Read tshwa Mitiro 21 Bible Online

Mitiro 21 - tshwa bible

Mitiro 21

¹Anzhako na hi hambene navo hi lo famba hi taru, hi komama hiya chikela Kose, na gi cile hiya le Rode, hi suka laho hiya Patara.

²Na hi kumile a taru kona, legi gi nga tlhatukela Fenikia, hi lo khilela hi famba.

³Laha hi nga wona le Kupero hi lo ku bela tlhelo ga xibhabha, hi komama Siria, hi ya chekama le Tire; hakuva a taru gi wa fanele ku rula a nzhwalo wa gona laho.

⁴Na hi kumile a vapizani hi lo tshama kona a ntlhanu wa masiku ni mambiri; vona va lo byela Paule hi Moya lezaku a ngayi Jerusalema. [380]

⁵Laha na hi mbhetile a masiku lawo, hi lo suka hi famba; vontlhe va lo hi heleketa, zinwe ni vavasati ni vanana, hi kala hi huma lomu mutini; hi lo khizama laha fungwini, hi khongela,

⁶hi salisana navo, hi ya khilela lomu tarwini, kanilezi vona va lo tlhela vaya kaya.

⁷Na hi tlhatukile ku suka hi le Tire hi lo chikela le Ptolemais; hi lo losetela a vamakabye, hi tshama navo siku ginwe.

⁸Hi manziko wa kona hi lo suka, hi ya chikela le Kesaria; hi enghena ndlwini ya muvangeli Filipu, loyi a nga hi munwe wa va ntlhanu ni vambiri, hi tshama kakwe. [381]

⁹Yena i wa hi ni mune wa vanhwana lava va nga wa profeta. [382]

¹⁰Kota lezi hi nga wa tshamile laho a masiku yo kari, ku lo relela a muprofeti wo kari hi le Judia, a vito gakwe hi Agabusi.

¹¹Na a chikele ka hina i lo teka a bhandi ga Paule, a ti boha mikonzo ni mandla, aku ngalo; Moya wa ku Basa wu ngalo; Loyi a nga nwinyi wa bhandi legi, a vaJuda va ta mu bohisa lezi le Jerusalema, va mu nyikela mandleni ya vamatiko. [383]

¹²Laha hi nga zi zwile, hina zinwe ni vanhu va lego wutshamu, hi lo khongotela Paule lezaku a ngayi Jerusalema.

¹³Kanilezi Paule i lo hlamula aku: Hikuyini mu rilako mu panza a mbilu ya mina ke? Kasi mina a nzi longelangi ku bohiwa ntsena, kanilezi ni ku fela a vito ga Hosi Jesu le Jerusalema. [384]

¹⁴Laha a nga kala a nga hi ingisi hi lo miyela, hiku: A kuranza ka Hosi a ku maheke. [385]

¹⁵Anzhako ka lawo masiku hi lo ti longisela, hiya Jerusalema,

¹⁶A vapizani vo kari va le Kesaria va lo famba na hina, lava va nga hi heleketa ka Mnasoni wa le Kupero, a mupizani wa kale, loyi a nga te ngha a hi rurele.

¹⁷Laha hi nga chikela le Jerusalema a vamakabye va lo hi amukela hi kutsaka.

¹⁸Hi manziko wa kona Paule i lo famba zinwe na hina ka Jakobe, a masingalakati wontihe na ma hi kona. [386]

¹⁹Laha a nga va losetele, i lo hlawutela hi ku lanzelana zontlhe lezi Nungungulu a nga zi mahile xikari ka vamatiko hi kutira kakwe. [387]

²⁰Vona laha va nga wa zi zwile va lo dumisa Nungungulu, vaku ka yena: Makabye, hi nga wona a mazana-zana ya vaJuda va kholilweko, vona vontlhe va pinyamela a navo; [388]

²¹Vona va byelilwe ha wena, lezaku u gonzisa a vaJuda vontlhe lava va tshamako matikweni, a ku tsika a nayo wa Mosi, uku: Va nga enghenisi wukwera a vanana vabye, hambu ni ku famba hi mikhuwo.

²²Xana hi ta kuyini ke? Hakunene va tazwa lezaku u chikele.

