Read tshwa Mitiro 20 Bible Online

Mitiro 20 - tshwa bible

Mitiro 20

¹Anzhako na ku mbhelile a woyonga, Paule i lo vitana vapizani, a va khongotela, a onekana navo, a suka aya Makedonia. [358]

²Laha a nga wa tsemakanyile lawo matlhelo, a khongotela vamakabye hi magezu yo tala, i lo chikela le Grekia.

³Laha a nga tshamile kona tihweti tinharu, ni khungo gi wa tsemilwe hi vaJuda go mu daya laha a nga lava ku famba Siria hi taru, zonake i lo xuva a ku tlhela a tsemakanya Makedonia. [359]

⁴Va lo mu heleketa kala va chikela le Asia, vaSopateri wa le Berea, a nʼwana wa Pirusi; na Aristakusi, na Sekundo va le Tesalonika; Gaiusi wa le Derbe, na Timote: ni va le Asia, Tikukusi na Trofimusi. [360]

⁵Kanilezi va lo ranga va famba, va ya hi lavelela le Troasi.

⁶Hina hi lo suka le Filipi hi taru anzhako ka masiku ya zibaba zi nga hiko na comelo, hi chikela kabye le Troasi hi ntlhanu wa masiku; hi tshama kona ntlhanu wa masiku ni mambiri. [361]

⁷Hi siku go ranga ga viki, laha hi nga wa tsombene ku khema xibaba, Paule na a xuva ku suka manziko wa kona i lo kanela kabye, a lehisa kanelo wakwe ku kala xikari ka wusiku. [362]

⁸Ku wa hi kona a tikandiya to tala lomu ndlwini ya xitezi, laha hi nga wa tsombene kona.

⁹Laha ka njhanela ku wa tshamile a jaha legi va nge hi Etikusi, gi lo tsingelwa hi wurongo ga hombe. Kota lezi Paule a nga nonohisa a kanela, gi lo hlulwa hi wurongo, giwa hi le xitezini xa wunharu, gi tlakulwa na gi file.

¹⁰Paule i lo relela, a korama hehla kakwe, a mu angarela, aku: Mu nga rili, hakuva a muhefemulo wakwe wa ha hi ka yena. [363]

¹¹Laha na a kanzihile le hehla, i lo khema xibaba, aga, a wulawula navo a xikhati xa hombe, gi kala gica, zonake i lo suka a famba.

¹²Kanilezi va lo wuya ni mufana na a hanya, vontlhe va tangaliswa.

¹³Kanilezi hina hi lo ranga hiya tarwini, hi suka ha gona hiya Asosi, laha hi nga xuva ku khileta Paule kona, hakuva yena i wa lelele lezo, yena nwinyi na a xuva ku famba hi milenge.

¹⁴Laha a nga tlhangene na hina le Asosi, hi lo mu khileta, hiya Mitilene.

¹⁵Na hi sukile laho hi taru, hi manziko wa kona hi lota laha ku cuwukeneko ni le Kiosi. Hi siku gi gamelako hi lo hunza le Samosi; hi manziko wa kona hi lo chikela Miletu.

¹⁶Hakuva Paule i wa xuva ku hunza hi le Efesusi, lezaku kasi a nga hlweli le Asia; hakuva i wa hatlisela ku ya chikela Jerusalema hi siku ga Pentekosta loku zi wa koteka. [364]

¹⁷Na a hi le Miletu i lo rumela Efesusi, a ku vitana a masingalakati ya handla.

¹⁸Ni laha va nga wa tile ka yena, aku ngalo kabye: Nwina ma zi tiva lezi nzi nga tshamisa zona xikari ka nwina kusukela siku lego nzi nga chikela le Asia, [365]

¹⁹nzi tirela Hosi hi kutikoramisa kontlhe ni mihloti, ni xikari ka minzhingo leyi nzi nga welwa ha yona hi kota ya makungo ya vaJuda; [366]

²⁰lezaku a nzi mu lovelangi a timhaka ti vunako, kanilezi nzi lo mu kanelela, nzi mu gonzisa kubaseni ni lomu tindlwini,

²¹na nzi tiyisa ka vaJuda ni ka vaGreki hi kuhunzulukela ka Nungungulu, ni kukholwa hi Hosi ya hina Jesu Kristu. [367]

²²Makunu nziya Jerusalema na nzi bohilwe hi Moya, na nzi nga zi tivi lezi zi ta nga nzi humela seyo; [368]

²³Sine lezaku a mitini yontlhe a Moya wa ku Basa wa nzi tivisa lezaku a ziboho ni zixaniso zi nzi lavelele.

²⁴Kanilezi a nzi khatali nchumu hi kuhanya ka mina, a nzi wuli lezaku ku na ni lisima ka mina, kasi nza fela ku mbheta a kufamba ka mina, ni ntiro lowu nzi wu amukeleko hi ka Hosi Jesu, lezaku nzi kustumunya hi ivangeli ya tipswalo ta Nungungulu. [369]

²⁵Makunu nza zi tiva lezaku nwina nwentlhe, lava nzi nga fambafamba xikari ka nwina nzi kanela a mufumo wa Nungungulu, mu nga ta ha wona a nghohe ya mina kambe. [370]

²⁶Hikwalaho nyamutlha nza tiyisa ka nwina, lezaku a nzi na nanzu nkhateni wa nwina nwentlhe.

²⁷Hakuva a nzi lovangi a kuba hungu ka nwina hi khungo gontlhe ga Nungungulu. [371]

²⁸Ti woneleni nwina, ni ka ntlhambi wontihe, lowu a Moya wa ku Basa a nga mu veka vahlayisi va wona, a ku gisa a bandla ga Hosi, legi yi gi xavileko hi nkhata wa yona. [372]

²⁹Nza zi tiva lezaku anzhako ka kuva nzi sukile, a timhisi ti pamako ti ta enghena xikari ka nwina, leti ti nga wu tsikiko ntlhambi. [373]

³⁰Na kona xikari ka nwina ku ta vuka a vanhu, lava va kanelako a zilo zi gombonyekileko, kasi ku ti kokela vapizani. [374]

³¹Hikwalaho rinzelani, na mu alakanya lezaku hi malembe manharu a nzi tsikangi ku luleka munwe ni munwani wa nwina hi mihloti a wusiku ni mumu.

³²Makunu nza mu veka ka Nungungulu, ni ka mhaka ya tipswalo takwe, leyi yi zi kotako a ku mu aka, ni ku mu nyika tshomba xikari ka vontlhe lava va basisilweko. [375]

³³A nzi navelangi mali ya siliva, kutani ya nzalama, hambu ni tinguwo ta munhu. [376]

³⁴Nwina venyi ma zi tiva lezaku a mandla laya ma lo nzi tirela lezi zi nga laveka ka mina, ni ka lava va nga hi zinwe na mina. [377]

³⁵Hi zilo zontlhe nzi lo mu kombisa, lezaku hi ku tira lezo mu yimelwe hi ku vunetela lava va nga ni gome, ni ku alakanya a timhaka ta Hosi Jesu, leti yena wutsumbu a nga wula, aku: Ku katekile ku nyika ku hunza ku nyikiwa. [378]

³⁶Laha a nga wa kanele timhaka leti, i lo khizama a khongela navo vontlhe.

³⁷Vontlhe va lo rila nguvu, va wela nhanwini ya Paule, va mu pswopswa, [379]

³⁸Na va hi ni wusiwana nguvunguvu hi mhaka leyi a nga yi wulile, yaku: Va nga ta ha wona a nghohe yakwe kambe. Zonake va lo mu heleketa tarwini.