Read tshwa Mitiro 24 Bible Online

Mitiro 24 - tshwa bible

Mitiro 24

¹Anzhako ka ntlhanu wa masiku, Ananiasi a mupristi wa hombe i lo relela zinwe ni masingalakati yo kari, ni mutshawuteli a nga hi Tertuli; va lo veka keco ha Paule mahlweni ka hosi. [427]

²Laha va nga vitanile Paule, Tertuli i lo sangula ku mu kecara, aku: Felisi a dzunzekileko,

³ha zi tiva lezaku hi tshamile hi kurula ka hombe hi kota ya wena, ni lezaku a timhaka ta kubiha ti lulamiswa tikweni ga hina hi wutlhari ga wena, hi vumela lezo timhakeni tontlhe ni wutshanwini gontlhe hi kubonga.

⁴Kanilezi lezaku nzi nga ku hungatela nza ku kombela a kuva u hizwa hi wuxinji ga wena loku nzi wulawula timhaka ti tsongwani.

⁵Hi kumile lezaku munhu loyi i bihile, muvuxi wa vilinganya xikari ka vontlhe vaJuda lava va akileko misaveni yontlhe, ni murangeliwa lihunzu la vaNazareta; [428]

⁶tlhatakumbiri i lo ringa ku bihisa tempeli. Hi lo mu khoma, kasi ku mu lamula hi nayo wa hina,

⁷kanilezi Lisia a nduna ya hombe, i lo huma a mu wutla mandleni ya hina hi ntamu wa hombe,

⁸a laya vakecari vakwe a kuta mahlweni ka wena. Loku u mu hlola u ta zi kota ku tiva ha wece zontlhe lezi hi mu kecarako ha zona. [429]

⁹A vaJuda va lo mu yimela, va tiyisa vaku hi zona lezo.

¹⁰Laha a hosi yi nga mu khwenetile a kuva a wulawula, Faule i lo hlamula, aku: Kota lezi nzi zi tivako lezaku malembe manyingi na u hi mulamuli wa tiko legi, nzi ti hlamulela na nzi xalele.

¹¹Loku u wutisa u ta zi tiva lezaku a ku hunzi khume ga masiku ni mambiri cima ka lezi nzi nga kanziha a ku ya khozela le Jerusalema. [430]

¹²A va nzi kumangi le tempeleni na nzi kari nzi kanetisana ni munhu, kutani ku vuxa dzolonga, hambu le masinagogeni, ge ni le mutini. [431]

¹³Cima a va zi koti ku tiyisa mahlweni ka wena lezi va nzi kecarako ha zona makunu.

¹⁴Hakunene nza vumela ka wena lezaku nzi khozela Nungungulu wa vadadani va hina hi ndlela leyi va yi wulako Kupenga; kanilezi nzi kholwa zontlhe lezi zi tsalilweko nayweni ni lomu ka mitsalo ya vaprofeti. [432]

¹⁵Nzi na ni kutsumba ka Nungungulu, loku va nga nako na vonawu, lezaku ku tava kona a kuvuka ka valulamileko ni va nga lulamangiko. [433]

¹⁶Hilezo-ke na minawu nza pangama a kuva ni livalo li nga solekiko xikhati xontlhe mahlweni ka Nungungulu ni vanhu.

¹⁷Makunu hi nzhako ka malembe yo tala, nzi lota nzi neha zinyikiwo ka vanhu va hina, ni ku humesa miphahlo. [434]

¹⁸A vanwani vaJuda va le Asia va lo nzi kuma tempeleni na nzi ti basisile, na nzi nga hi na xidlemo, hambu ni woyonga; [435]

¹⁹ngha va tile laha mahlweni ka wena, a ku ta nzi kecara loku va hi ni mhaka ha mina.

²⁰Hambu ni valava ngha va wula a nanzu lowu va wu kumileko ka mina laha nzi nga yimile mahlweni ka hubye, [436]

²¹loku gi nga hi gezu legi nzi ngaba hungu na nzi yimile xikari kabye gaku ngalo: Nzi kecarilwe nyamutlha hi kukumbuka a kuvuka ka vafileko.

²²Kanilezi Felisi loyi a nga tiva khwatsi a gonzo leyi, i lo va tlhelisa, aku: Loku a tile Lisia a nduna ya hombe, nzi ta hlolisisa a mhaka ya nwina.

²³I lo laya a nduna ya zana a kuva Paule a hlayisiwa khwatsi, ni ku kala ku nga tsimbetwi a maxaka yakwe a ku ta mu tirela. [437]

²⁴Kanilezi anzhako ka masiku yo kari, ku lota Felisi ni sati wakwe Drusila, loyi a nga hi muJuda, i lo vitana Paule, a kuva a ta muzwa hi kukholwa ka Kristu Jesu.

²⁵Kanilezi laha a nga kanela hi kululama, ni kutikhoma, ni kulamula ku tako, Felisi i lo chava, a hlamula, aku: Ti fambele makunu, nzi ta tlhela nzi ku vitana loku nzi kuma xikhati xi nene.

²⁶Kambe i wa tsumba lezaku Paule i ta mu nyika mali, hi kota ya lezo i lo mu vitana zikhati zinyingi, a wulawula naye. Ekso. 23:8 1 Tim. 6:10

²⁷Kanilezi na ku hunzile malembe mambiri, Porkiu Festu i lo enghena xikhundleni xa Felisi; kanilezi Felisi na a lava ku khesiwa hi vaJuda i lo siya Paule makhotsweni. [438]