²³Hikwalaho maha lezi hi ta nga ku byela zona. Hi na ni mune wa vavanuna lava va ti bohileko hi xifungo;

²⁴famba navo, u ya ti basisa zinwe navo, u va rihela, lezaku va cinga tihloko; kasi vontlhe va ta zi tiva lezaku za hava lezi va bikelweko ha wena; ni lezaku na wenawu wa hlayisa nayo. [389]

²⁵Kanilezi hi kukumbuka a vamatiko lava va kholilweko, hi lo va tsalela hi laya lezaku ava ti hlayise ka lezi zi phahlelwako ka zifananiso, ni nkhata, ni lezi zi fileko hi ku tlimbiwa, ni kubhaya. [390]

²⁶Zonake hi manziko wa kona, Paule i lo famba ni vanhu lavo, a ya ti basisa zinwe navo, a enghena tempeleni, a ya bika a siku legi ku ta nga mbhela ha gona a kubasiswa, ni xikhati lexi ku ta nga nyikelwa a munyikelo wa munwe ni munwani wa vona. Paule a khomiwa lomu tempeleni.

²⁷Laha ma nga lava ku mbhela a ntlhanu wa masiku ni mambiri, a vaJuda va le Asia va lo mu wona tempeleni, va vindlukisa a xidlemo xontlhe, va mu khoma, [391]

²⁸va kanyuluka, vaku: Vavanuna va ka Israeli, hi vuneni! Hi loyi munhu a gonzisako vanhu matshanwini wontihe a za ku hambana ni tiko ga hina, ni nayo, ni legi wutshamu. Tlhatakumbiri i nehile vaGreki lomu tempeleni, a nyenyezisa wutshamu legi go basa. [392]

²⁹Hakuva va wa mu wonile le mutini na a hi na Trofimusi wa le Efesusi, loyi va nga alakanya lezaku Paule i mu enghenisile lomu tempeleni. [393]

³⁰A muti wontihe wu lo maha nyenganyenga, a vanhu vontlhe va tsombana wutshamu ginwe; va khoma Paule, va mu kokovisela lehandle ka tempeli, ku valiwa a tinyangwa ta tempeli.

³¹Kota lezi va nga lava ku mu daya, a nduna ya yimpi yi lozwa lezaku ku na ni woyonga Jerusalema gontlhe.

³²Zonake yi lota ni masochwa ni tinduna ta mazana, yi tsutsuma yiya ka vona. Laha va nga yi wona a nduna ya hombe ya yimpi ni masochwa, va lo tsika kuba Paule.

³³A nduna ya hombe ya yimpi yi lo tshinela, yi mu khoma yi laya lezaku a bohiwe hi mangenje mambiri; zonake yi lo wutisa aku himani, niku i mahile yini. [394]

³⁴Vanwani va lo kanyuluka hi xilo xinwe, ni vanwani hi xinwani, xikari ka vanhu. Laha yi nga kala ku tiva a zinene za kona hi kota ya guwa, yi lo laya lezaku a yisiwe xikanekisweni.

³⁵Laha Paule a nga chikele mayingweni, i lo rwaliwa hi masochwa hi kota ya kuleva ka vanhu,

³⁶hakuva a xidlemo xa vanhu xi wa lanzela, na xi kanyuluka, xiku: Mu suse! [395]

³⁷Kota lezi Paule va nga lava ku mu enghenisa lomo xikanekisweni, i te ngalo ka nduna ya hombe: Xana nzi nga vumelwa ku wula nchumu ka wena ke? Yona yiku ngalo: Wena wa xi tiva xiGreki ke?

³⁸Kasi a hi wena a muGipite loyi a nga vuxa woyonga masikwini ma hunzileko, a kokela xiwuleni a 4,000 wa zigevenga ke? [396]

³⁹Paule aku ngalo: Mina nzi muJuda wa le Tarsusi le Kilikia, nzi munhu wa muti wu dzunzekileko; nza ku khongotela u nzi vumela ku kanela ka vanhu. [397]

⁴⁰Laha na yi mu vumele, Paule i lo yima laha mayingweni, a khweneta hi canja ka vanhu; laha va nga miyele, i lo kanela kabye hi lirimi la xiHeberu, aku: [398]