xana mu amukele a Moya wa ku Basa laha mu nga kholwa ke? Vaku ngalo kakwe: Ahihi, ge hambu ni kuzwa lezaku a Moya wa ku Basa wu kona. [339]

³Yena aku ngalo: Kaxana mu bapatizilwe hi bapatizela ga mani ke? Vaku ngalo: Hi kubapatiza ka Johani. [340]

⁴Paule aku ngalo: Johani i lo bapatiza hi kubapatiza ka kuhunzuluka, na a byela vanhu lezaku a va kholwe ka loyi a ta ngata hi lenzhako kakwe, hi lezaku ka Jesu. [341]

⁵Laha na va zwile lezo, va lo bapatizwa vitweni ga Hosi Jesu.

⁶Laha Paule a nga va tlhatekile mandla, a Moya wa ku Basa wu lota hehla ka vona, va kanela hi tirimi, va profeta. [342]

⁷Ko khwatsi vontlhe va wa hi khume ga vavanuna ni vambiri.

⁸Zonake Paule i lo enghena sinagogeni; tihweti tinharu i lo wulawula hi kutiya, a kanela ni ku va kholwisa hi timhaka ta mufumo wa Nungungulu. [343]

⁹Kanilezi laha a vanwani va nga ti nonohisa va nga ingisi, va wulawula kubiha hi Ndlela mahlweni ka xidlemo, yena i lo suka kabye zinwe ni vapizani, a ya gonzisa masiku ni masiku xikoleni xa Tirano. [344]

¹⁰Ku lo simamisa kota lezo a xipimo xa malembe mambiri; laha ka kuva vontlhe lava va nga wa akile le Asia vazwa a mhaka ya Hosi, a vaJuda ni vaGreki. [345]

¹¹Nungungulu i lo tira zirewukiso zi hlamalisako hi canja ga Paule; [346]

¹²laha ka kuva va veka hehla ka lava va babyako a tilesu ni tinguwo leti ti khumbeneko ni miri wakwe, zonake a tinghumbe ti va tsika, ni mimoya ya kubiha yi huma kabye.

¹³Kanilezi a vaJuda vo kari va nga ni tinʼanga ti nga wa nzulanzula tikweni, ti lo lakalaka ti vitana hi vito ga Hosi Jesu hehla ka lava va nga hi ni mimoya ya kubiha, tiku; Ha mu hlambanyisa hi Jesu, loyi a kanelwako hi Paule. [347]

¹⁴Lava va nga maha lezo va wa hi vana va ntlhanu ni vambiri va Skeva, a nga hi mupristi wa hombe wa muJuda.

¹⁵A moya wa kubiha wu lo hlamula wuku ngalo kabye: Jesu nza mu tiva, na Paule nza mu tiva; kanilezi nwina hi nwina vamani ke?

¹⁶Ni munhu loyi wu nga hi ka yena a moya wa kubiha i lo va tlulela, a va pfinya hi wumbiri gabye a va xanisa, kala va panzanyeka lomo ndlwini, va huma va hi zimbyiri na va lamatilwe.

¹⁷A mhaka leyi yi lo tibyiwa hi vaJuda ni vaGreki vontlhe lava va nga akile Efesusi; vontlhe va lo telwa hi kuchava, ni vito ga Jesu gi lo kuliswa. [348]

¹⁸A vanyingi va lava va nga kholilwe va lota, va ta vumela va hlawutela a zimaho zabye. [349]

¹⁹Ni vanyingi lava va tirileko za wutumbe, va lo neha mabhuku yabye, va ta ma hisa mahlweni ka vontlhe: va lo hlaya a ntsengo wa wona, va kuma 50,000 wa macheleni.

²⁰Zinghaho a mhaka ya Hosi yi lo anza hi ntamu yi humelela. [350]

²¹Loku zi mahekile zontlhe lezo, Paule i lo xuva moyeni a ku tsemakanya Makedonia ni le Akaya, aya Jerusalema, aku: Anzhako ka kuva na nzi yile kona nzi fanele ku ya wona ni le Roma kambe. [351]

²²Na a rumele Makedonia a vambiri va vavuni vakwe, Timote na Erastusi, yena wutsumbu i lo sala xikhatanyana le Asia. [352]

²³Hi lexo xikhati ku lo vuka a woyonga ga hombe hi kota ya leyi Ndlela. [353]

²⁴Hakuva a mufuli wa siliva, a vitwako Demetriu, loyi a nga maha titempelana ta siliva ta Diana, i lo fumisa nguvu a zitiri zakwe.

²⁵Yena i lo zi tsombanyisa, zinwe ni vafuli-kulobye, aku: Vavanuna, ma zi tiva lezaku a kufuma ka hina ku huma ntirweni lowu.

²⁶Nwina ma zi wona ni ku zizwa, lezaku a hi laha Efesusi koce, kanilezi kusuhani ka Asia gontlhe, Paule loyi i vumelisile vanhu vanyingi a va hambukisa, aku: A vanungungulu lava va mahilweko hi mandla a hi vanungungulu. [354]

²⁷A hi lezo basi lezaku a ntiro wa hina wu le mhangweni ya ku nyenyiwa, kanilezi ni tempeli ya nungungulu wa hombe Diana yi nga ha ta khatalelwa, ku nga taku a lahlekelwa hi wukulu gakwe, yena loyi a Asia gontlhe ni misava yontlhe yi mu khozelako.

²⁸Laha va nga zizwa va lo zangara nguvu, va kanyuluka, vaku: Ngwa hombe Diana wa vaEfesusi!

²⁹A muti wontihe wu lo maha pfilupfilu, va tsutsuma hi mbilu yinwe wutshanwini ga teatro, na va khomile Gaiusi na Aristakusi va le Makedonia, a zitiri-kulobye za Paule. [355]

³⁰Laha Paule a nga lava ku enghena hlengeletanweni, a vapizani a va mu vumelangi.

³¹A vo kari va manghanakana ya hombe ya le Asia, va nga hi vanghana vakwe, va lo rumela ka yena, va mu khongotela lezaku a ngayi lomo ka teatro.

³²A vanwani va lo kanyuluka hi xilo xinwe, ni vanwani hi xinwani; hakuva a xidlemo xi wa hi ni pfilupfilu; a linyingi la vona li wa nga xi tivi lexi va nga tsombanele xona.

³³Va lo humesa Alekzandre hi lomu xidlenwini, a vaJuda va mu susumetela mahlweni. Alekzandre i lo khweneta hi canja, na a lava ku ti hlamulela ka vanhu. [356]

³⁴Kanilezi laha va nga zi tiva lezaku muJuda, vontlhe va lo kanyuluka hi gezu ginwe a xipimo xa tihora timbiri, vaku: Ngwa hombe Diana wa vaEfesusi!

³⁵Laha a mutsali wa muti na a miyetile a xidlemo, aku: Nwina madota ya Efesusi, hi wihi munhu a kalako a nga zi tivi lezaku a muti wa vaEfesusi muhlayisi wa tempeli ya Diana wa hombe, ni wa xifananiso xi wileko hi le tilweni ke?

³⁶Lezi a timhaka leti ti nga hiko na ku kanetwa hi munhu, ngha mu rutisa, mu nga mahi nchumu hi matloti.

³⁷Hakuva a vavanuna lava mu va nehileko laha, a hi vaphangi va titempeli, hambu a varuki va nungungulu wa hina.

³⁸Hikwalaho loku Demetriusi ni vatiri-kulobye va hi ni mhaka ni munhu, ma kona masiku ya ku xuxa timhaka, ni Valamuli va kona, ngha va ya kecarana kona.

³⁹Kanilezi loku mu lava ku humesa timhaka tinwani, ti ta tsemiwa hlengeletanweni yi yimisilweko.

⁴⁰Hakuva hakunene hi le mhangweni ya ku raniswa hi kota ya xiphitiphiti xa nyamutlha, lezi ku nga hiko na xigelo hi ta nga zi kota ku ti hlamulela ha xona hi kutsombana loku.

⁴¹Laha na a wulile lezo, i lo hangalasa xidlemo. [357]